Сонгинохайрхан дүүргийн Сонсголонгийн ойролцоо цэрэг хувцастай хүн хувиараа такси эрхэлдэг иргэн 28 настай Н.Гантулгад хутга тулган, хоолойг нь зүсч автомашиныг нь дээрэмдэн зугтаажээ. Хохирогч хувийн эзэмшлийн УБН 27-62 улсын дугаартай Верна аксент машинтай 01 цагийн үед Сонсголонгийн ойролцоо явж байж. Цэрэг хувцастай хүн гар өргөн суугаад Зэвсэгт хүчний 013 дугаар ангийн хашаанд тулж ирээд амь насанд нь хүрхийг завджээ. Уг хэргийг Замын цагдаагийн газар, Нийслэлийн хөдөлгөөнт эргүүлийн газар болон Сонгинохайрхан дүүргийн Цагдаагийн хэлтэст шалгаж байгаа аж. Сонгинохайрхан дүүргийн цагдаагийн хэлтсээс тодруулахад өчигдөр жижүүрт гарсан цагдаагийн ажилтан "Манай дүүрэгт тийм хэрэг гараагүй" гэсэн юм. Хохирогч Н.Гантулга болон түүний ар гэрийнхэнд цагдаагийн зүгээс хоёр хоногийн хугацаанд ямар нэгэн мэдээлэл өгөөгүй байна. Сэжигтнийг барьж саатуулсан эсэх, ямар зорилгоор амь насанд нь аюул учруулсан талаар ямар ч мэдээлэл өгөөгүйд хохирогч гайхаж байсан юм. Бид хохирогч Н.Гантулгыг Гэмтэл согог судлалын заслын үндэсний төвд хэвтэн эмчлүүлж байхад нь очиж уулзсан юм. Тэрээр хагалгааны өрөөнөөс орон дээр түрүүлэн гарч ирсэн юм. Хүзүүний урд хэсэгтээ боолт хийлгэж, баруун гарынхаа долоовор хурууг битүү боосон байв. Эмч нар нь түүнийг их хүнд ирсэн. Өчигдөр хагалгаанд орсон. Өнөөдрөөс л бие нь бага зэрэг тэнхэрч байна гэв. Тэрээр хэвийн хэмжээнд ярьж чадахгүй, хоёр хоног юу ч идээгүй гэнэ.
-Танд халдсан хүн цэргийн дүрэмт хувцастай байсан юм уу. Яг юу болсон юм бэ?
-Тухайн өдөр шөнийн 01 цагийн орчимд Сонгинохайрхан дүүрэгт таксинд явж байсан юм. Нэг эмэгтэйг буулгачихаад явах гэтэл цэрэг хувцастай нэг хүн зөрөөд суучихсан. Сонсголон дөнгөж эргээд л тэр хүн "Ангийн хаалга гэрэлтэй байх шиг байна. Цаад талаар нь оръё. Бага даргаас чөлөө авчихсан чинь дуудаад болдоггүй" гэж хэлсэн. Тэгээд "Хашааны урдуур яв" гэхээр нь цементэн хашааны голд очоод зогстол "Замаа чөлөөлөөд зогсчих" гэсэн. Дөнгөж машинаа зогсоогоод, араагаа салгатал араас хутга тулгаад хоолойг минь зүссэн. Хоолойнд тулгасан хутгыг нь гараараа татаад бага зэрэг хөндийрүүлэхэд доош мултарснаар шууд зугтсан.
-Тэр хүн согтуу, хөлчүү байсан уу. Танд халдсан этгээдийг барьсан гэнэ үү?
-Эрүүл хүн шиг л санагдсан. Цагдаагийнхан хэрэгтнийг барьсан үгүй нь тодорхойгүй л байна. Бидэнд одоогоор мэдэгдсэн юм алга. Тэр хүн машин тэрэг барьж чаддаггүй хүн шиг байна лээ. Намайг зугтааж байх үед миний машинд хүчтэй хааз өгөөд л зогсоод байсан. Миний араас хөөсөн, үгүйг мэдэхгүй байна. Тэр хүн гадаас хэдэн цаас дээрэмдчихээд хөлдөө унаа дүүжилчих бодолтой байсан байх. Би өөрийгөө үхчихлээ л гэж бодсон. Тэндээс би зугтаагүй бол хүн алахаас сийхгүй хүн шиг санагдсан. Намайг магадгүй үхсэн гэж бодсон байх.
-Ойр хавьд чинь туслах хүн байгаагүй юм уу?
-Машин олдсон сураг сая сонсогдсон. Өнөөдрөөс л бага зэрэг сэхээ орж байна. Гэхдээ тэнд ойр байдаг манаач дээр үхлүүт очсон. Ойчих гээд нүд эрээлжлээд, толгой эргэсээр түргэн тусламж 103 дуудсан. Ар гэрийнхнээ дуудах гэхээр нэгжтэй хүн байгаагүй. Тэгээд шууд 103, 102 дуудсан. Сонсголон эзгүй газар юм чинь хүмүүс байгаагүй. Хамаг хувцас ув улаан болтлоо цусанд будагдсан байсан.
-Одоо таны биеийн байдал хэр байна?
-Эмэгтэйг буухад л зөрөөд орж ирсэн болохоор тэр хүний царайг нь санахгүй байна. Ямар ч байсан цэрэг хувцастай байсныг санаж байна. Эмэгтэйн өгсөн мөнгийг түрийвчиндээ цэгцэлж хийгээд хөдлөхийг л харсан байх. "Тийм юмаа өг, ингэ, тэг" гэж огт хэлээгүй. Арай гэж тэр хүний гараас алуулахаасаа өмнө зугтаж байгаа юм чинь. Хүн алахаас буцахгүй, шийдчихсэн байдалтай байсан. Энд ирснээсээ хойш ямар ч тэнхэлгүй байсан. Цус их алдаад цус тогтоодог тариа хийж байж гайгүй болсон. Одоо эм, тариа хийлгээд эмчлүүлж байна. Биднийг ийн ярихад түүний хоолой хатаад дуу нь ч гарахаа болив. Түүний сахиур болох эмэгтэй дүү нь ахынхаа ам руу цай халбагадан өгсөөр хоцорлоо.
Цагдаагийн мэдээлэл:Нэг өдөрт гурван хүн өөрийгөө боомилж нас баржээ 192 хүн эрүүлжүүлэгджээОнцгой байдлын газрын мэдээлэл:Галын аюулгүй байдлын шалгалт явуулжээ Нийслэл гал түймрийн таван дуудлагатай хоножээАвилгалтай тэмцэх газрын мэдээлэл:АТГ БНХАУ-ын Авлигаас урьдчилан сэргийлэхгазар хамтын ажиллагааны[...] БНХАУ-ын Авлигаас урьдчилан сэргийлэх газрын төлөөлөгчид манай[...]Нийслэлийн мэргэжлийн хяналтын газар:Үдийн цай хөтөлбөрийн хүрээнд хүнсний 11 үйлдвэрт шалгалт явуулжээ Боловсролын байгууллагуудад хийсэн шалгалтаар 2585 зөрчил илэрчээ |
Зохиогчийн эрх хуулиар хамгаалагдсан. Мэдээлэл хуулбарлах хориотой.