Оюутолгой төслийн бүтээн байгуулалт эхлэх хугацаа ойртож байна. Иргэдийн сонирхлыг хамгийн их татаж байгаа зүйл бол ажилчин авах асуудал. "Айвенхоу майнз Монголиа инк" компани санхүүжилтээ босгож нөхцлөө биелүүлсний дараа буюу ирэх оны дөрөвдүгээр сараас ажилчдаа авч эхэлнэ гэж тооцож байгаа аж. Зөвхөн Оюутолгой ХХК гэлтгүй гэрээт болон үйлчилгээ үзүүлдэг компаниудад шинэ ажлын байр бий болно гэж тэд онцолж байна. Улаанбаатар хотод буй, хүний нөөцөөр мэргэшсэн САМ1 компани боловсон хүчний асуудлыг хариуцаж байгаа аж. Хэрвээ та Оюутолгойд ажиллахыг хүсч байгаа бол тус компанийг зориорой. САМL нь Монголын компани. Оюутолгой төслийн ажилчдыг бүртгэх, сонгон шалгаруулах эрх бүхий байгууллага юм.
2010 онд 100 ажилчин авна гэхдээ нэг зүйлийг анхаарах хэрэгтэй. Ажлын байрны шаардлага хангасан тохиолдолд ажилд авна гэж тэд мэдэгдэж байна. Бүртгүүлсэн хүн бүр ажилд орох боломжгүй гэсэн үг. 12 дугаар сард 6-10 ажлын орон тоо гарах юм байна. Ажлын байрны зарыг олон нийтийн мэдээллийн хэрэгслээр зарлах гэнэ. Зөвхөн ажлын байрны зарын дагуу хүсэлт гаргахыг тэдний зүгээс сануулж байна. 2010 оны дөрөвдүгээр сар хүртэл 100 орчим ажлын байр зарлагдах аж. 2007 онд хөрөнгө оруулалтын гэрээ хойшилсон учир "Айвенхоу майнз Монголиа Инк" цомхтгол явуулсан. Туүнээс хойш 500 орчим хүнтэйгээр ажиллаж өнөөдрийг хүрчээ. Өнгөрсөн хугацаанд хүн нэмж аваагүй аж. Энэ 100 орон тоо нь шаардлагатай байгаа боловсон хүчнээ нөхөн авч байгаа хэрэг гэж тус компанийн зүгээс тайлбарлаж байна. Тэд барилгын шатанд 4000 хүн, олборлолтын үед 3000 хүнийг ажлын байраар хангах юм. Хамгийн эрэлт хэрэгцээтэй байгаа нь мэргэжлийн өндөр ур чадвартай боловсон хүчин гэж тэд онцолж байна. Оюутолгой ХХК Засгийн газартай хамтран мэргэжлийн боловсон хүчний сургалтад анхаарах аж. Хамгийн түрүүнд МСҮТ, их, дээд сургуулиудтай хамтран ажиллахаар төлөвлөж байгаа юм байна. Барилгын шатны болон ирээдүйн төлөвлөгөөнд хүний нөөцийн нарийвчилсан төлөвлөгөөг тусгахаар ажиллаж байгаа аж. 2010 оны төлөвлөгөөг дөрөвдүгээр сарын 30 гэхэд хэлэлцэж дуусахаар төлөвлөж байгаа гэнэ. Харин дөрвөн жилийн урт хугацааны төлөвлөгөө ирэх оны долдугаар сар гэхэд бэлэн болох нь. Тэд ажилчиддаа олон улсын стандартын шаардлагыг хангасан байх хэрэгтэй гэсэн шалгуурыг тавьж байна. Хөрөнгө оруулалтын гэрээнд зааснаар гэрээнд гарын үсэг зурснаас хойш зургаан сарын дотор 10 нөхцлийг биелүүлж байж гэрээ хүчин төгөлдөр болох учиртай. Одоогоор таван нөхцлийг нь биелүүлээд байгаа талаар бид өмнө нь мэдээлсэн. Бүх нөхцөл бүрдсэний дараа хоёр жилийн дотор хөрөнгө оруулалтыг баталгаажуулж, долоон жилийн дотор уурхайгаа байгуулах юм. Санхүүжилт хурдан орвол уурхайн барилгын ажлыг дуусгаж үндсэн ажилчдаа авч эхэлнэ гэж тэд онцолж байна. Барилгын шатанд гэхэд таван тэрбум гаруй ам доллар шаардагдах юм байна. Оюутолгой төсөлд өнөөдрийн байдлаар нэг тэрбум ам доллар зарцуулаад байгаа. Энэ утгаараа уг төсөл Азидаа томоохонд тооцогддог аж. Гэрээ хүчин төгөлдөр болсноос хойш 6-12 сарын хугацаанд барилгын бэлтгэл ажил явагдаж 32-40 сар барилгын үндсэн ажил үргэлжилнэ. Олборлолтыг 2012 оны сүүлээр эхлүүлэхээр төлөвлөж байгаа аж. Эхний ээлжинд ил уурхайг, дараа нь Хюгогийн ордод гүний уурхайг барьсны дараа гүний ордыг ашиглаж эхлэх юм байна.
