2009 оны Азийн топ загвар өмсөгч шалгаруулах тэмцээн өнгөрсөн сарын 26-нд Хятадын Гуанши мужийн Нань Нин хотод болж өнгөрчээ. Хятадын загвар зохион бүтээгчдийн нийгэмлэг, Гуаншигийн телевизээс хамтран зохион байгуулсан уг тэмцээн багагүй хугацаанд үргэлжилсэн бөгөөд финалын шалгаруулалт нь 26-нд болсон аж. Харин уг тэмцээнд Монгол улсаа төлөөлөн оролцсон О.Уянга дэд байр эзэлжээ. БНХАУ, Япон, БНСУ, Монгол, Сингапур, Вьетнам, Малайз, Филиппин, Тайланд, Энэтхэг зэрэг Азийн орнуудын загвар өмсөгчдөөс Монгол бүсгүй ийнхүү аман хүзүүдсэн байна. Уг тэмцээний тэргүүн Хятад бүсгүй Жан Жүэ эзэлжээ. Харин гуравдугаар байрт Солонгос загвар өмсөгч Чуань Шин шалгарсан аж. Энэ талаар “Синьхуа” агентлаг мэдээлсэн бөгөөд О.Уянгатай холбоо барих гэсэн боловч болсонгүй. Тэрбээр эх орондоо хараахан ирээгүй байгаа бололтой. О.Уянга нь “Гоёл-2009”-ийн топ модель өргөмжлөлт, “Miss Mongolia 2006”-ийн загвар өмсөгч мисс өргөмжлөл хүртэж байсан нэгэн юм. Тэрбээр ХИС-ийг олон улсын сэтгүүлч мэргэжлээр дүүргэсэн билээ. Түүнчлэн “Шүрэн бугуйвч” киноны гол дүрд тоглосноор жүжиглэх авьяастай гэдгээ нотолсон гэж болно.
Зохиогчийн эрх хуулиар хамгаалагдсан. Мэдээлэл хуулбарлах хориотой.