Дээд боловсролыг цогцоор нь шинчлэх бодлогыг Боловрол соёл шинжлэх ухааны яамнаас авч байгаа билээ. Энэ ажлын хүрээнд оюутны хотхоныг барих төлөвлөгөөг хэрэгжүүлэхээр болоод байна. Өнөөдөр Оюутны хотхоны барих ажлын явцын талаар Ерөнхий сайд холбогдох яамдын сайд болон мэргэжилтнүүдтэй уулзаж танилцсан юм. Оюутны хотхоныг Буянт ухаа, Яармаг гэсэн хоёр хэсэгт төвлөрүүлэхээр болжээ. Нийслэлээс 25-30 км цаана төвлөрөх энэхүү хотхоны зураг төсөл болоод нийт зарлагадах хөрөнгө мөнгөний асуудлуудыг ярилцаж шийдвэрлэж байгаа аж. Ямартаа ч хоёр хэсэг болгон барих оюутны хотхонд нийт 300 сая орчим доллар зарцуулагдахыг БХБ-сайд Х. Баттулга хэллээ.
Тэрээр цааш нь “Монголд их дээд сургуульд суралцагч оюутнууд ихдээд байна. 150 мянган оюутан өнөөдрийн байдлаар манайд суралцаж байна. Харин Солонгосд гэхэд 300 мянга байдаг. Бусад оронд бол чанартай цөөхөн сургуульд үнэхээр чанартай суралцаж төгсөж байна” гэлээ. Түүнчлэн оюутны хотхоны цогцоор нь барих төлөвлөгөөнөөс цухас танилцууллаа. Оюутны хотхонд спорт заал, номын сан гээд бүхий л оюутны үйлчилгээг цогцоор нь төвлөрүүлэх бөгөөд тусгайлан автобусаар үйлчлэх болохоо ч хэллээ.
Ерөнхий сайд ч өөрийн зүгээс салбарын сайдуудад ажлынх нь чиглэлийн хийгдэх ёстой ажлыг нь дахин сануулаад авлаа. Монголын боловсролын салбарыг шинчлэхэд бүхнийг цогцоор нь шийдэх ёстой гэдгийг тэрээр нэмж санууллаа. Мэдээж оюутныг дагаад багш ажилчидын асуудал ч энд хөндөгдөх болно гэж тэрээр хэллээ.
Мөн хотхоны дэд бүтэц хөрөнгө санхүүгийн гээд шийдвэрлэх ёстой маш их ажил байгаа учраас БСШУЯ болон БХБ яам, нийслэлийн удирдлагуудаас бүрдсэн ажлын хэсгийг байгуулах талаар Ерөнхий сайд үүрэг өглөө.
Г. Уянга
Зохиогчийн эрх хуулиар хамгаалагдсан. Мэдээлэл хуулбарлах хориотой.