Засгийн газрууд нь эдийн засгийн хямралын асуудлыг шийдвэрлэх талаар хангалттай хүч чармайлт тавихгүй байна хэмээн дэлхийн олон иргэд үзэж байна. «Уорлд паблик опинион» дэлхийн 19 оронд явуулсан олон нийтийн санал асуулга үүнийг харуулав.
Засгийн газар хямралын эсрэг тэмцэхийн тулд бараг бүх боломжтой арга хэмжээ авч байна гэж ердөө таван орны оршин суугчид үзжээ.
Засгийн газар эдийн засагт үүссэн асуудлыг шийдвэрлэхийн тулд «бүх зүйлийг зөв хийж байна» гэж АНУ-д санал асуулгад оролцсон хүмүүсийн 31 хувь нь хэлжээ. Цагаан ордон «бараг бүх ажлыг» зөв хийж байна хэмээн бас 15 хувь нь үзэж, тус орны удирдлага эдийн засгийн байдлыг сайжруулахын тулд хавьгүй их ажил хийж чадна гэдэгт америкчуудын 44 хувь нь итгэлтэй байна.
Мексикчүүдийн 67, украинчуудын 85, польшуудын 72, британичуудын 58, францчуудын 53, Германы оршин суугчдын 40 хувь нь хямралыг гэтлэн давахад өөрсдийнх нь засгийн газрын үйл ажиллагаа хангалтгүй хэмээн үзжээ. Ойрхи болон Дундад Дорнодын эдийн засгийн салбарт удирдлагынхаа явуулж буй үйл ажиллагаанд дургүйцэж буй хүмүүс Ирак, Туркт бусдаас олон буюу дарааллын журмаар 58, 55 хувь байна. Египетэд үүнээс арай цөөн буюу 46 хувь нь сэтгэл дундуур явдагаа мэдэгджээ.
Энэ санал асуулгыг бас явуулсан Азийн орнуудад засгийн газрын зүгээс хямралын талаар илүү хатуу бодлого баримтлах ёстой гэж Өмнөд Солонгосын оршин суугчдын 80 хувь нь хүсч байна. Энэ орны удирдлага эдийн засгийн байдлыг сайжруулахад хангалттай арга хэмжээ авсан гэж тус оронд санал асуулгад хамрагдсан хүмүүсийн 16 хувь нь л үзжээ.
Ингэхдээ Энэтхэг, Хятадын олонхи оршин суугч засгийн газрынхаа үйл ажиллагаанд сэтгэл дүүрэн байна. Хоёр орны засгийн газар эдийн засгийн ажил төрлийн байдлыг сайжруулахын тулд «бүрнээ хангалттай» ажиллаж байгаа юмуу «бараг бүх арга хэмжээ» авч байна гэж Энэтхэгийн оршин суугчдын 58, Хятадын хүн амын 74 хувь мэдэгджээ.
Гэвч энэ хоёр улс 2009 онд дотоодын нийт бүтээгдэхүүн нь өснө хэмээн шинжээчдийн таамаглаж буй тэр цөөхөн орны тоонд багтаж байгааг «Уорлд паблик опинион» албаны мэргэжилтнүүд тэмдэглэсэн байна.
Зохиогчийн эрх хуулиар хамгаалагдсан. Мэдээлэл хуулбарлах хориотой.