Ерөнхийлөгчийн сонгуулийн хөзрүүд ил гарч байна. МАХН гарааны зурхайгаас эргэхдээ мартсан юмаа санасан аятай “Яагаав нөгөө Эх орны хишиг сая 500 мянган төгрөгөө өгье байз” гээд мордоод давхичихав. Тэгээд л нэр дэвшигч Н.Энхбаяр нь “Ерөөсөө иргэн бүрт сая 500 мянган төгрөгөө өгчихье. Та нар ч ав” гээд нэг их эрх мэдэлтэй хүн шиг ярьж яваа. Түүний амлалтыг үнэн юм шиг харагдуулахын төлөө нам нь Монголын төрд жүжиг тоглоно доо. Засгийн газар хуулийн төсөл боловсруулж УИХ-ын чуулганд өргөн барина. УИХ түүнийг нь хэлэлцэж байгаа дүр үзүүлэн байнгын хороодоо хуралдуулж түүнийгээ хэвлэл мэдээллээр сурталчилж таарна. Хариугүй өгчих гэж байгаа юм шиг горьдлого төрүүлээд санал хураалт явагдсаны маргааш “Тоглосон юм” гэх вий. Өмнөх жүжгүүд ийн өрнөж манай сонин сэрэмжлүүлж байсан билээ. Одоо ч гэсэн дахин нэгэнтээ санаалъя.
Хууралт 1
С.Баяр МАХН-ын дарга болж намаа сонгуульд заавал ялуулна гэсэн амлалт өгөв. Тэгээд эхний хууралтаа шатахууны үнийг долдугаар сарын 1 хүртэл нэмүүлэхгүй гэсэн. Дөрвөн дугуйтай юм унадаг бүхэн л баярлаж бас хууртсан юм даг. Төд удалгүй ОХУ-аас Монголын газар нутаг дээр 100 шатахуун түгээх станц барих санамж бичиг нь илэрч шуугиан дэгдээв. Нууц хийх ёстой байсан гэрээ нь илэрсэнд сандарсан сайд “Ийм юм байхгүй Энэ бол гүтгэлэг” гэж мэдэгдэв. Харамсалтай нь эл бичиг үнэн байсан нь батлагдаж оросууд уурандаа шатахууны үнийг нэмсэн билээ. С.Баярын Засгийн газрын 100 хоногийн баярт ах нар нь шатахууны үнийг хөөрөгдөж бэлэг барьсан билээ.
Хууралт 2
Шатахууны үнийг барьж чадаагүйдээ бантсан Ерөнхий сайд экологийн хүйтэн дайныг эхлүүлэв. Түүнийгээ “Атрын III аян” гэж нэрлэлээ. Хамгийн үнэтэй үед нь худалдан авсан улаан буудайгаа Монголын хөрсөнд авчирч суулгалаа. Харамсалтай нь тарьсан жаахнаа хураагаад хурааснаа хадгалах газар байсангүй. Нэгэнт л улаан буудайг нь асар үнэтэй авсан болохоор ургасан ургацаа үнэтэй борлуулах хэрэгтэй болов. Гэвч борлуулалт хийх үеэр улаан буудайн ханш унасан болохоор тарианы үнэ дагаад уналаа. Ингээд л агуулах ч газаргүй зарагддаггүй ургац илжрэх нь илжирч үрэгдээд дуусав аа. Анх энэ аяныг эхлүүлэхээс нь өмнө эрдэмтэн мэргэд бүтэхгүй ажил гэдгийг нь сануулж байгаль дэлхийд халгаатай гэж хичнээн номлоод ч дийлээгүй билээ. Гэвч “Атрын III аян” хэмээх тэр үйл ажиллагаа экологийн хүйтэн дайны тэмдэглэл болж үлдсэн юм.
