"Чаатын эмээ"-гийн хэрэг шийдэгдээгүй хоёр дахь жилтэйгээ золгож байна. Харин чаатлагчид энэ хугацаанд ёстой дураараа дургиж дунд чөмгөөрөө жиргэж байх шиг. Олон телевизтэй болсныг ч хэлэх үү. Бараг л бүх сувгаар "чаатын солиорол" явж байгааг бүгд л анзаарсан байж таарна. Зөвхөн анзаарагдаад өнгөрөх биш шөнөжин явдаг гэнэ. Улс даяар гардаг том телевизийн нэг болох ТВ-9 телевизээр кино үзэж байхад хүртэл доогуур нь нөгөөх чаат (садар самууныг сурталчилсан чаатыг хэлж байна) гарах юм гээч. Саявтархан манай сонинд нэг мэдээлэл ирсэн юм. Улсдаа нэр хүндтэй ерөнхий боловсролын нэг сургуулийн ахлах ангийнхан нэгнийхээ төрсөн өдрөөр нь бэлэг болгон онгон охин өгсөн тухай байсан. Итгэхэд бэрх уг мэдээлэлтэй зэрэгцээд нийслэлд онгон охин худалддаг нэг баар байдаг шүү дээ гэж нэг нь хэлэв. Энэ бүгдийг батлах мэт телевизийн чаатаар "Онгон охид байна. Санхүүгийн дэмжлэг авна" гэсэн мессеж хэд хэдэн удаа явж байхыг үзлээ. Бас болоогүй " 18-20 насны царайлаг залуус байна. Санхүүгийн дэмжлэг өгөх эгч нартай нас харгалзахгүй дотно танилцана" гэхчилэн юу дуртайгаа бичих юм. Хянаж цагддаг газар гэж байдаггүй бололтой. Нэг нэгнийгээ хуулан хулгайлах, солонгос савангийн дууриас өөрийг бараг гаргадаггүй энэ олон телевизийн зөвшөөрлийг өгдөг газар нь нэгийг бодохгүй бол хэрээс хэтэрчээ.
Олхонууд ШААБАР
Зохиогчийн эрх хуулиар хамгаалагдсан. Мэдээлэл хуулбарлах хориотой.