Гаитийн Иргэний хамгаалалтын газраас газар хөдлөлтийн улмаас ойролцоогоор 75 мянган хүн амь үрэгдсэн тухай мэдээллээ. Түүнээс гадна 250 мянган хүн бэртэж, нэг сая хүн орох оронгүй болжээ. Гэтэл нэг хоногийн өмнө Гаитийн Засгийн газраас 70 мянган хүн амиа алдаж, гурван сая хүн шархадсан хэмээн мэдээлж байсан. Ийнхүү яг хичнээн хүн амь үрэгдсэнийг тогтоож чадахгүй л байна. Өнгөрсөн долоо хоногт НҮБ-аас гамшигт нэрвэгдэгсдэд зориулан 562 сая ам.долларын хандив цуглуулахыг уриалсан юм. Тус байгууллагаас Гаитид 25 сая ам.долларын тусламж үзүүлэхээр болсон. Гэвч тусламж байгалийн гамшигт нэрвэгдсэн хүмүүст тэр бүр хүрэхгүй байна. Порт-о-Пренс хотын нисэх онгоцны буудал нь ирж байгаа бүх онгоцыг хүлээж авч чадахгүй байгаа. Түүнээс гадна зам эвдэрч сүйдсэн тул тусламж хүргэж буй автомашин явах боломжгүй байгаа аж. Газар хөдлөлт судлалын мэргэжилтнүүд Карибийн тэнгист дахин хүчтэй газар хөдлөлт болно хэмээн анхааруулсан байна. Энэ удаад Рихтерийн шаталбараар 8.5-9 баллын хүчтэй газар хөдлөлт болох бөгөөд цунами нүүрлэх аюултай гэнэ. Гаитид дээрэм тонуул газар аваад байгаа тул НҮБ-ын Аюулгүйн Зөвлөл нийгмийн хэв журмыг сахиулахаар нэмэлт цэрэг илгээх шийдвэр гаргажээ.
Зохиогчийн эрх хуулиар хамгаалагдсан. Мэдээлэл хуулбарлах хориотой.