Эрүүгийн хуульд нэмэлт, өөрчлөлт оруулах тухай хуулийн төслийг хэлэлцэн дэмжээд УИХ-д өргөн барихаар тогтов.
Эрүүгийн хуульд мөнгө угаах гэдгийг зэвсэг, хар тамхи, хүн худалдах, эсхүл хуурамч мөнгөн тэмдэгт үйлдвэрлэж олсон орлого, түүнчлэн зохион байгуулалттай бүлэг, гэмт бүлэглэл, терроризмыг санхүүжүүлэх зорилготой илт хууль бус эд хөрөнгө гэдгийг мэдсээр байж эх үүсвэрийг нь халхавчлах буюу нуун далдлах, эсхүл уг эд хөрөнгийг хууль ёсны болгох зорилгоор гүйлгээнд оруулах гэж хуульчилсан. Олон улсын практикийг харгалзан үзвэл мөнгө угаах гэмт хэрэг нь зөвхөн дээр дурьдсан цөөн тооны гэмт хэрэгтэй холбоотой бус өргөн хүрээг хамаардаг байна.
Ази, Номхон далайн мөнгө угаахтай тэмцэх байгууллагаас ойрын хугацаанд Эрүүгийн хуульдаа өрчлөлт оруулахгүй бол Монгол Улсыг мөнгө угаахтай хангалтгүй тэмцдэг улсын жагсаалтад орох магадлалтай болохыг анхааруулан уг байгууллагаас 2009 онд багтаан Эрүүгийн хуульд мөнгө угаах гэмт хэргийн хамрах хүрээг өргөжүүлэхийг зөвлөмж болгосон юм.
Мөнгө угаахтай хангалатгүй тэмцдэг улсын жагсаалтад орсон тохиолдолд олон улсын санхүүгийн системээс шахагдах, харилцагч гадны санхүүгийн байгууллагууд харилцаагаа хөндийрүүлэх, манай улсад орж ирэх гадны хөрөнгө оруулалт буурах сөрөг үр дагавар бий болж болзошгүй тул Эрүүгийн хуульд нэмэлт, өөрчлөлт оруулах шаардлагатай болжээ.
Иймээс Эрүүгийн хуульд:
1.Мөнгө угаах,
2.Хууль бус эх үүсвэрийг нь халхавчлах, нуун далдлах, түүнчлэн аливаа этгээдийг хуулийн хариуцлагаас зайлсхийхэд туслах зорилгоор энэ хуульд зааснаас бусад хүндэвтэр, онц хүнд гэмт хэрэг үйлдэж олсон эд хөрөнгө, эдийн бус хөрөнгө, мөнгийг санаатайгаар хүлээн авсан, хадгалсан, ашигласан, шилжүүлсэн, хувиргасан бол хөдөлмөрийн хөлсний доод хэмжээг тавин нэгээс хоёр зуун тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл таван жил хүртэл хугацаагаар хорих ял шийтгэнэ.
3.Энэ хэргийг давтан буюу бүлэглэж, эсхүл албан тушаалын байдлаа ашиглаж үйлдсэн, түүнчлэн их хэмжээний орлого олсон бол эд хөрөнгийг хурааж, таваас дээш арван жил хүртэл хугацаагаар хорих ял шийтгэнэ.
4.Энэ хэргийг зохион байгуулалттай бүлэг, гэмт бүлэглэл үйлдсэн, эсхүл онц их хэмжээний орлого олсон бол эд хөрөнгийг хурааж, арваас дээш арван таван жил хүртэл хугацаагаар хорих ял шийтгэнэ хэмээн нэмэлт, өөрчлөлт оруулахаар шийдвэрлэв.
Зохиогчийн эрх хуулиар хамгаалагдсан. Мэдээлэл хуулбарлах хориотой.