АНУ-ын Ерөнхийлөгч Барак Обама өнөөдөр өөрийн сонгуульд ялж ирэхэд гол түлхэц өгсөн “Эрүүл мэндийн шинэчлэл” хөтөлбөрийнхөө тухай илтгэл тавьлаа. Тэрээр “эрүүл мэндийн салбарыг шинэчлэх нь Америкийг тэр чигээр нь өөрчилж чадахгүй нь мэдээж, гэхдээ ямар ч өөрчлөлт сайн зүйлийг авчирдаг” гэж хэлжээ.
Обама хэвлэл мэдээллийн томоохон хурал зарлаж ийн өөрийн хөтөлбөрөө сурталчилсан байна. Обамагийн хэлснээр бол энэ хурлаар түүний саналыг хурцаар шүүмжилж байгаа Бүгд Найрамдахчуудад хариу өгөхийн сацуу Вашингтонд эрүүл мэндийн салбарын талаар халуун маргалдаж талцаад буй хүмүүсийн санааг тайвшруулах аж.
Түүнийхээр одоогийн ажиллаж буй эрүүл мэндийн салбарын бүтэц, түүнд гаргаж буй зардал Америк орныг дампууруулж байгаа гэнэ. Эрүүл мэндийн салбарын зарим шинэчлэл даатгалын компаниуд болон засгийн газраар гүйцэтгэгдэж эхлээд байгаа гэнэ.
Хэвлэлийн хурлын эхэнд, тэрбээр энэ жилийн сүүл гэхэд эрүүл мэндийн эмчилгээний үнийг багасгах, өвчтөнүүдэд боломжийн үнэтэй эмчилгээний олон сонголтыг бий болгох эрүүл мэндийн шинэчлэлийн төлөвлөгөөгөө хэрэгжүүлэх болно гэдгээ амлажээ.
Өнөөдөр АНУ-д 47 сая хүн эрүүл мэндийн даатгалгүй байдаг бөгөөд эрүүл мэндийн үйлчилгээний үнэ өссөөр байгаа нь төсвийн алдагдлын гол хүчин зүйл болж байгаа билээ. Тиймээс ч Барак Обама Конгрес болон Төлөөлөгчдийн танхимын гишүүдэд эрүүл мэндийн тогтолцоог шинэчлэх хуулийг ирэх сарын эхний долоо хоног гэхэд батлахыг уриалж байгаа агаад Конгресоор батлуулсны эцэст л тэрээр хамгийн сүүлийн хувилбараар, нэгдсэн хуулийн төсөлд гарын үсгээ зурж, аравдугаар сараас хэрэгжүүлж эхлэх боломжтой болох юм.
52 минут үргэлжилсэн хэвлэлийн төгсгөлд Обама энэ хуулийн төслөө нарийвчлан танилцуулж олон хүмүүсийн дэмжлэгийг авна гэдэгтээ итгэлтэй байгаагаа хэлж байсан.
Зохиогчийн эрх хуулиар хамгаалагдсан. Мэдээлэл хуулбарлах хориотой.