Хятадын Шинжаан дүүрэгт гарсан бослогын үеэр 156 хүн нас барж, 1000 гаруй хүн гэмтлээ гэж төрийн мэдээллийн агентлагаас өнөөдөр мэдээллээ. Мөн олон зуун хүн баривчлагдсан байна.
Өнгөрөгч бямба гарагаас эхлэн Шинжааны нийслэл Урумч хотод Уйгар үндэстнүүд бослого гаргаж эхэлсэн юм. Тэд тусгаар тогтнолыг хүсчээ. Өнөөдөр цагдаа нарын хүчээр тэднийг буулгаж авчээ. Эсэргүүцлийн үеэр олон машин шатаж, зам хаагдан эмх замбараагүй байдал үүсчээ. Жагсагчдыг баривчилсны дараа замыг цэвэрлэн, замын хөлөлгөөнийг хэвийн байдалд нь эргүүлэн оруулж, дэлгүүр хоршоодыг нээжээ.
Жагсаал үдшийн 5 цагийн үед хэдхэн хүнтэй эхэлж байсан ч төд удалгүй 1000 гаруй хүн болон өсжээ. Цагдаа нар ирж нулимс асгаруулагч хий , даралттай ус зэргийг хэрэглэж жагсагчидтай тэмцэлдсэн байна.
Шинжаан бол уйгуруудын нутаг. Хятад үндсэн хуулиараа цөөнх ястангуудыг тэгш эрхтэй байхаар хамгаалсан байдаг. Гэвч бага ястангуудыг хятадын гол үндэстэн болох Хан үндэстнээс ялгаж, гадуурхдаг, аливаа нийгмийн үйлчилгээнд хоёрдугаарт эрэмбэлэн тавьдаг гэж уйгурууд үзэн жагсаал гаргасан ажээ.
Жагсаалын үеэр нийтийн автобусны цонхыг хагалан, шил чулуу цагдаа нар луу шидэн, Хан үндэстэн гэж харагдсаныгаа дарлаж байжээ.
Орон нутгийн засаг захиргаа энэ бүхнийг Дэлхийн уйгур үндэсний холбоо болон тус байгууллагын тэргүүн Ребие Кадер зохион байгуулсан хэмээн буруутгасан байна. Хятадын эрх баригчид Ребие Кадерийг Далай ламын адил улс орныг тараан бутаргах гэсэн тэрс үзэлтэй хэмээн үздэг юм.
Дэлхийн уйгур үндэстний холбоо байгууллагаас үүнийг няцааж, буруушаасан байна. Тэд хятадын үндсэн хуулинд “Ард түмэн тайван замаар жагсаал цуглаан хийх эрхтэй” гэдгийг дурдаж иргэдийн олноор нь а лсан, хэдэн зуун хүмүүсийг гэмтээсэн ,баривчилсныг эрс буруушааж байгаа юм.
Зохиогчийн эрх хуулиар хамгаалагдсан. Мэдээлэл хуулбарлах хориотой.