Нийгмийн хамгаалал, хөдөлмөрийн яамнаас хэрэгжүүлж буй “Хөгжим-Хүүхдийн хөгжилд” төслийн нээлтийн ажиллагаа өчигдөр боллоо.
Энэхүү төсөл нь хараа хяналтгүй, халамж асрамжийн төвд байрладаг, хүнд нөхцөл дэх хүүхдүүлийн хүүхдийн авьяас боломжийг нээн хөгжүүлэх, улмаар нийгмийн амьдралд татан оруулах, нийгмийн идэвхтэй гишүүн болгон хүмүүжих, тэдэнд өөртөө итгэх итгэл, амьдралыг эерэгээр харах итгэл үнэмшлийг бий болгох зорилгоор урлагийн боловсрол олгох, цаашид морин хуур, найрал дууны хамтлаг бий болгох, загвар төслийг бусад нутаг дэвсгэрт хэрэгжүүлэхэд дэмжлэг үзүүлэх зорилготой юм. Сүүлийн жилүүдэд ядуурал, орлогын хомсдол, нийгмийн халамж, үйлчилгээний хүртээмжгүй байдал, гэр бүл салалт, архидалт зэрэг нийгмийн сөрөг үзэгдлийн улмаас эцэг эх, асран хамгаалагчийн анхаарлаас гадуур хараа хяналтгүй хүүхдүүд олноор гарч ирсэн. Албан бус мэдээгээр одоогийн байдлаар нийт 48 асрамж, халамжийн байгууллагад 1500 орчим хүүхэд байрлаж байна. Мөн 50 гаруй хүүхэд байнга гудамж, орц, траншейгаар тэнүүчлэн амьдарч, 130 орчим хүүхэд хогийн цэг дээр байрлаж, 85 орчим хүүхэд нийслэл хотод гуйлга гуйн амьдарч байна.
Хүнд нөхцөл дэх хүүхдүүдийг нийгэмшүүлэх, албан бус боловсрол, нийгмийн халамжийн тусламж үйлчилгээнд хамруулах чиглэлээр төрийн болон төрийн бус байгууллагууд, олон улсын хандив тусламжийн байгууллагууд тодорхой төсөл хөтөлбөр хэрэгжүүлсээр ирлээ. Дээрх төсөл хөтөлбөрийн хүрээнд хүүхдийн амьдрах байр, хоол хүнс, хувцас зэрэг амьдралын наад захын хэрэгцээг хангадаг. Гэвч цаашид эцэг эхийн хайр халамж, гэр бүлийн халуун дулаан уур амьсгалыг мэдрээгүй дээрх хүүхдүүдийн ирээдүй тодорхой бус, ирээдүйдээ итгэх итгэл үнэмшил бий болж төлөвшөөгүй байсаар насанд хүрч, цаашид удам дамжсан ядуурлыг бий болгох эрсдэл байсаар байна. Иймээс НХХЯ-аас санаачлан, хүүхдийн өөрсдийнх нь сонирхол, хүсэл эрмэлзэл дээр түшиглэн тэдний авъяас чадварыг хөгжүүлэх, улмаар нийгэмшүүлэх, ядуурлаас гаргах чиглэлээр өөрийн болон бусад оронд хэрэгжүүлж байсан туршлагыг үндэслэн энэхүү төслийг хэрэгжүүлэхээр шийдвэрлэсэн юм.
Урлаг, дуу хөгжим, бүжиг бол хүнд баяр баясал авчирч, цаашид хийж бүтээх урам зоригийг бий болгодог учраас хүнд нөхцөлд байгаа хүүхдийг нийгэмшүүлэх, ирээдүйн амьдралд бэлтгэхэд энэ арга тохиромжтой, оновчтой гэж үзсэн болно.
Төслийг хэрэгжүүлж эхлэх туршилтын нэг жилд ядуу гэр бүлээс гаралтай эмзэг бүлгийн хүүхдүүд, халамж, асрамжийн төвд байрлаж байгаа болон гудамж, орц, траншейгээр байнга тэнүүчлэн амьдардаг хүүхдүүдээс сонгосон 132 хүүхэд уг төсөлд хамрагдана. Төслийн нээлтийн үеэр “Хаан хуур чуулга”-ын морин хуурын хамтлаг тоглолт хийж, “Хөх тэнгэрийн хүүхдүүд” найрал дууны хамтлаг төсөлд хамрагдаж буй хүүхдүүдэд тоглолтоосоо үзүүллээ.
Удирдах зөвлөлийн бүрэлдэхүүнд НХХЯ, Дэлхийн зөн Монгол Олон улсын байгууллага, урлаг соёлын зүтгэлтнүүд, бизнесийн байгууллагын төлөөллөөс бүрддэг юм.
Зохиогчийн эрх хуулиар хамгаалагдсан. Мэдээлэл хуулбарлах хориотой.