-Харин үүнийг түрээслэгчид эсэргүүцэж байна-
Түм түжигнэж, бум бужигнах "Нарантуул" олон улсын худалдааны төвийг зорилоо. Сүүлийн үед тус газрын удирдлага, лангуу түрээсэлж буй иргэдийн хооронд үл ойлголцох байдал үүсээд байгаа билээ.
Өнгөрсөн долоо хоногт захын удирдлагууд түрээслэгч нарт бараагаа хийдэг модон авдрыг 120х80 см хэмжээтэй байх хэрэгтэй. Мөн төмөр дугуйгаар модон хайрцгаа түрэхийг хориглож байгаагаа мэдэгдсэн. Үүнийг түрээслэгчид эсэргүүцэн "бидний эрх ашгийг ноцтой зөрчиж байна. 10 гаруй жилийн өмнө л ганц удаа урсгал засвар хийсэн. Өмнө түрээслэгчид бидний мөнгөөр огт юм хийж байгаагүй. Энэ бол цэвэр бизнес хийх арга. Зохицуулагч нар бидний төмөр дугуйг хурааж авчихаад өгөхгүй байгаа. Мөн "Модон авдраа жижиг болгохгүй бол эндээс зайл" хэмээн дарамталж байгаа. Одоо энэ хавиар жижиг модон авдар хийсэн хүмүүс бидэнд 60 мянган төгрөгөөр зарах гээд явж байна" хэмээн бухимдангүй ярьж байлаа.
Энэ талаар НТОУХТ-ийн хяналт зохицуулалт хариуцсан дарга Д.Нарантуяагаас зарим зүйлийг тодрууллаа.
-Түрээслэгчдийн барааны авдарын хэмжээг шинэчлэхээр болсон тухай багагүй хэл ам гараад байгаа. Энэ талаар тодруулахгүй юу?
-Түрээслэгч, наймаачдын барааны авдар харилцан адилгүй хэмжээтэй байгааг нэг хэмжээтэй болгож, багасгахаар ажиллаж байна. Шинэ авдарны өргөн нь 80 см, урт нь 120 см байх ёстой юм. Энэ нь агуулахуудад чирэгдэл учруулахааргүй хэмжээ юм. Манай түрээслэгчдийн 30 гаруй хувь нь хэтэрхий том авдартай. Түүнийг л солих гэж байна. Зарим түрээслэгч үүнийг эсэргүүцэж байгаа ч энэ бол заавал хэрэгжүүлэх ёстой зүйл.
-Авдарны хэмжээнээс гадна дугуйнуудыг шинэчлэх гэж байгаа гэсэн. Нэг ширхэг дугуйг 7500 төгрөгөөр түрээслэгчдэд шахаж байгаа гэсэн?
- Жил бүр талбайд засвар хийдэг ч төмөр дугуйнаас болоод үр дүн муутай байдаг. Одоо хэрэглэж байгаа төмөр дугуйнууд хэрэглэхэд төвөгтэйгээс гадна дуу чимээ ихтэй, хамгийн гол нь асфальтан талбайг эвдээд байгаа учраас резинэн дугуйгаар солих санал тавьж байгаа. Резинэн дугуй шахсан явдал ерөөсөө байхгүй. Түрээслэгчид өөрсдөө тохирох резинэн дугуйгаа авч хэрэглэж болно" гэсэн юм.
-Танай ажилчид лангуу түрээсэлж буй иргэдийг авдраа жижиг болгохгүй бол эндээс зайл гэж хөөж байгаа талаар олон наймаачид хэлж байна?
-Ийм зүйл болоогүй. Харин наймаачид манай ажилчдыг хэл амаар доромжлох явдал олон гарч байгаа.
Лангуу түрээсэлж байгаа иргэдийн санаа бодлыг сонслоо.
10 гаруй жил лангуу түрээсэлж буй иргэн Б.Ханд: Авдарны хэмжээ багасгана гэдгийг дэмжихгүй байгаа. Түрээслэгч мөнгө төлөөд ажлаа хийж байгаа юм чинь бидний юунд юугаа хийх нь хамаагүй гэж бодож байна. Биднээс авдаг татварын мөнгөндөө ханахгүй дээр нь бизнес хийж байгаа арга. Хэчнээн дэмжихгүй гээд нэмэргүй юм байна. Орой тээшийг маань агуулахад хийхгүй гэхээр солихоос өөр аргагүйд хүрнэ биз дээ. Хэдэн ядарсан наймаачдаа энэ маягаар торгож байгааг ойлгохгүй байна.
