Шивээ-Овоогийн орд газрыг түшиглэн нүүрсний уурхай, цахилгаан станцын цогцолборыг барихтай холбогдуулан төслийн өгөөж, үр ашгийг тооцох, хамтын ажиллагааны хэлбэрийг тодорхойлох, бүтээн байгуулалт, дэд бүтцийн асуудлыг шийдвэрлэсэн байна. Уг төслийн ажлыг эрчимжүүлэхэд шаардлагатай шийдэл гаргах, холбогдох гэрээ хэлэлцээр байгуулахад хууль эрх зүй, нийгэм, байгаль орчин болон эдийн засаг, хураамжийн асуудлаар санал дүгнэлт гаргажээ. Уг саналын дагуу асуудлыг хэлэлцээд ажлын хэсэг байгуулах тухай Ерөнхий сайдын захирамж гаргахаар шийдвэрллээ. Үүнд :
1 Улсын Их Хурлын гишүүн Н.Энхболд, Р.Гончигдорж нарын санаачлан боловсруулсан Монгол Улсын Их Хурлын чуулганы хуралдааны дэгийн тухай хуульд болон Үндсэн хуулийн цэцэд маргаан хянан шийдвэрлэх ажиллагааны тухай хуульд нэмэлт, өөрчлөлт оруулах тухай хуулийн төслүүдийг хэлэлцэн зарчмын хувьд дэмжиж, Засгийн газраас өгөх санал, дүгнэлтийг уламжлахаар тогтов.
2 Улсын Их Хурлын гишүүн Г. Батхүүгийн санаачлан боловсруулсан Газар тариалангийн бүс нутаг тогтоох тухай хуулийн төслийг хэлэлцээд энэ асуудлыг Газрын тухай хуульд байгаль орчин, нийгэм, эдийн засгийн нөхцөл байдлыг харгалзан газар тариалангийн бүс нутаг тогтоох, бүсэд хэрхэн бэлчээрийн мал аж ахуй эрхлэх болон ашиглах, хамгаалах тухай зүйл, заалт нэмж оруулах замаар шийдвэрлэх нь зүйтэй гэж үзэж төсөл санаачлагчид нь уламжлахаар боллоо.
3 Монгол Улсын төрөөс цацраг идэвхт ашигт малтмал болон атомын эрчим хүч ашиглах талаар баримтлах бодлого, түүнийг хэрэгжүүлэх хөтөлбөрийн төслийг хэлэлцээд УИХ-д өргөн барихаар тогтов.
4 Захиргааны хариуцлагын тухай хуулийн заалтыг үндэслэн “Цөмийн болон цацрагийн улсын хяналтын албаны дүрэм”-ийг баталлаа.
5 Бэлэн мөнгөний төлбөр тооцоог бүртгэх, хяналт тавих чиглэлээр хуулийн төсөл боловсруулах үүрэг бүхий ажлын хэсгийг байгуулав. Ажлын хэсгийг Сангийн дэд сайд ахлах бөгөөд дэд дарга нь Татварын ерөнхий газрын дарга, бүрэлдэхүүнд нь Монгол банкны дэд ерөнхийлөгч, Санхүүгийн зохицуулах хорооны дэд дарга зэрэг албан тушаалтан орлоо. Хуулийн төслийг 2009 оны 7 дугаар сард багтаан Засгийн газрын хуралдаанд танилцуулахаар болов.
6 Их эзэн Чингис хааны мэндэлсний 850 жилийн ойг тэмдэглэх тухай Монгол Улсын Ерөнхийлөгчийн зарлигийн төслийг хэлэлцээд зарчмын хувьд дэмжиж, энэ талаархи Засгийн газрын саналыг Ерөнхийлөгчид уламжлахаар тогтов. 2012 онд тохиох их эзэн Чингис хааны мэндэлсний 850 жилийн ойг тэмдэглэх нь монголын ард түмний үндэсний бахархлыг хөгжүүлэх, эв нэгдлийг бэхжүүлэх, уламжлалт ёс заншлаа сэргээхэд чухал ач холбогдолтой юм.
Зохиогчийн эрх хуулиар хамгаалагдсан. Мэдээлэл хуулбарлах хориотой.