Эрүүл мэндийн сайд С.Ламбаа. Тэрээр 1976 онд инженер эдийн засгийн факультетийг тээврийн эдийн засагч мэргэжлээр дүүргэж МУИС-ийн Улс төр эдийн засгийн ухаан /УТЭЗУ/-ы тэнхмийн багшаас ажлын гараагаа эхэлжээ.
-Бид маш өргөн хүрээнд хөрвөх нөхцөл боломжтой мэргэжил эзэмшсэн энэ салбарт нэг талаасаа эдийн засагч, нөгөө талаасаа автотээврийн инженер, мэргэжлийн хувьд автотээврийн төлөвлөгч зохион байгуулагч. Ямар сайндаа ангиа “хүнс барааны дэлгүүр” гэж хошигнон нэрлэж байхав. Миний хувьд би төгсөөд л багш болж капитализмын улс төр эдийн засгийн ухаан, эдийн засгийн сургаалийн түүх заасан. Г.Чилхаасүрэн багш тэнхмийн эрхлэгч байлаа. Л.Гүржав, Н.Цэнд гээд энэ салбарын багш нарын зааж байсан хичээл одоогийн менежмент, маркетнигийн хичээл байсан. Мэргэжлийн маань багш П.Санги-Очир. Сайн багш байсан даа. Түүний лекцийг сонссон хүн сонирхохгүй байхын аргагүй тийм л багш. Ер нь оюутан цагт олж авсан мэдлэгээрээ л өдий зэрэгтэй яваа.
Манай ангийнхны хувьд их чадалтай, хүчтэй хүүхдүүд байсан. Манай салбарт 13 хүүхэд л сурч байсан. Тэднээс М.Далайхүү, Д.Баярсайхан, Ч.Жумба надтай нийлээд дөрөв нь Архангайнх байсан. Бидэнд хамгийн хэцүү хичээл математик байсан шүү. Инженер эдийн засгийн анги учраас математикийг дөрөв, таван жил үзсэн. Яг үнэнийг хэлэхэд амьдрал дээр дээд тоо, диференциаль тэгшитгэл гээд ерөөсөө хэрэглээгүй. Гэхдээ цаанаа хүний сэтгэлгээг задалж өгч, оюуны задаргаа хийлгэж байж гэж боддог. Аливааг задалж сэтгэдэг, нааш, цааш нь хувилбарууд хийдэг, нэг хэвийн загвараар хардаггүй болгодог юм байна. Ер нь математикт дөнгүүр байсан нь их сайн яваад байх шиг санагддаг. Политэконом /УТЭЗУ/-ийн хичээл капитализм, социализм гээд хоёр хэсэгтэй орох. Капитализмын УТЭЗУ-г Осор багш заадаг. Тухайн үедээ хол түрүүлсэн хүн байсан даа. Марксын Капитал зохиолыг бүрэн орчуулчихсан. Тэр гар бичмэлүүдийг нь бид уншиж байсан нь намайг энэ хичээлд их сонирхолтой болгосон байх. Би багш болонгуутаа л капитализмын УТЭЗУ заасан. Энэ утгаараа улс орон зах зээлийн тогтолцоо руу орсон ерээд онд арай өөр сэтгэлгээтэй хандаж байсан. Бидний энэ сургуулиас авсан бас нэг чухал зүйл бол оюутны эрдэм шинжилгээний ажил. Би гэхэд л хоёр удаа алтан медаль авч байсан. Энэ бол манай Ц.Далай, Б.Цэрэндорж, Хаймчиг гээд манай эрдэмтэн багш нарын маань школ байсан.
Энэ бүгдийг яагаад дурсаад байна гэхээр, хүнд төлөвшүүлээд өгсөн боловсролын суурь тэр хүнийг аваад явж байна. Манай тэнхмийнхэн Да.Ганболд, Б.Эрдэнэсүрэн, Д.Батсүх агсан гээд бүгдээрээ л улс төрч болсон доо.
Санасан бодсоноо чөлөөтэй солилцдог, ямар ч асуудлаар төвөггүй харьцдаг энэ бүхэнд миний багш нар, инженер эдийн засгийн өргөн мэдлэг нөлөөлсөн. Би сургуулиараа үнэхээр бахархаж явдаг.
Зохиогчийн эрх хуулиар хамгаалагдсан. Мэдээлэл хуулбарлах хориотой.