Хууралт 3
Засгийн газар аргаа барахдаа малчдаас ноолуурыг нь килограмм бүрийг нь 35мянган төгрөгөөр худалдаж авна хэмээн амлаж, тэр амлалтаа УИХ-аар баталгаажуулав. Малчид МАХН-ын төлөө саналаа өгчих л юм бол ноолуураа тэнгэрт хадсан үнээр зарах нь гэж итгэлээ. Тиймээс аль хавар борлуулчихдаг ноолуураа сонгууль өнгөртөл дарлаа. Ингээд МАХН сонгуульд ялав. Гэвч ноолуурын үнэ арван хэдхэн мянган төгрөг болж голыг нь харлуулав. Чөлөөт эдийн засагт Засгийн газар тэр тусмаа аль нэг нам үнэ барьдаггүй юм гэдгийг ийнхүү амьдрал дээр нотолж өгөв. Эдийн засагчид энэ байдлыг урьд өмнө сануулсан ч ард түмэн гэдэг хууртсан хойноо ойлгодог ажээ.
Хууралт 4
С.Баяр намын гишүүндийнхээ өмнө хүлээсэн үүргээ биелүүлэхийн тулд ямар ч үнээр хамаагүй УИХ-ын сонгуульд ялах хэрэгтэй байлаа. Ингэхийн тулд яах ёстой вэ. Шударга үнэнээр санал хураавал зайлшгүй ялагдана. Тиймээс ард олныхоо саналыг худалдан авахаар шийдсан байх. Ингээд “Эх орны хишиг” болгож иргэн бүрт өгөх нэг сая 500 мянган төгрөгийн батламжийг тараав. Түүнд итгэсэн хүмүүс “Хаан” банк-ны гадаа дугаарлаж байлаа. Ердөө л сонгуулийн маргааш өгчих юм болж ард түмэн ч түүнд нь итгэсэн. Итгэсэн ардууд хамаг малаа барьцаанд тавьж зээл аваад яалаа. Морин дэл дээр дарцаглаж явсан монгол эр хүн хоосон амлалтад хууртаж амин зуулга болсон малаа банкны өрөнд хураалгаад “молтов” хийж амиа хорлосон байж билээ. Ерөнхий сайд С.Баяр ч гэсэн Эх орны хишгийг өгч чадахгүй улс оронд хямрал болж байна гэсэн атлаа Ерөнхийлөгчийн сонгууль эхэлмэгч өнөөхөө дахиад л яриад эхлэв.
Иймэрхүү л хууралт худал амлалтаар дүүрэн хоёр он улирч УИХ болон орон нутгийн сонгуульд МАХН ялжээ. Одоо тэд дахин ард түмнээ хуурахаар зэхэж худал амлалтаа өгч эхэллээ. Худал хуурмаг бүхний өмнө манай сонин сануулдгаараа сануулав.
Боловсрол:Дэлхийн хэмжээний мэргэжилтэй монгол залуус Шинэхэн сурагчиддаа хичээлийн хэрэгсэл бэлэгллээЦагдаагийн мэдээлэл:Траншейнд амьдарч байсан иргэд нэгнийхээ амийг хөнөөжээ Цагдаагийн байцаагчидад сургалт явууланаОнцгой байдлын газрын мэдээлэл:105-аас мэдээллэж байна Он гарснаар 90 хүн усанд осолджээАвилгалтай тэмцэх газрын мэдээлэл:Төрийн үйлчилгээ хувь хүмүүсийн бизнес болж буйг таслан зогсоохоор[...] АТГ БНХАУ-ын Авлигаас урьдчилан сэргийлэхгазар хамтын ажиллагааны[...]Нийслэлийн мэргэжлийн хяналтын газар:Үдийн цай хөтөлбөрийн хүрээнд хүнсний 11 үйлдвэрт шалгалт явуулжээ Боловсролын байгууллагуудад хийсэн шалгалтаар 2585 зөрчил илэрчээ |
Зохиогчийн эрх хуулиар хамгаалагдсан. Мэдээлэл хуулбарлах хориотой.