Баянгол дүүргийн X хорооны нутаг дэвсгэр, Зүүн Нарангийн 13 дугаар гудамжны 128 тоот хашаанд таван ханатай гэр шатаж, нэг гэр бүлийн гурван хүн амиа алджээ. Гал юунаас үүдсэнийг өчигдөр сурвалжиллаа.
Гал гарсан газар гэр хороолол учраас байрлалыг нь заалгах санаатай хорооноос нь лавлатал “Мэдэхгүй, “Өргөө” кино театраас хойш яваад, гэр хороолол дунд байж магадгүй” гэсэн бүрхэг хариулт өглөө. Ингээд III, IV хорооллын эцсийн буудлаас хойш, гэр хороолол руу өгссөн замаар жалга өөд өгсөв. Тэр орчмын оршин суугчид гал хаана гарсныг түвэггүйхэн зааж өгсөн юм.
Биднийг гал гарсан хашааны үүдэнд очиход тэр орчмын талбай мөстсөн байлаа. Шатсан гэрийн буурьтай залгаад 6х6 хэмжээтэй, бага зэрэг галд өртсөн палкан байшин, хажууханд нь нэг автомашин байв. Гэрийн буурин дээр хөргөгчний төмөр л үлджээ. Бусад эд хогшил нь үнс, нурам болсон байлаа.
Тэр хашааны нүүрэн талд блокоор барьсан дэлгүүр үйл ажиллагаа явуулж байв. Дэлгүүрийн эзэн н.Мэндбаяраас галын талаар тодруулах гэсэн боловч “Цагдаа нар биднийг хэвлэлийнхэнд юу ч хэлж болохгүй шүү гэж захисан”гэлээ. Гэхдээ түүнээс цөөн асуултад хариулт авч чадсан юм.
-Уучлаарай. Галд шатсан хүмүүс таны ямар хамаатан бэ?
-Манай төрсөн дүүгийн эхнэр хүүхэд хоёр. Мөн бэрийн маань оюутан дүү байсан юм.
-Таны дүү тухайн үед байгаагүй юм уу?
-Дүү маань Солонгост хөдөлмөрийн гэрээгээр ажил хийхээр явсан юм л даа. Яваад удаагүй байтал ийм юм боллоо. (Түүний гар утас дуугарч, “Солонгосоос яръя гэнээ” хэмээгээд эхнэртээ утсаа шилжүүлэв).
-Дүүдээ болсон явдлын талаар дуулгасан уу?
- Маргаашаас ирнэ гэж байна лээ. Ирээд бөөн юм болох байх даа. Хүүхэд нь дөнгөж ой гарантай байсан юм. Би дүүтэйгээ адилхан царайтай болохоор намайг харахаараа “Аав аа” гэдэг байсан. Бэрийн маань аав ээж, ар гэрийнхэн ирээд биднийг загнаад явж байна. Одоо загнуулахгүй гээд яах ч билээ дээ(Санаа алдав).
-Гал юунаас болсон гэж таамаглаж байна вэ?
-Цахилгааны утаснаас болсон болов уу. Уг нь би цахилгаанаас их айдаг юм. Тэгээд мэргэжлийн хүнээр монтаж хийлгэсэн.
-Гал алдсан байх магадлал бий юу?
-Бэр маань орой унтахдаа галаа зогсоодог. Өглөө босоод галаа түлдэг юм.
-Танай бэр хэд орчим насны хүн байв?
-Одоо 30 гаруй настай. Манай эхнэртэй их дотно. Намайг цаанаа байж бай, бид хоёр юм ярьж байна гээд л аминчхан яриа өрнүүлдэг байсан. Сайхан ааш зантай хүүхэд байсан даа. Би одоо яах учраа олохгүй л байна.
-Гал сөнөөгчид хэр зэрэг хурдан ирсэн бэ?
-Шөнө дунд байсан болохоор бид унтаж байлаа. Гэтэл гал гарч байна гэхээр нь би босоод хартал гэр шатаж байсан. Манай энэ орчмын айлуудаас дуудлага өгсөн юм билээ. Би галынхныг тосох санаатай доошоо гүйгээд буцаад иртэл гэр аль хэдийнэ шатаад дуусчихсан байсан. Монгол гэр тавхан минутад л шатдаг юм байна. Харин галынхан хурдан ирлээ гэхэд арван минут болно. Гэхдээ тэд хурдан ирээгүй бол гал хажуугийн байшин руу орж, дараа нь автомашин хүртэл дэлбэрэх аюултай байсан. Тэд шөнөжин ажилласан. Цагдаагийнхан ч үзлэг хийж, галын шалтгааныг тогтоохоор шинжилгээ хийгээд явсан. Биднийг ч ойртуулаагүй. Бэр маань хүүтэйгээ шатчихсан юм шиг байна лээ. Харин бэрийн дүүгийн хөнжил нь ч шатаагүй байхыг бодоход угаартчихсан болов уу.
Эдийн засаг:Хөрөнгийн биржийн менежментийн багийг гадаадынхан удирдах уу Тендерийн урилга: Бульдозерын Д-16 маркын сэлбэг нийлүүлэхЭнтертайнмент:Өнөөдөр бич өдөр Ажилд авна |
Цагдаагийн мэдээлэл:Бичиг баримтгүй хятад иргэд баригджээ Ногоон гэрэл - цагаан шугам” тэмцээн болноОнцгой байдлын газрын мэдээлэл:Тарваганд хазуулж тахал тусчээ Олон тооны зээр тодорхойгүй шалтгаанаар хорогдож байнаАвилгалтай тэмцэх газрын мэдээлэл:АТГ БНХАУ-ын Авлигаас урьдчилан сэргийлэхгазар хамтын ажиллагааны[...] БНХАУ-ын Авлигаас урьдчилан сэргийлэх газрын төлөөлөгчид манай[...]Нийслэлийн мэргэжлийн хяналтын газар:Үдийн цай хөтөлбөрийн хүрээнд хүнсний 11 үйлдвэрт шалгалт явуулжээ Боловсролын байгууллагуудад хийсэн шалгалтаар 2585 зөрчил илэрчээ |
Зохиогчийн эрх хуулиар хамгаалагдсан. Мэдээлэл хуулбарлах хориотой.