Баянзүрх дүүргийн XIV хорооны нутаг дэвсгэрт үйл ажиллагаа явуулдаг “Semon” бааранд уржигдар орой үл таних этгээд газ цацаж, үйлчлүүлэгчдийг хордуулсан байна. Тус бааранд 70 орчим хүн үйлчлүүлж байсан аж. Химийн бодисноос болж хоёр хүн татаж, ухаан алджээ. Энэ тухай дуудлага Нийслэлийн Онцгой байдлын газрын дэргэдэх “Шуурхай бүлэг-105”-д уржигдар 23.17 цагт ирсэн байна. Тэднийг очиход нөхцөл байдал ямар байсан талаар 105-ынхнаас лавлахад “Биднийг очихоос өмнө уг бааранд дүүргийн цагдаа ирчихсэн, үйлчлүүлэгчид нь гадаа зогсоцгоож байсан. Баарны хаалгыг дэлгэсэн болохоор дотор ямар ч химийн бодис үнэртэхгүй байсан л даа. Тэгээд газанд хордсон хоёр хүнийг Хордлогын үндэсний төвд хүргэсэн. Ерөнхийдөө үйлчлүүлэгчид газанд хордоод амьсгаа нь давхардсан байсан” гэв. Өвчтөнүүдийн биеийн байдлыг тодруулахаар Хордлогын үндэсний төвд өчигдөр очлоо. Гэтэл тэднийг хүлээн авсан эмч нь ээлжнээсээ буучихсан байв. Тасгийнх нь эмч “Газанд хордож ирсэн хүмүүст эмнэлгийн тусламж үзүүлсэн. Тэд эмнэлэгт хэвтэн эмчлүүлэх шаардлагагүй байсан болохоор зөвлөгөө өгөөд гэрт нь хариулсан” гэлээ. “Semon” баараар үйлчлүүлсэн оюутан У-гаас зарим зүйлийг тодрууллаа.
-Юу болсон талаар ярьж өгөхгүй юу?
-Миний хувьд тус бааранд ороод дөнгөж 15 минут болоод л хордоод гарч ирсэн. Уянгын ая явж, бүжгийн талбайд хосууд бүжиглэж байтал газ үнэртээд хоолой гашуун оргиж, нүднээс нулимс гоожсон. Тухайн үед 23 цаг өнгөрч байсан. Тэгээд бааранд байсан хүмүүс шуугилдан, сандраад бүгд гадаа гарцгаасан. Гэтэл баарны хамгаалагчид гаднах төмөр хашлаганыхаа хаалгыг бариад нэг ч хүн гаргаагүй. Удаа ч үгүй цагдаа ирсэн.
-Хаанаас газ цацсаныг мэдсэн үү?
-DJ-нийх нь тэр орчмоос газ гарсан болов уу. Надаас гадна олон хүн хордож, бөөлжиж байсан. Бүр хоёр хүн ухаан алдаж унаад, татсан. Би Анагаахын дээд сургуулийн дөрөвдүгээр курсийн оюутан л даа. Тэгээд тэр хоёр хүнд анхан шатны тусламж үзүүлээд, 103-д дуудлага өгсөн. Гэтэл олон хүн цугларсан газар манайхаас очихгүй гэсэн л дээ. Би ч гайхаад “Юу гэсэн үг вэ. Энд хүний бие муу байхад яагаад ирэхгүй байгаа юм бэ” гээд уурласан ч тоогоогүй. Харин ч намайг доромжилсон.
- 103-ынхан авч хэлэлцээгүй гэсэн үг үү?
-Тиймээ. Дараа нь 105-д дуудлага өгөхөд онцгойгийнхон хурдан ирсэн. Тэднийг ирэнгүүт л үйлчлүүлэгчдийг тараачихсан.
-Тэр баарны үйлчлүүлэгчид хэд орчим насныхан байсан бэ?
-Голдуу оюутнууд байсан. Баарныхны ярьснаар ”Хэсэг залуу тооцоогоо хийхгүйн тулд газ цацаад зугтчихлаа” гэж байсан л даа.
-Та нар тооцоогоо хийсэн үү?
-Хийлгүй яахав. Зөөгч нь биднийг сууж байхад ширээнүүдээс тооцоогоо аваад л гүйгээд байсан ш дээ. Гэтэл удалгүй газ үнэртээд хүмүүс амьсгалахын аргагүй болоод бужигнацгаасан. Уг нь тэр баарныхан үйлчлүүлэгчдийн дунд бүжгийн тэмцээн зохион байгуулсан юм. Тэмцээнд түрүүлсэн болон тусгай байранд орсон хүмүүсийг архи, пивоор урамшуулсан. Шагнал авсан хүмүүс тэрийгээ ч ууж амжаагүй. Иймд баарныхан үйлчлүүлэгчдээ тараах зорилгоор газ цацсан байх талтай гэж ярих хүмүүс ч байсан. “Semon” баар руу өчигдөр 15 цагийн үед очиход ажиллаж байлаа. Баарны бармен, зөөгч нараас болсон явдлын талаар асуухад “Бид нар уржигдар ажиллаагүй болохоор юу болсныг мэдэхүй байна” гэв. Ингээд зохион байгуулагч н.Амараас зарим зүйлийг тодрууллаа.
-Юу болсон юм бэ?
-Би одоо л ажилдаа ирж байна. Газ цацах үед байгаагүй болохоор сайн мэдэхгүй байна. 40 мянган төгрөгийн тооцоотой байсан залуус газ цацаад зугтаад гарсан гэж таамаглаж байгаа.
-Үйлчлүүлэгчдийг орж ирэхэд танай хамгаалагчид шалгадаггүй хэрэг үү?
-Шалгадаг. Ноцтой зүйл байгаагүй гэсэн. Цагдаа нар ирээд нэгжлэг хийхэд ямар нэг сэжигтэй юм илрээгүй юм билээ. Тэгээд тооцоо дутуу байсан залуусыг шалгаахад бас л сэжигтэй зүйл илрээгүй болохоор явуулчихсан байна лээ.
-Газ цацахаас өмнө танайх үйлчлүүлэгчдээс тооцоогоо авсан гэсэн. Иймд тэднийг тараах зорилгоор өөрсдөө газ цацсан гэх мэдээлэл байна?
-Орлогоо бодоод юу гэж үйлчлүүлэгчдээ хөөж явуулах билээ дээ. Хэн нэгэн газ цацсанаас болж манайх 100 орчим мянган төгрөгийн тооцоогоо алдсан байна лээ.
М.МӨНХЦЭЦЭГ
Зохиогчийн эрх хуулиар хамгаалагдсан. Мэдээлэл хуулбарлах хориотой.