Өчигдрийн орсон цаснаар автозамуудад хальтиргаа гулгаа үүслээ. Үүнээс шалтгаал зам тээврийн осол нэмэгдсэн байна. Мөн хөдөлгөөний эрчим суларч ачаалал ч нэмэгдсээр байгааг Замын цагдаагийнхан анхааруулж байна. Замын цагдаагийн газрын Ерөнхий жижүүр Ц.Галчулуунаас Нийслэлийн болон орон нутгийн замын нөхцөл байдлыг тодруулсан юм.
-Хальтиргаа гулгаа ихэсссэнтэй холбоотойгоор дуудлага хэр байна?
-Өнөөдөр 14 цагийн байдлаар Замын цагдаагийн газрын шуурхай удирдлагын төвд 46 дуудлага ирсэн байна. Эдгээр дуудлагын ихэнх нь хальтиргаа гулгаанаас болж хоорондоо мөргөлдөх, шүргэлцэх, явган зорчигч мөргөсөн байна. Иймд жолооч нарт анхааруулж хэлэхэд замын нөхцөлдөө хурдаа тааруулан, хажуу хоорондын зайгаа зөв сонгож яваарай. Уулзвараар баруун буюу зүүн гар тийш эргэхдээ гарцаар гарч байгаа явган зорчигч нарт зам тавьж өгөх, өгсүүр, уруу замаар явахдаа маш анхааралтай явахыг анхааруулж байна.
-Өнөөдөр товчоогоор автомашин гаргахгүй байгаа гэсэн?
-Иргэдийн аюулгүй байдлыг хангах үүднээс хотоос гадагш хөдөө орон нутгууд руу ямарч автомашин гаргахгүй байгаа. Сая Говьсүмбэр, Налайхын Замын цагдаагийн тасгийн дарга нар холбоо барьсан. 5 метрээс цааш юу ч харагдахгүй цасаар шуурч байгаа талаар мэдээлэл ирсэн. Налайхаас цааш ямарч тээврийн хэрэгсэл явах боломжгүй зам хаагдсан байна. Мөн 22-ын товчооноос цааш эмээлт рүүгээ маш их гулгаатай байна гэсэн мэдээллүүдийг ирүүллээ. Цаг агаарын нөхцөл байдлаас шалтгаалан нэлээд хэдэн даваа, зам хаагдсан. Иймд хөдөө орон нутгаас хот руу гарах гэж байгаа хүмүүсийг цаг агаарын байдал сайжиртал хүлээхийг зөвлөж байна. Харин хөдөө орон нутгаас ирж байгаа тээврийн хэрэгслүүдийг зүгээр нэвтрүүлж байгаа.Манай зарим хэнэггүй жолооч нар хулгайн замаар хотоос гарчихаад цаанаа очоод хунгарт суусан, цасанд боогдсон тохиолдол гарч байна.
Зохиогчийн эрх хуулиар хамгаалагдсан. Мэдээлэл хуулбарлах хориотой.