Хотын нэгэн бөглүү цэцэрлэгийн ямар өнгөтэй байсан нь мэдэгдэхгүй болтлоо хувхайрч хуучирсан урт модон сандал дээр хижээл эр тамхи баагиулан сууна. Хаана ч, хэнтэй ч тааралдаж болох жирийн л нэг эр. Зогсоо зайгүй тамхи таддагаараа л тэр бусдаас онцгой харагдаж болох байлаа.
Гэтэл түүний дэргэд залуу, цовоо эр гэнэт гараад ирэв. Тэрээр байн байн цагаа харах бөгөөд цувныхаа хормойд тээгэлдэн байж газраар хөглөрөх шар навчсыг өшигчин дороо холхино. Харин хижээл эр түүнийг огт анзаараагүй мэт сууж байснаа гэнэтхэн
-Болзоо юу? гэж асуулаа. Залуу гайхан түүн рүү харснаа
-Тийм ээ. Хижээл эр
-Сайхан бүсгүй юү? Залуу инээмсэглэн
-Сайхан. Хижээл эр
-Тэгвэл чи хоцорчихож. Залуу гайхан түүн рүү дөхөж
-Та сая юу гэсэн бэ? Хижээл эр татаж дууссан тамхины ишээ хол гэгч нь няслаад дахиад нэгийг асаан
-Чи хоцорчихож. Цагийн өмнө ирээд чамайг хүлээж хүлээж байгаад саяхан явчихсан. Үнэхээр сайхан бүсгүй. Залуу
-Та нээрэн ярьж байна уу? Хижээл эр амнаасаа саарал утаа савсуулан байж
-Нээрэн. Хүлээж хүлээж яваад л өгсөн. Залуу хижээл эрийг үнэн ярьж байна уу үгүй юу гэдгийг нь мэдэх гэсэн мэт хэсэг анхааралтай ширтсэн болов ч түүний нүүрнээс, нүднээс ямар ч хувирал олж харсангүй. Залуу санаа алдаад
-Намайг их хүлээсэн үү? Хижээл эр
-Бүтэн цаг. Залуу яахаа шийдэж ядан хэсэг алсыг ширтсэнээ
-Завхарсан юм гэснээ огцом эргэж цувныхаа хормойг дэрвүүлэн явж одлоо. Нөгөөх эр хүний урманд нүдээ ч цавчсангүй тамхиа л татсаар.
Гэнэтхэн залуухан бүсгүй гараад ирэв. Тэрээр байн байн цагаа харна. Хижээл эр харин тамхий л баагиулсаар…
-Залуу чинь явчихсан. Бүсгүй гайхан түүн рүү харж
-Юу, та сая юм хэлэв үү?
-Чамайг цаг гаруй хүлээж байгаад яваад өгсөн. Бүсгүй
-Хэн тэр вэ? Хижээл эр
-Чиний залуу.
-Тийм үү? Яагаад?
-Бид хоёр хэд гурван үг солисон юм. Би түүнд чамайг ирэхгүй гэж хэлсэн чинь л “завхарсан юм” гээд л яваад өгсөн. Бүсгүй
-Та миний залуу гэж яаж мэдэж байгаа юм бэ? Хижээл эр
-Чи түүний хэлснээр үнэхээр сайхан бүсгүй юм. Урт цувтай цовоо залуу, тийм үү? Бүсгүй бүр ч гайхан түүний хажууд сууж
-Та яах гэж тэгсэн юм бэ? Та бид хоёр бие биенээ мэдэхгүй ш дээ гэхэд хижээл эр
-Би чамайг ирэхгүй байх л гэж бодсон юм гээд татаж дууссан тамхины ишээ хол гэгч нь няслаад дахиад нэгийг асаагаад бослоо. Утаа савсуулан цааш алхах түүний араас бүсгүй хэсэг гайхан харж сууснаа яаран босч
-Хүлээгээрэй. Би тантай хамт явъя гээд араас нь гүйцэж хамтдаа алхлаа. Цааш хэсэг дуугүй хамтдаа алхаж явснаа хижээл эр
-Чи надаас айхгүй байна уу? гэхэд бүсгүй түүний хажуугаас анхааралтай ширтэн
-Намайг айлгах юм танд алга гэснээ санаа алдан
-Уул нь тэр танд биш надад итгэх ёстой байтал таны үгэнд ороод яваад өгчихсөн байна ш дээ. Тэгэхээр би ч гэсэн танд итгээд, тантай хамт явмаар санагдлаа. Тэд дахин юу ч ярьцгаасангүй, бие биенээ ч харсангүй цааш алхцгаалаа.
ТӨГСӨВ
Цагдаагийн мэдээлэл:Нэг өдөрт гурван хүн өөрийгөө боомилж нас баржээ 192 хүн эрүүлжүүлэгджээОнцгой байдлын газрын мэдээлэл:Галын аюулгүй байдлын шалгалт явуулжээ Нийслэл гал түймрийн таван дуудлагатай хоножээАвилгалтай тэмцэх газрын мэдээлэл:АТГ БНХАУ-ын Авлигаас урьдчилан сэргийлэхгазар хамтын ажиллагааны[...] БНХАУ-ын Авлигаас урьдчилан сэргийлэх газрын төлөөлөгчид манай[...]Нийслэлийн мэргэжлийн хяналтын газар:Үдийн цай хөтөлбөрийн хүрээнд хүнсний 11 үйлдвэрт шалгалт явуулжээ Боловсролын байгууллагуудад хийсэн шалгалтаар 2585 зөрчил илэрчээ |
Зохиогчийн эрх хуулиар хамгаалагдсан. Мэдээлэл хуулбарлах хориотой.