Төрийн ордонд өчигдөр хотын захиргааны удирдах, албан тушаалтнууд цугларав. Хотын утааг яаж багасгах талаар хэлэлцэхээр ирсэн нь энэ. Ерөнхий сайд, Байгаль, орчин аялал жуулчлалын сайд Л.Гансүх нар тэднийг чамгүй хүлээлгэсний эцэст орж ирэн хурлаа эхлүүлэв. Ерөнхий сайд С.Батболд "Утааг багасгах тухай улиг болтол ярьж байгаа ч дорвитой үр дүнд хүрэхгүй байна. Гэвч ярихаас өөр аргагүй. Хувь хүн, албан байгууллагууд утааг багасгах гэж дор бүрнээ идэвх санаачилга гаргаж байгаа ч хоорондоо уялдаа холбоогүй ажиллаж байна. Тиймээс шинэ хөтөлбөр боловсруулан утааг багасгахад хэдий хэрийн хөрөнгө хэрэгтэй болохыг дахин нарийн тооцоолох шаардлагатай байна. Хоёрдугаар сарын 1-ний дотор утааг багасгах хөтөлбөр боловсруул гэж УИХ Засгийн газарт үүрэг өгсөн. Гэхдээ ийм богино хугацаанд бид "бушуу туулай борвиндоо баастай" гэдэг шиг зүйл хийхгүйн тулд хөтөлбөр боловсруулах ажлын хэсэг байгуулсан. Ахлагчаар нь Байгаль орчин, аялал жуулчлалын сайд Л.Гансүх, орлогчоор нь Нийслэлийн Засаг дарга Г.Мөнхбаяр ажиллана. Мөн Эрдэс баялаг, эрчим хүчний сайд Д.Зоригт, Сангийн сайд С.Баярцогт нар ажлын хэсэгт багтана. Ингээд хоёр долоо хоногийн дараа Засгийн газарт утааг багагсах хөтөлбөрөө танилцуулах ёстой" гэв. Тэгэхэд нь Л.Гансүх сайд "Бидэнд шахуу хугацаанд биелүүлэх үүрэг өгч байна. Ямартаа ч бид таван дэд ажлын хэсэг байгуулсан. Гэр хороолол автомашины утааг багасгах, тоос тортог бууруулах, хот төлөвлөлт, эрчим хүч, дэд бүтцийг сайжруулах, гэр хорооллын иргэдийг нүүлгэн шилжүүлэх, сургалтууд явуулах чиглэлээр ажлын хэсэг байгууллаа" гэхэд Ерөнхий сайд "Орон сууцжуулна гэсэн үг яагаад алга байна. Энэ нэр томъёоллыг заавал хөтөлбөрт оруулж тусгайлан төсөл болгох ёстой" гэлээ. Гэтэл Нийслэлийн Засаг даргын орлогч Ц.Цогзолмаа "Гэр хорооллын иргэдийг нүүлгэн шилжүүлэх ажлын хэсгийг би ахалж байгаа. Манайхыг орон сууцжуулах төсөлтэй нэгтгэж үйл ажиллагааг нь уялдуулмаар байна" гэсэн юм. Тэггэл Ерөнхий сайд "Цогзолмаа дарга манай ажлын хэсэг гэж ярьж байна. Таныг хэн, хаана тавьчихав аа. Орон сууцжуулах ажлыг хариуцсан тусдаа ажлын хэсэг байгуулан Зам тээвэр барилга хот байгуулалтын яаманд хариуцуул" хэмээн хатуухан үүрэгдэв. Харин Л.Гансүх сайд мөн л өмнөх үгээ давтан давчуу хугацаанд ажиллах нь хэмээн үглэв. Тэрээр нэг л халширч шантраад байгаа бололтой. Энэ үеэр хажуугийн ширээнд сууж байсан "Эко Ази" дээд сургуулийн Ц.Адьяасүрэн утааг багасгах арга болсоноо хэлэв. Тэрээр Улаанбаатар хотод байрладаг их, дээд сургуулиудыг цөмийг нь Төв аймаг руу нүүлгэхийг санал болгосон юм. Хэрэв ингэвэл оюутан хүүхдүүдээ даган хотод орж ирсэн хүмүүс тийш нүүдэллэх гэнэ. Ингэснээр нийслэлээс 800 гаруй мянган хүн шилжин явах боломжтойг дуулгав. Энэ тохиолдолд хотод үлдсэн гэр хорооллын цөөн айлыг орон сууцжуулахад төсөв мөнгөний хэмнэлттэй байх гэнэ. Ийн хотын утааг хөдөө рүү хөөж нийслэлээ цэвэршүүлэх санааг тэрээр дэвшүүллээ. Түүний санааг Ерөнхий сайд сайшаагаад "Утаатай зэрэгцэн шийдвэрлэх олон асуудал байгаа" хэмээгээд үргэлжлүүлэн хуралдахыг хүсээд гарч одов. Харин Байгаль орчин, аялал жуулчлалын сайд "Та нар утааг багасгах талаар бодож мөрөөддөг бүхий л аргуудаа хэлээрэй. Гамшгийн хэмжээнд хүрсэн утаатай дайн зарлая" хэмээн дахин дахин ярилаа. Утааг багасгах нэрээр болсон болоогүй төсөл хэрэгжүүлсэн ч үр дүнд нь төсвийн мөнгөөр түрийвчээ түнтийлэгсдийн тоо л олширсон. Төр засаг маань хэдэн жил яриад багасгаж бараагүй утаагаа хоёр долоо хоногийн дотор үгүй хийхээр ийн ханцуй шамлан дайрав. Өвлийн сар дундаа ороход гамшгийн утааг гэнэт анзаарсан төрийн түшээд түүнийг хөдөө рүү хөөхөөр болж байх шиг ээ.
Эдийн засаг:Хөрөнгийн биржийн менежментийн багийг гадаадынхан удирдах уу Тендерийн урилга: Бульдозерын Д-16 маркын сэлбэг нийлүүлэхЭнтертайнмент:Өнөөдөр бич өдөр Ажилд авна |
Цагдаагийн мэдээлэл:Бичиг баримтгүй хятад иргэд баригджээ Ногоон гэрэл - цагаан шугам” тэмцээн болноОнцгой байдлын газрын мэдээлэл:Тарваганд хазуулж тахал тусчээ Олон тооны зээр тодорхойгүй шалтгаанаар хорогдож байнаАвилгалтай тэмцэх газрын мэдээлэл:АТГ БНХАУ-ын Авлигаас урьдчилан сэргийлэхгазар хамтын ажиллагааны[...] БНХАУ-ын Авлигаас урьдчилан сэргийлэх газрын төлөөлөгчид манай[...]Нийслэлийн мэргэжлийн хяналтын газар:Үдийн цай хөтөлбөрийн хүрээнд хүнсний 11 үйлдвэрт шалгалт явуулжээ Боловсролын байгууллагуудад хийсэн шалгалтаар 2585 зөрчил илэрчээ |
Зохиогчийн эрх хуулиар хамгаалагдсан. Мэдээлэл хуулбарлах хориотой.