Монголчууд уул уурхайн чиглэлээр гадаадад ажиллах боломжтой
Сургалтын төлөвлөгөөний тухайд их, дээд сургуулиуд болон МСҮТ-үүдтэй хамтран ажиллах сургалтын өндөр түвшний стратегийн баримт бичгийг боловсруулаад байгаа гэж тэд мэдээлж байна. Гэрээний нөхцлийг биелүүлснээс хойш 90 хоногийн дотор буюу ирэх жилийн долдугаар сарын 10-ны дотор сургалтын болон ажилд авах нарийвчилсан төлөвлөгөө гарах юм байна. Төлөвлөгөөг эцэслэн батлахаас өмнө Засгийн газарт танилцуулж хянуулах аж. Монгол боловсон хүчинд олон улсын уул уурхайн туршлагыг эзэмшүүлэхэд гурав орчим жил шаардагдах бололтой. Тэд манай улсын зарим сургуулиудтай хамтарч олон улсын стандартын дагуу сургалтын хөтөлбөр, материаллаг баазыг сайжруулан ажиллахаар төлөвлөжээ.
Анхаарал татсан нэг мэдээлэл байна. Монголчууд Рио Тинтогийн бусад оронд явуулж буй үйл ажиллагаанд оролцох, шилжин ажиллах боломжтой болох нь. Оюутолгой ХХК Рио Тинтогийн манлайллын хөтөлбөрийг хэрэгжүүлэх аж.
Хөрөнгө оруулалтын гэрээгээр их, дээд сургуулийн 150 оюутанд тэтгэлэг олгоно. 30-ийг нь гадаадад сургахаар тусгаад байгаа гэнэ.
Өмнөговийн иргэд давуу эрх эдлэх үү гэсэн асуулт олон хүнд бий байх. Хэрвээ тухайн ажлын байранд тавигдаж буй шаардлагуудыг хангаж чадвал Өмнөговьчуудад давуу эрх олгох юм байна. Учир нь уг төслийнхөн орон нутгийн ард иргэдийг дэмжих, Өмнөговьд ажлын байр нэмэгдүүлэх амлалтыг өгсөн байгаа. Оюутолгойн хүний нөөцийн хэлтэс ажилд орохоор майл, захидал, биечлэн хандаж байгаа бүх л хүсэлтийг бүртгэж байгаа аж.
Барилгын шатанд ажиллах хүмүүсийн 60 хувь нь монголчууд
Төслийнхөн сургалтад хамруулах болон ажилд авах орон тооны нарийвчлалыг дэс дараатайгаар нягталж байгаа аж. Ирэх жилийн долдугаар сарын зургаан гэхэд ажлын байрны жагсаалт эцэслэн гарах юм байна. Төслийнхөн "Бид ажлын байрны ангиллыг орон тоогоор нь гаргаж байна. Тухайлбал том оврын машины жолооч, цахилгаанчин, хүнд механизмын жолооч, уурхайчин, нягтлан бодогч гэх мэтээр ажил мэргэжил бүрийг нарийвчлан гаргана. Жил бүр шаардлагатай ажилчдын тоог урьдчилан гаргана" гэж мэдээлж байна. Хөрөнгө оруулалтын гэрээний дагуу Оюутолгойн барилгын шатанд нийт ажилчдын 60 хувь нь монголчууд байх нь. Барилгын ажил дуусаад үйлдвэрлэл эхлэхэд 90 хувь нь монголчууд байх аж. Уул уурхайн мэргэшлийн ур чадвар зайлшгүй шаардагдах ажлын байруудад гадаадын ажиллах хүч авах гэнэ.
Зохиогчийн эрх хуулиар хамгаалагдсан. Мэдээлэл хуулбарлах хориотой.