Энэ сарын 28-ны өдөр Монгол-Оросын хамтарсан 3 дугаар сургуулийн цайны газраасаа хооллосон хүүхдүүд хоолны хордлого гэсэн онштойгоор өвчилсөн талаар бид мэдээллэсэн билээ. Сургуулийн нийт 132 хүүхэд ямар нэгэн хэмжээгээр өвдсөн байдалтайгаар эмнэлэгт хандсан байна. Тус сургуулийн бага насны хүүхдүүд хичээл тарсныхаа дараа өдөр өнжүүлэхэд байрлаж хичээлээ хийж өнждөг аж. Тухайн өдөр өдөр өнжүүлэхээс хооллосон 132 хүүхэд байгаа аж. Эдгээрийн 90 хүүхэд нь ХӨСҮТ –д хандаад байгаа аж. Одоогийн байдлаар ХӨСҮТ-д 6-11 насны 83 хүүхэд хэвтэж байгаас 7 хүүхэд эрчимт эмчилгээний тасагт хэвтэн эмчлүүлж байна. Хүүхдүүдийн биеийн байдал хүндэвтэр, хүнд байдалтай 37 хэмээс дээш халуурсан, таталт өгсөн, суулгасан, үнэртэй усархаг зүйлээр гүйлгэсэн, бөөлжсөн зэрэг шинж тэмдгүүд илэрч хордлого тайлах эмчилгээ хийлгэж байна.
НМХГ-аас мэдээллийн дагуу сургуулийн захирал Ж.Соронзон, эмч Г.Янжин, ахлах тогооч Д.Баасандорж нарыг байлцуулан тус сургуулийн цайны газарт шуурхай хяналт шалгалт, тандалт судалгаа явуулж эхэлжээ.
Хяналт шалгалтын явц болон хүүхдүүдийн биеийн байдлын талаар Мэргэжлийн хяналтын ерөнхий газрын дарга Я.Содбаатар, НМХГ-ын дарга Л.Бямбасүрэн, Нийслэлийн ерөнхий менежир ЗАА-ны дарга Ч.Бат, ХӨСҮТ-ийн дэд захирал Г.Сүрэнханд болон холбогдох газар, хэлтсийн дарга нар өнөөдөр сэтгүүлчдэд мэдээлэл хийлээ.
Тус сургууль нь өөрөө цайны газраа ажиллуулдаг бөгөөд сурагчдад “Үдийн цай”, өдөр өнжүүлэх бүлгийн сурагчдад хоол цайгаар үйлчилдэг. Түүхий эд, хүнсний бараа материалаа өөрсдөө зах зээлээс ханган нийлүүлдэг. Тус өдрийн хоол бэлтгэсэн махыг Хүчитшонхор захаас, бусад түүхий эдийн Барс захаас авсан бөгөөд сүүтэй шар будаа, борш, пирошки, луувангийн салат, бантан, будаатай хуурга, цуйван, бөөрөнхий махтай хоолоор үйлчилсэн байна.
Цайны газарт бэлтгэсэн хоол хүнс болон түхий эдээс 49 дээжийг авч, эрүүл зүйн нян судлал, хими, хор судлал, хүнд металлын шинжилгээнд хамруулаад байна. Шинжилгээний хариу 24-72 дараа гарна.
Тус сургуулийн цайны газрын үйл ажиллагааг Улсын байцаагчдын актаар түр хугацаагаар зогсоож, албан шаардлагаар илэрсэн зөрчлийг арилгуулахаар хугацаатай үүрэг өгсөн байна.
МХЕГ, НМХГ-ын даргын тушаалаар “Өвчин гарсан голомтонд тандалт хийх, таслан зогсоох, тулгамдсан асуудлыг шийдвэрлэх зорилгоор” ажлын хэсэг байгуулан ажиллаж байгаа бөгөөд хариуцлагатай жижүүр ажилуулан шаардлагатай арга хэмжээг шуурхай авч байна.
Тус сургуульд сурдаг сурагчидад хордлогын шинж тэмдэг илэрвэл яаралтай ХӨСҮТ болон харьяа дүүргийн өрхийн эмнэлэг, эрүүл мэндийн нэгдэлд хандахыг зөвлөж байна.
Зохиогчийн эрх хуулиар хамгаалагдсан. Мэдээлэл хуулбарлах хориотой.