УИХ-ын Тамгын газрын нарийн бичгийн дарга Ц.Шаравдоржтой ярилцлаа.
-Сүүлийн үед Төрийн шинэ ордон барих газрын маргаан ширүүсч байх шиг...
-Төрийн ордны цогцолбор барих асуудал олон жил яригдаж байгаа. Төрийн ордны ачаалал хэрээс хэтэрснийг иргэд мэдэж байгаа байх. Өнөөдөр Төрийн ордонд УИХ, Ерөнхийлөгч, Засгийн газар гээд бүх төрийн дээд байгууллагууд байрлаж байна. Төрийн ордон барих шийдвэр 2007 онд УИХ-ын 92 дугаар тогтоолоор гарсан. Хаана барих тухай асуудлыг шийдвэрлүүлэхээр Засгийн газарт үүрэг өгсөн байдаг. Засгийн газрын санал болгосноор Төрийн байгуулалтын байнгын хороо шинэ ордны дэд бүтэц болон бусад олон үндэслэлийг харгалзан Төрийн ордны хойд талд цогцолборыг барих саналыг дэмжсэн дүгнэлт гаргаад байгаа. Шийдвэр аль эрт гарсан. Энэ шийдвэрийг биелүүлэх үлдээд байгаа.
-Хөрөнгө мөнгөний тухайд манай талд кувейтүүд мөнгөө өгчихсөн байгаа юу, ажил нь эхлэхээр өгөх юм уу?
-Кувейтийн Засгийн газар парламентын ордон барих мөнгийг хэдийнэ шийдсэнийг хүмүүс мэдэж байгаа. Мөнгөө нааш шилжүүлээд эхэлсэн. Одоо ажлын зураг гаргахаар Кувейт Монголын компаниуд ажиллаж байгаа.
-Ачааллаа дийлэхгүй Төрийн ордны асуудал тодорхой ч нийслэлд үлдсэн ганц цэцэрлэгээ устгах нь гэсэн яриа гараад байгаа?
-Төрийн ордны хойд цэцэрлэгийг байхгүй болгох нь ээ гэсэн яриа гарсан. Манай УИХ-ын зарим гишүүн эсэргүүцээд гарын үсэг зураад явж байгаа гэж дуулдсан. Энд тодорхой нэг ойлголтыг өгөх ёстой. Төрийн ордны хойд цэцэрлэгийн 70 хувь нь үлдэнэ. Харин ч шинэ ордныг барьснаар арын цэцэрлэгийг шинэчилнэ. Одоогийн хөгшин моддыг шинэчилж, усан оргилуур байгуулахаар төлөвлөсөн. Төрийн тамганы хөшөө ч хэвээр үлдэнэ.
-Энэ барилгын хэмжээ, ашиглалтын хугацаа ямар байх бол?
-Одоогийн ордон хэдий настай билээ, цаашдаа ордны шинэ цогцолбор баригдвал төрдөө олон жилээр үйлчлэх олон жилийн настай том байгууламж болно. Зарим хүн болохоороо ард түмний цэцэрлэгийг нураалаа гэдэг. Төрийн ордон ч ард түмнийх шүү дээ.
-Энэ ордондоо дахиад л бүгд шавчих уу?
-Шинэ ордон бол УИХ-ын ордон. Бидний төсөөлж байгаагаар тамгын газар хуучин ордонд үлдэх байх. Шинэ ордонд иргэд чөлөөтэй орж УИХ-ын хуралдааныг сонирхох боломжтой болно. Одоо нэлээд хүндрэлтэй шүү дээ.
-Хуучин ордонд нэмж байгууллага орох болов уу?
-Үнэнээ хэлэхэд өнөөдөр нэг өрөөнд хоёр, гурвуулаа сууж байна. Ялангуяа Тамгын газар маш хүнд нөхцөлд ажиллаж байна. УИХ-ын архив, номын сан ч хэцүү байгаа.
-Хэдийнээс эхэлж баригдах бол?
-Зураг төсөл эхэлчихсэн явж байгаа. Оны эцсээр зураг бэлэн болно. Тендер зарлаад хуулийн дагуу л явна.
-Төвд том барилга барихад дулаан цахилгааны асуудал хүндрэл дагуулдаг гэдэг. Дулаан, цахилгааны хүндрэл гарахгүй юу?
-Хэрэв баригдаад эхэлбэл 2012 оны эцэст ашиглалтад орно. Тэр болтол төвийн дулаан, цахилгааны хангамж нэмэгдсэн байхаар тооцсон байгаа.
-Төрийн ордон баригдах нь тодорхой гэж ойлгож болох уу?
-Баригдана. Монголын ард түмэн баярлах ёстой. Монгол орны нүүр царай, нэр хүнд ч бас үүнтэй холбоотой шүү дээ.
-Дээр нь онгоц буудаг талбайтай гэсэн үнэн үү?
-Одоо зураг төслийн ажил явагдаж байгаа болохоор хэлж мэдэхгүй байна.
Зохиогчийн эрх хуулиар хамгаалагдсан. Мэдээлэл хуулбарлах хориотой.