Саяхан зодог тайлсан их аварга Асашёорюү Д.Дагвадорж Нью-Йоркод хүрэлцэн иржээ. Японы спортын “Чүничи Спортс” сонины дугаарт нийтэлсэн өгүүллээс үзвэл Д.Дагвадорж аварга Хавайд арваад хоног амарч, тэндээсээ Лос-Анжелест очиж гурав хоноод Нью-Йоркод ирсэн нь энэ аж. Харин дэлхийн бизнесийн төв гэгддэг Уолл Стрийтээр их аварга ямар хэргээр хэнтэй уулзсаныг нь Японы сонин олж мэдээгүй аж.Ямарч байсан ажил хэргийн уулзалтууд хийжээ. Уолл Стрийт гудамжинд Америкийн хөрөнгийн бирж, Нью-Йоркийн хөрөнгийн бирж, Нью-Йоркийн металлын бирж, “NASDAQ” үнэт цаасны зах зэрэг бизнесийн аварга байгууллагууд оршдог. Ямарч байсан их аварга Нью-Йоркийн хөрөнгийн биржээр орж үнэт цаасны арилжаа сонирхсон тухай Японы хэвлэлүүд мэдээлж байгаа. “Чүничи Спортс” сонин түүний ажил хэрэгч маягийн хар өнгийн костюм зангиатай явсан тухай онцолжээ. Мөн Д.Дагвадоржийн гэр бүлийнхэн Монголдоо банк, хөрөнгө оруулалтын чиглэлээр бизнес эрхэлж байгааг дурьдсан байна.
Гэхдээ тэдний гэр бүлийнхний бизнесийн талаар Японы сонин мэдээлэл муутай байгаа бололтой. Дагвадоржийн ах Д.Сумъяабазарын саяхан мэдэгдсэнээр тэд уул уурхайн салбарт хүчээ сорих бодолтой байгаа юм байна. Японы хэвлэлүүдэд “Үүнийг нотлохоор нэгэн үйл явдал ШУТИС-т” болсон гэжээ.
“АСА” группын ерөнхийлөгч Д.Сэржбүдээ, ШУТИС-ийн ректор Б.Дамдинсүрэн нар хамтын ажиллагааны гэрээнд гарын үсэг зурсан нь дээрх таамаглалыг харин ч баталж буй юм. Гэрээний зорилго нь “АСА” групп тус сургуульд амжилттай суралцаж буй оюутнуудад сургалтын тэтгэлэг олгох, дадлага хийлгэх, ажлын байраар хангах, гадаадад мэргэжил дээшлүүлэх, шинжлэх ухааны шинэ мэдээ мэдээлэл солилцох зэрэг олон талаар туслах гэнэ. “Хөдөлмөрийн зах зээлд зам тээвэр, барилга байгууламж, уул уурхайн дээд мэргэжилтэй боловсон хүчин чухал учир “АСА” группынхан тус сургуультай хамтарч ажиллахаар болсон” хэмээн талууд албан ёсоор мэдэгджээ. Уул уурхайн мэргэжилтэн бэлтгэдэг Монголын цорын ганц сургуультай ийнхүү хамтран ажиллах болсон нь Д.Дагвадоржийн гэр бүлийнхэн ирээдүйн уул уурхайн бизнесийн тулгын нэг чулууг тавьж байгаад эргэлзэх хэрэггүй мэт.
Зохиогчийн эрх хуулиар хамгаалагдсан. Мэдээлэл хуулбарлах хориотой.