Монгол түмэн бяцхан хүүхдээр хурдны морь унуулаад, ямар ч тэнэг, аймшиггүй хүмүүс вэ хэмээн гадныхан дуу алддаг. Үнэндээ адуу гэх амьтныг номхон мэт санаж, нялх амьтдаар аз сорих явдал хэн хүнд нэгийг бодогдуулам билээ.
Саяхан хурдны морь унаач хүүхдүүдийн эрүүл мэнд, аюулгүй байдлын талаар холбогдох байгууллагууд хэлэлцлээ. Төр, засгаас гадна хүүхдийн чиглэлээр үйл ажиллагаа явуулдаг төрийн бус байгууллагууд, мэргэжлийн холбоо хамтран хурдны морь унадаг хүүхдийн тусгай зориулалтын хэрэглэл, хувцас, аюулгүй байдлыг хангах нөлөөллийн ажил хийж байгаа ч сайжруулах шаардлага зүй ёсоор гарч байна. Иймээс уяачид, унаач хүүхэд, эцэг эх, хүүхдийн эрхийн байгууллагын саналыг сонсох зорилгоор энэхүү уулзалтыг зохион байгуулжээ.
Нэг уралдаанд хоёр ба түүнээс дээш морь унаж буй хүүхдийн эрүүл мэнд, аюулгүй байдалд тавих хяналт муугаас хохирдог. Долоогоос доош настай хүүхдийг долоон настай хэмээн бүртгүүлдэг. Зарим уралдаан болоход даатгалд хамрагдсан хүүхэд дөнгөж 30 хувьтай байдаг төдийгүй нас барсан хүүхэд ч ослын даатгалгүй байдаг. Хүүхдүүд зайдан морь унаж уралддаг нь буурахгүй байгаа учир аюулгүй байдлыг хангах эмээл, хэрэгслийн стандарт бий болгож, заавал мөрдүүлэх шаардлагатай болжээ. Хурдан морь унаач хүүхдэд бөөрний болон гүйлсэн булчирхайн үрэвсэл жирийн хүүхэдтэй харьцуулахад түлхүү илэрч байгаа шалтгааныг ч тогтоох шаардлагатай юм.
Үндэсний их баяр наадам зохион байгуулах хорооны дарга, Монгол Улсын Шадар сайд М.Энхболд “Цаашид 7-гоос доош настай хүүхдийг хурдан морь унуулахгүй байх, даатгуулсан гэрчилгээг заавал үзэж байж бүртгэх. Хамгаалалтын малгай, цээживч, өвдөг, тохойны хамгаалалт, хүүхдийн гуталд таарсан хамгаалалттай дөрөөтэй эмээлээр хангах дүрмийг уралдаан бүрт мөрдүүлэх. Амжилт гаргасан хүүхдэд спортын зэрэг цол олгох. Хүүхдийн амь насны даатгалын доод хэмжээг тогтоох, хүүхдийг бэртэл гэмтэл авахаас сэргийлж зориуд мориноосоо унадаг байдлыг зогсоох. Нэг уралдаанд хоёр ба түүнээс дээш морь унаж буй хүүхэд мориноос унасан тохиолдолд дараагийн насны морь унуулахгүй байх. Гэмтэл болон гэмтлийн үед авах арга хэмжээний талаар уяач, хүүхдүүд, ар гэрийнхнийг нь сургалтад хамруулах, унаач хүүхдийг жилд 1-2 удаа эрүүл мэндийн үзлэг, шинжилгээнд оруулж хэвших чиглэлээр хийх ажил их байгаа” хэмээн хэллээ.
2009 оны эхний 8 сарын байдлаар Гэмтэл, согог, сэргээн засах клиникийн эмнэлэгт эмчлүүлсэн хүүхдийн 33 орчим хувь Улаанбаатар хотын, 67 хувь хөдөө орон нутгийнх байжээ. Тэдний 94 хувь хурдан мориноос унах үедээ бэртсэн, гурван хүүхэд унах үедээ мориндоо чирэгдсэн бол хоёр хүүхэд мориндоо гишгүүлж, нэг хүүхэд морьтойгоо машинд мөргүүлэн, томоохон уралдаанд морь унасан хоёр хүүхэд гавал, тархины гэмтлийн улмаас нас баржээ. Хурдны морь унаач хүүхдүүд гавал тархины гэмтэл, гарын яс хугарах, зөөлөн эдийн гэмтэл их авдаг нь судалгаагаар тогтоогдсон байна.
Боловсрол:Дэлхийн хэмжээний мэргэжилтэй монгол залуус Шинэхэн сурагчиддаа хичээлийн хэрэгсэл бэлэгллээЦагдаагийн мэдээлэл:Траншейнд амьдарч байсан иргэд нэгнийхээ амийг хөнөөжээ Цагдаагийн байцаагчидад сургалт явууланаОнцгой байдлын газрын мэдээлэл:105-аас мэдээллэж байна Он гарснаар 90 хүн усанд осолджээАвилгалтай тэмцэх газрын мэдээлэл:Төрийн үйлчилгээ хувь хүмүүсийн бизнес болж буйг таслан зогсоохоор[...] АТГ БНХАУ-ын Авлигаас урьдчилан сэргийлэхгазар хамтын ажиллагааны[...]Нийслэлийн мэргэжлийн хяналтын газар:Үдийн цай хөтөлбөрийн хүрээнд хүнсний 11 үйлдвэрт шалгалт явуулжээ Боловсролын байгууллагуудад хийсэн шалгалтаар 2585 зөрчил илэрчээ |
Зохиогчийн эрх хуулиар хамгаалагдсан. Мэдээлэл хуулбарлах хориотой.