Нэлээд хэдэн жилийн өмнө тагнуулын даргаар ажиллаж байгаад авлигачин байх магадлалтай асуудалд орооцолдон ажлаасаа халагдаж байсан Д.Батсайхан гэгч нөхрийг АТГ-ын даргаар тавихаар тохирсон тухай мэдээлэл хэвлэлээр гарч эхэллээ. Засарч сайжраад жигтэйхэн шударгуу нөхөр болоод хувирсан байхыг үгүйсгэх аргагүй л дээ. Энэ хүнийг УИХ-ын гишүүн Ц.Шаравдоржийн туслах байсныг цөөнгүй хүн гадарлах байх. Дараа нь ТЕГ дарга болсон юм даг. Тэнд байхдаа ч билүү нэг хэрэг тариад авсан. Лав л сонин хэвлэлээр бичигдээд авсан юм даг. Авлигын хэрэгтэй гэж хэвлэлүүд цуураад байсан. Ямар авлига мавилга өгч авалцаж байхыг нь харсан биш. Тэгээд ч хүн амьтанд харуулж байгаад өгөлцөж авалцдаг авлига ч гэж хаа байлаа. Харин бүгдэд мэдэгдэж, сонсогдсон нэг дуулиан түүнд бий. Тэр дуулианаараа бол Монгол Улсын хууль байтугай олон улсын хууль журмыг ч юман чинээ бодохгүй зөрчдөг нөхөр шүү дээ. Тэр жил Францаас Германаар дамжуулан Дамирангийн Энхбат агсныг хулгайлан авчрах ноцтой гэмт үйлдлийг (гадаадын хуульчид, дипломатууд ингэж үзсэн байсан) гардан гүйцэтгэсэн гэх юм билээ. Гурван ч улсын хил, гаалийг хулгайгаар бүхэл бүтэн амьд хүн гаргаж чадсаныг нь бодохоор сайн тагнуулч (нэр томьёо нь тохирох эсэхийг бүү мэд) ч юм шиг. Жижигхээн боодолтой нунтаг хар тамхи гаргаж чадахгүй баригдаад байхад хүн нуугаад гаргана гэдэг онцгой авьяас буй заа. Харин түүний хийсэн балгийг Францад консулын ажилтан байсан Г гэж залуу бүсгүй үүрч, олон улсын хэллэгээр "Persona non grata" (аль нэг гадаад улсад дипломат ажил хийх эрхгүйгээр хөөгдөх тохиолдлыг ингэж нэрлэдэг гэсэн) болон хөөгдөж ирснийг хүмүүс мартаагүй болов уу. Бас болоогүй гадаад орноос хүн хулгайлаад, түүнийг онгоцны үйлчлэгч нар хоол хүнс зөөх зориулалттай түрдэг тэргэн дотор нууж авчраад элдвээр дарамтлан өөрсдийн хүссэн мэдүүлгээ өгүүлэх гэж хүч хэрэглэсэн тухай ч зөндөө шуугиад авсан. Уг хэрэг сайн өмгөөлөгчийн ачаар нийтэд ил болсон төдийгүй олон улсын хүний эрхийн байгууллагад ч хүрээд амжсан байдаг. Өөрөөр хэлбэл Монгол Улсын нэр хүндийг унагаасан гэж ойлгож болох биз. Цаад хүн нь тийм мэдүүлэг өгсөн эсэхийг мэдэхгүй. Ямар боловч шоронгийн дарамтыг даалгүй нас нөгчсөн юмдаг. Яг энэ үеэр тагнуулынхан (Батсайхан даргынхаа даалгавраар гэдэг нь тодорхой) нийтлэл бичигчийг болон "Өдрийн сонин"-ы удирдлагуудыг хэд хэдэн удаа дуудан уулзаж "С.Зоригийг хөнөөсөн хүнийг бид олчихсон. Тун удахгүй шинэ жилийн өмнө, эс чадлаа ч цагаан сарын өмнө нийтэд зарлах гэж байна. Иймээс та, та нар Зоригийн тухай хэвлэлд юм бичихээ зогсоо" хэмээн тулган, бас ч болоогүй сүрдүүлэх маягтай байсан ч уг зүйл худал болох нь тун удалгүй илэрхий болж таг болсон юм даг. Тэдний хэлснээр бол С.Зоригийг М.Энхсайхан (Ерөнхий сайд асан) нар хөнөөсөн юм байна хэмээн ойлгогдож байсан шүү дээ. Зарим сонинд ч тэгж гарсан байх. Ийм л нэг нөхөр яагаад ч юм төр засаг солигдох бүрт гарч ирээд албан тушаал амлагдаад явах ньхачирхалтай, бас сэжиглэлтэй. (Нөгөө бор шувуу гэдэг нь ч байж мэдэх) Гадаадад хүртэл гарч хүн хулгайлдаг даргатай болсноос Ганц худагаас цааш гарч үзээгүй хуучин дарга нь дээр баймаар. Үнэхээр шударга, сайн хүн байж болох л доо. Хилс хэрэгт хэлмэгдээд явсан ч юм билүү. Олон нийтэд бараг ил (сайн талаараа биш шүү) болчихсон нөхрийг арай ч тийм хариуцлагатай албанд томилохдоо тулчихсан харалган төр засаг, төрийн тэргүүн баймгүй л гэж итгэхээс. Юмыг яаж мэдэх вэ "хорыг хороор" гэдэг шиг арга хэрэглээд үзвэл, авлига өгч авалцдаг зам мөр, хэлбэр хэмжээ, нүх сүвийг нь сайн мэддэг хүн сайн тэмцэх байх хэмээн туршаад үзэхээр шийдсэн ч байж магадгүй л юм.
Олхонууд ШААБАР
Цагдаагийн мэдээлэл:Нэг өдөрт гурван хүн өөрийгөө боомилж нас баржээ 192 хүн эрүүлжүүлэгджээОнцгой байдлын газрын мэдээлэл:Галын аюулгүй байдлын шалгалт явуулжээ Нийслэл гал түймрийн таван дуудлагатай хоножээАвилгалтай тэмцэх газрын мэдээлэл:АТГ БНХАУ-ын Авлигаас урьдчилан сэргийлэхгазар хамтын ажиллагааны[...] БНХАУ-ын Авлигаас урьдчилан сэргийлэх газрын төлөөлөгчид манай[...]Нийслэлийн мэргэжлийн хяналтын газар:Үдийн цай хөтөлбөрийн хүрээнд хүнсний 11 үйлдвэрт шалгалт явуулжээ Боловсролын байгууллагуудад хийсэн шалгалтаар 2585 зөрчил илэрчээ |
Зохиогчийн эрх хуулиар хамгаалагдсан. Мэдээлэл хуулбарлах хориотой.