Энэ сард гадааын иргэн харъяатын асуудал эрхлэх газар Монгол улсад оршин суух, дамжин өнгөрөх, бүртгэл, хөдөлмөр эрхлэх журам зөрчсөн болон визийн хугацаа хэтрүүлсэн гадаадын 15 орны 101 иргэнд захиргааны арга хэмжээ авсан байна. Энэ нь өмнөх оны мөн үеэс 57,5 хувиар зөрчил буурсан үзүүлэлт гарчээ. Зөрчлийн байдлыг ангилж үзвэл дийлэнх буюу 45,5 хувь нь визийн хугацаа хэтрүүлсэн байна. Мөн гадаад улсаас урьсан иргэнээ зохих хугацаанд бүртгүүлээгүй, хууль бус хөдөлмөр эрхлүүлсэн, визийн хугацаа хэтрүүлсэн, нуун далдалсан зэрэг зөрчлийн улмаас 31 аж ахуйн нэгж, байгууллагад мөнгөн торгууль ноогдуулсан.
Энэ сард Газрын даргын баталсан “Гадаадын иргэний эрх зүйн байдлын тухай болон бусад хууль тогтоомжийн хэрэгжилтийг хангах удирдамж”-ийн дагуу Улаанбаатар хотын нутаг дэвсгэрт ажиллаж амьдарч байгаа БНСУ-ын иргэдийн бичиг баримтад үзлэг шалгалт хийсэн байна. Шалгалтад нийт 35 иргэн хамрагдснаас оршин суух зөвшөөрлийн хугацаа хэтэрсэн 15, эрх бүхий байгууллагын зөвшөөрөлгүй хөдөлмөр эрхэлсэн 2, оршин суух зөвшөөрөл хуурамчаар дарсан байж болзошгүй 1 иргэнийг тус тус илрүүлж зохих арга хэмжээг авчээ.
Тус газар нь иргэдээс ирүүлсэн мэдээллийн мөрөөр бас үзлэг шалгалтыг хийдэг. Энэ чиглэлээр 4 аж ахуйн нэгж байгууллага, оршин суух хаягаар шалгалт хийжээ. Шалгалтад гадаадын 31 иргэн хамрагдсанаас БНСУ-ын 2 иргэн эрх бүхий байгууллагын зөвшөөрөлгүйгээр хөдөлмөр эрхлэж байсныг илрүүлж, Захиргааны хариуцлагын тухай хуулийн дагуу арга хэмжээ авсан байна.
Монгол Улсад оршин суух хугацаа хэтрүүлэн, эрх бүхий байгууллагын зөвшөөрөлгүй хөдөлмөр эрхэлж байсан нь тогтоогдсон нийт 6 орны 12 иргэнийг албадан гаргаж, Монгол Улсад орохыг хориглосон дардас даржээ. Хувийн журмаар гадаадын иргэдийг урих хүсэлтийг хүлээн авч хянан 13 орны 158 иргэнд Монгол Улсад хувийн хэргээр зорчих урилга олгосон нь өмнөх оны мөн үеэс 2 дахин өссөн байна. Тус Газрын зөвлөгөө мэдээллийн төв 2000 орчим иргэнд зөвлөгөө өгч ажиллажээ.
Зохиогчийн эрх хуулиар хамгаалагдсан. Мэдээлэл хуулбарлах хориотой.