МҮОНТ-ийн Залуучууд цэнгээнт нэвтрүүлгийн алба, Монголын Оюутны Холбоо хамтран залуусын авхаалж самбаа, оюун ухаан, уран сэтгэмжийг сорьсон “АСК” уралдаант, цэнгээнт нэвтрүүлгийг бэлтгэн хүргэх гэж байгаа ажээ. Энэ төрлийн нэвтрүүлэг 1971 оноос 1980-аад оныг хүртэл Монгол телевизээр “АСК” буюу “Авхаалжит сэргэлэнчүүдийн клуб” нэртэй Монголын оюутан, залуусыг оролцуулдаг уралдаант, цэнгээнт нэвтрүүлэг явдаг байсан байна.
Тиймээс энэ уламжлалыг сэргээн орчин үеийн хийц хэлбэр, залуусын сонирхолд нийцүүлэн нэвтрүүлгийг шинэчлэн, өөрчилж Америкийн шоу нэвтрүүлгийн зарчмаар танин мэдэхүйн шоуг үндэсний хэмжээнд оюутан, залуусын дунд зохион байгуулах гэж байгаа ажээ. “АСК” уралдаант нэвтрүүлэг нь залуусын чөлөөт цагийг сонирхолтой болгох, эзэмшиж байгаа мэргэжил болон сурч байгаа сургуулиа сурталчилж, урлагийн тоглолт, авхаалж самбаа, мэдлэг чадвараараа бусад их, дээд сургуулийн оюутан залуустай өрсөлдөн авъяас билгээ нээхэд оршино. “АСК” уралдаант, цэнгээнт нэвтрүүлэг нь жил бүр шилдэг багийг шалгаруулах бөгөөд шагналын сан 10.000.000 төгрөг юм байна.
Зохиогчийн эрх хуулиар хамгаалагдсан. Мэдээлэл хуулбарлах хориотой.