Энэ үеэр Германы “Neue Burcher Zeitung” сонины Бээжин хот дахь сурвалжлагч доктор Петр Фишертэй цөөн хором ярилцсан юм.
-Сайн байна уу. Таны хувьд Монгол Улсын Ерөнхийлөгчийн сонгуулийн үйл явцыг хэрхэн дүгнэж байна вэ. Нэр дэвшигчдийн сурталчилгааг ажиглав уу?
-Миний хувьд сонгуулийн байдлыг сонирхохоос гадна танай улсын эдийн засгийн нөхцөл байдал, энэ тал дээр баримтлах бодлогод илүү анхаарал хандуулж байгаа. Мэдээж монголчуудын хувьд одоо Ерөнхийлөгчийн сонгууль болж байгаа нь их чухал цаг үе. Тэр дундаа байгалийн баялаг, уул уурхайн салбарт гадны улс орнуудтай гэрээ хэлэлцээ хийхээр яригдаж буй ийм үед дэлхийн бусад орнууд ч монголчууд хэнийг сонгож, ямар шийдвэр гаргах бол гэдгийг анхааралтай ажиглаж байна.
-Таны ажигласнаар монголчуудын сонголтын үр дүн юу байх ёстой вэ?
-Ерөнхийлөгчийн сонгууль болж байгаа энэ цаг үе өөрөө онцлогтой, чухал цаг юм. Учир нь дэлхий нийтээр эдийн засгийн хямралд ороод байна. Монгол Улсад ч энэ хямрал мэдрэгдэж байгаа шүү дээ. Тиймээс миний зүгээс сониныхоо уншигчдад үүнтэй холбоотой ямар мэдээлэл хүргэж болох вэ гэдгийг л сонирхож байна. Түүнээс гадна, нэг зүйлийг онцлоход Монголд ардчилал их хүчтэй байгаа нь ажиглагдлаа. Дашрамд хэлэхэд, би сүүлийн хоёр, гурав хоногт хөдөө яваад ирсэн. Их сайхан сэтгэгдэл төрсөн. Үнэхээр сайхан байгальтай орон юм. Улаанбаатар хот ч бас хөгжиж байгаа нь харагдлаа. Ийм цаг үед Монгол Улс байгалийн баялгаа хөрөнгө болгон ашиглаж чадна гэж найдаж байгаагаа хэлмээр байна.
Зохиогчийн эрх хуулиар хамгаалагдсан. Мэдээлэл хуулбарлах хориотой.