Г.Баянсан: Ингэж жигдлэх цаг нь болсон. Одоо хүмүүс хийхгүй, хийнэ гэж байгаа ч яг хэрэгжүүлээд эхлэхээр бүгд хамрагдаж л таарна. Тиймээс энэ ажлаа хурдан эхлэх хэрэгтэй. Харин резинэн дугуйны хувьд ихээхэн асуудалтай байгаа. Заавал ширхэг дугуйг 7500 төгрөгөөр авах шаардлагагүй байх. Нэг тэргэнд дөрвөн дугуй орно гэхээр үнэтэй тусч байгаа юм. Түрээслэгчид өөрсдөө дугуйгаа зохицуулах нь зөв байх.
Б.Насаа: Авдарны хэмжээ их бага байлаа гээд ялгаа нь юунд байгааг мэдэхгүй байна. Авдарныхаа хэмжээний хэрээр хөлсийг нь төлөөд болоод байдгаас хойш. Манай авдарнуудын дугуйг хураагаад аваад явчихсан. Резинэн дугуй худалдаж авсныхаа дараа дугуйгаа аваарай гэсэн. Нэг авдарт 30,000 төгрөгөөр дугуй авч чадахгүй. Манайх гэхэд л гурван авдартай. 90.000 төгрөг дугуйнд зарцуулна гэдэг чанга байна. "Нарантуул" захын захиргааныхны зарж байгаа дугуйнаас хамаагүй дээр дугуй энд 2500-10.000 төгрөгийн үнэтэй байна лээ.
ӨРГӨТГӨЛИЙН НОГООЧДЫГ ЗОГСООХГҮЙ ГЭЖЭЭ
Нарантуул олон улсын худалдааны төвийн өргөтгөлийн павилионуудын хажуугаар байрлан зогсдог 20 гаруй ногооны лангууг С.Сайхансамбуугийн эхнэр "Захын өнгө үзэмжинд муугаар нөлөөлж байгаа учир наймдугаар сараас дээрх лангуунуудыг ажиллуулахгүй" гэжээ. Харин тэндэхийн лангуу түрээслэгчид Түрээсээ төлөөд, зааж өгсөн газарт нь зогсч байгаа учраас бидэнд айх юм алга. Биднийг энд зогсоохгүй боллоо гэхэд эргээд зогсох газар зааж өгөх байх" гэцгээж байв.
ТЭРЭГЧДИЙГ Ч ЦӨӨЛӨХ ГЭНЭ
Тэрэг түрж амьдралаа зогоож байгаа олон гэр бүл бий. Тэр тусмаа "Нарантуул" олон улсын худалдааны төвд 400 гаруй тэрэгчин байдаг. Тэд ч бас энэхүү шинэчлэлд өртөх гэнэ. Тэрэгчдийг том жижиг тэрэгтэйгээр нь ялгаж, агуулах бүрт гурван том тэрэг, таван жижиг тэрэг оноох аж. Тэдэнтэй гэрээ хийх бөгөөд гэрээ хийгээгүй тэрэгчид жагсаалаас хасагдах гэнэ.
Эдийн засаг:Хөрөнгийн биржийн менежментийн багийг гадаадынхан удирдах уу Тендерийн урилга: Бульдозерын Д-16 маркын сэлбэг нийлүүлэхЭнтертайнмент:Өнөөдөр бич өдөр Ажилд авна |
Цагдаагийн мэдээлэл:Бичиг баримтгүй хятад иргэд баригджээ Ногоон гэрэл - цагаан шугам” тэмцээн болноОнцгой байдлын газрын мэдээлэл:Тарваганд хазуулж тахал тусчээ Олон тооны зээр тодорхойгүй шалтгаанаар хорогдож байнаАвилгалтай тэмцэх газрын мэдээлэл:АТГ БНХАУ-ын Авлигаас урьдчилан сэргийлэхгазар хамтын ажиллагааны[...] БНХАУ-ын Авлигаас урьдчилан сэргийлэх газрын төлөөлөгчид манай[...]Нийслэлийн мэргэжлийн хяналтын газар:Үдийн цай хөтөлбөрийн хүрээнд хүнсний 11 үйлдвэрт шалгалт явуулжээ Боловсролын байгууллагуудад хийсэн шалгалтаар 2585 зөрчил илэрчээ |
Зохиогчийн эрх хуулиар хамгаалагдсан. Мэдээлэл хуулбарлах хориотой.