Өнгөрсөн нэгдүгээр сарын 12-нд Гаитид Рихтерийн шаталбараар долоон магнитудын хүчтэй газар хөдлөлт болсон билээ. Энэхүү байгалийн гамшгийн улмаас 220 мянган хүн амь үрэгдэж, 1.3 сая хүн орон гэргүй болсон юм. Олон улсын байгууллагаас тэдэнд хүмүүнлэгийн тусламж үргэлжлүүлэн хүргэсээр байгаа. Газар хөдлөлтөд нурсан тус улсын Ерөнхийлөгчийн ордны өмнө өчигдөр болсон хэвлэлийн бага хурлын үеэр Гаитийн Ерөнхийлөгч Рене Преваль нэгэн мэдэгдэл хийжээ. Тэрбээр олон улсын байгууллагаас ирүүлж буй хүнсний тусламжийг авахаас татгалзаж байгаагаа мэдэгдэв. Р.Преваль “Бид энэхүү тусламжийг авсаар байвал манай үйлдвэр, худалдаа дампуурахад хүрнэ. Тиймээс ард түмнээ ажлын байраар хангахын тулд дотоодынхоо зах зээлийг хөгжүүлэх хэрэгтэй байна. Бидний гол зорилго хүмүүсээ ажлаар хангах явдал. Гадны тусламж нь үүнд саад болж байна” гэв. Тэрбээр цааш нь АНУ болон олон улсын байгууллагууд гаитчуудад гамшгийг даван туулахад тусламж үзүүлж байгаад талархлаа илэрхийлэхээ мэдэгдсэн байна. Мөн ирэх зургадугаар сард Гаитид хар салхины улирал болох тул аюулгүй байдлаа хангах бэлтгэлээ базаах хэрэгтэйг онцлов. НҮБ-ын хүнсний хөтөлбөрийн асуудал хариуцсан төлөөлөгч энэ талаар онцлохдоо байгалийн гамшигт нэрвэгдсэн хүмүүст тусламжаа үргэлжлүүлэн хүргэх хэрэгтэй. Тэдэнд хүнсээ авах мөнгө байхгүй. Тиймээс бид хүнс болон усны хэрэгцээг нь хангах тал дээр илүү ихийг хийх болно гэв. Харин Улаан загалмай нийгэмлэгээс орон гэргүй болсон гаитчуудыг ирэх тавдугаар сар хүртэл майхнаар хангахаа мэдэгдэв.
Д.ЦЭРЭНДОЛГОР
Зохиогчийн эрх хуулиар хамгаалагдсан. Мэдээлэл хуулбарлах хориотой.