Ханиад их байгаагаас нийслэлийн эмнэлгүүд ачааллаа дийлэхгүй, орны хүрэлцээ муу байгаа. Ялангуяа бага насны хүүхдүүд томуугаар өвдөж, хатгаа болж хүндэрч буй талаар эмч нар сэрэмжлүүлж байна.
Хэдийгээр дулаарч байгаа ч ханиадны тархалт дорвитой буурахгүй байгаа аж. Хоногт 2500 орчим хүн ханиадаар эмнэлэгт хандан үзүүлж байна. Тухайлбал, Нийслэлийн эрүүл мэндийн газраас өгсөн мэдээллээр уржигдар нийслэлийн хэмжээнд 2410 хүн томуу, томуу төст өвчнөөр нэмж үзүүлжээ. Үүний 1200 нь 0-4 насны хүүхдүүд байсан гэнэ. Ханиадны тархалтын талаар Нийслэлийн эрүүл мэндийн газрын мэргэжилтэн Н.Мэндсайханаас зарим зүйлийг тодрууллаа.
-Хүүхдүүдийн дунд ханиад их байгаа гэсэн. Хэвтэн эмчлүүлж байгаа хүмүүсийн хэд нь хүүхэд байна вэ?
-Одоогийн байдлаар 1017 хүүхэд хэвтэн эмчлүүлж байна. Уржигдар 192 хүүхэд нэмж эмнэлэгт хэвтсэн. Одоо Сонгинохайрхан дүүрэгт 180, Сүхбаатарт 256, Хан-Уул дүүрэгт 136 хүүхэд тус тус хэвтэн эмчлүүлж байна. Гэхдээ ханиадны дэгдэлт бага зэрэг буурах хандлагатай байна. Өнгөрсөн хоёрдугаар сарын дундуур одоогийнхоос хоёр дахин их хүүхэд эмнэлэгт хэвтэж байсан. Тэр үеийг бодвол томуугийн дэгдэлт буурах хандлагатай байна.
-Эмнэлгүүд орны ачааллаа дийлэхгүй байгаа гэсэн. Байдал ямар байгаа вэ?
-Баянзүрх, Налайх, Багануур, Сонгинохайрхан дүүргийн нэгдсэн эмнэлэг ачаалал ихтэй, орны хүрэлцээ муу байна. Багануур дүүргийн эмнэлэг 115 хүн хэвтүүлэх ортой боловч өчигдрийн байдлаар 183 хүн хэвтэн эмчлүүлж байна. Налайх дүүргийн эмнэлэгт 85 хүн хүлээж авах ёстой ч одоогоор 185 хүн хэвтэж байна. Гэхдээ нэг орон дээр хоёр хүн хэвтээгүй. Ор нэмж гаргаад өвчтнүүдээ багтааж байна. Энэ тал дээр Онцгой байдлын газраас зохицуулалт хийж ор нэмж өгсөн. Баянзүрх дүүргийн нэгдсэн эмнэлэгт 254 хүн хэвтэх багтаамжтай ч 324 хүн ханиадны улмаас эмчлүүлж байгаа.
-Томуу туссан хүүхдүүд хурдан хүндэрч байгаа гэсэн. Эцэг, эхчүүд юуг анхаарах хэрэгтэй вэ?
Эцэг, эхчүүд бага насны хүүхдээ эмнэлэгт эрт үзүүлэхгүй, гэрээрээ эмчилж байгаад хүндрүүлэх тохиолдол их байна. Тиймээс ханиалгах, нус гоожих шинж тэмдэг илэрсэн хүүхдүүдийг яаралтай харьяа өрхийн эмнэлэгт үзүүлэхийг зөвлөж байна.
Зохиогчийн эрх хуулиар хамгаалагдсан. Мэдээлэл хуулбарлах хориотой.