Өнгөрсөн хоногт Замын цагдаагийн газрын шуурхай удирдлагын төвд 80 дуудлага иржээ. Үүнээс зам тээврийн хэрэг гурав гарч таван хүн гэмтсэн байна. Өчигдөр өглөө Тасганы овооны уулзвар дээр Кремль маркийн 32-86 УБӨ дугаартай автомашин, Тавнаас маркийн 78-41 УБН дугаартай автомашинтай мөргөлдөж, 78-14 УБН дугаартай автомашины жолооч Б гэмтсэн байна.
Түүнчлэн Дорнод аймгийн Хэрлэн суманд хоёр автомашин мөргөлдсөнөөс хүний амь нас хохирсон хэрэг гарчээ. Уг осол Хэрлэн сумаас 12 км-т зайд гарсан бөгөөд 71-07 УБТ дугаартай автомашин Порт ер маркийн 44-65 ДОА дугаартай автомашинтай мөргөлдөж Порт явсан иргэн Х нас барсан байна.
Мөн өчигдөр Хэнтий аймгийн Жаргалант хаан сумаас баруун тийш 15км-т Вароо маркийн 92-85 УБЕ дугаарын автомашин онхолдож, жолооч, зорчигч хоёр нь газар дээрээ нас барсан харамсалтай хэрэг гарсан байна. Уг автомашинд 42-45 насны хүмүүс байсан гэнэ.
Дээрх хэргүүдийг аймгийн Цагдаагийн хэлтэс шалгаж байгаа аж. Тиймээс Замын цагдаагийн газраас жолооч нартаа хөдөө, орон нутгийн замд хурдаа тохируулан явахыг зөвлөж байна. Мөн урин дулааны цаг ирсэнтэй холбоотойгоор найз нөхөд, гэр бүлээрээ салхинд гарахдаа хурдаа тааруулан, согтууруулах ундааны зүйл хэрэглэсэн үедээ автомашин жолоодохгүй байхыг анхаарууллаа.
Г.Анир
Зохиогчийн эрх хуулиар хамгаалагдсан. Мэдээлэл хуулбарлах хориотой.