Орос-Монголын хамтарсан 3-р сургуулийн хүүхдүүд энэ сарын 29-нд хоолноос хордлого авсан асуудалд Сүхбаатар дүүргийн цагдаагийн хэлтсийн мөрдөн байцаах 2-р тасаг Монгол Улсын Эрүүгийн хуулийн тусгай ангийн 138 дугаар зүйлийн 2-т заасан /Хөдөлмөр хамгаалал, эрүүл ахуйн журам зөрчих/, 172 дугаар зүйлийн 2-т заасан /Эрүүл ахуйн шаардлага хангаагүй хүнсний бүтээгдэхүүн худалдах/ үндэслэлээр эрүүгийн хэрэг үүсгэн шалгаж байна. Эрүүгийн хэрэгт тус сургуулийн эмч болон “Баяндаш” ХХК-ийн захирал нарыг холбогдуулан шалгаж байна.
Өнгөрсөн сарын 29-ны өдрийн 23:30 цагийн байдлаар ХӨСҮТ-д хяналт хийж хүлээн авахад 2010.01.29-ны өдрийн 14:30 минутад “Хоолны хордлого”гэсэн оноштой анхны хүүхэд 103-д дуудлагаар ирсэн байна. Уг хүүхэд 39 хэм хүртэл халуурсан, гэдэс базалсан, усархаг гүйлгэсэн, бөөлжсөн шинж тэмдэг илэрсэн байна.Одоогийн байдлаар Халдварт өвчин судлалын үндэсний төвд 126 хүүхэд хэвтэн эмчлэгдэж байгаагаас 2 хүүхэд эрчимт эмчилгээний тасагт эмчлэгдэж байна. Тус сургуулийн цайны газрыг “Баяндаш” ХХК нь сургуулийн захиргаатай гэрээ байгуулж хүүхдийн үдийн цай, өдөр өнжүүлэх ангийн сурагчдын хоол, багш ажилчдын өдрийн цайг бэлтгэн үйлчилдэг байна.Уг цайны газарт 11 хүн ажилладаг бөгөөд хоол хүнсний зүйлээ “Барс”,”Хүчит шонхор” захаас тодорхой тогтсон лангуу хувь хүнээс худалдан авдаг ба уг захууд ажиллахгүй үед “Далай ээж”, “Меркури” захуудаас авдаг байна.
Пирошкины мах нь хуршсан амттай байж
Хоолны хордлогонд хордсон хүмүүс нь өдөр өнжүүлэх ангийн багш, сурагчид ба тэдэнд зориулж тусад нь хийж бэлтгэсэн хоолны пирошки, луувангийн салалт зэргийг идсэн пирошкины мах нь хуршсан байдалтай исгэлэн гашуун амттай байсан гэж эмнэлэгт эмчлүүлж байгаа хүүхдүүд мэдүүлж байгаа нь пирошки, луувангийн салатнаас хордлого авсан байж болзошгүй гэж үзэж байгаа аж.
Хоолны газрыг цагдаагийн хамгаалалтанд авчээ
Мөрдөн байцаалтаар 42 хүнийг гэрч, хохирогчоор байцааж, цайны газарт нарийвчилсан шинжилгээг мэргэжлийн байгууллагаар хийлгэхээр битүүмжилж цагдаагийн байнгын хамгаалалтанд авсан байна. Хэргийн газраас хураан авсан дээжүүдэд шинжилгээ явуулахаар шинжээч томилж “Баяндаш” ХХК-ын захирал Б-гийн мэдүүлсэний дагуу хүнсний зүйлийг цуглуулсан газруудыг заалгаж мэдүүлгийг газар дээр нь шалган, худалдан авсан гэх хүнсний бүтээгдэхүүнүүдээс дээж авч шинжээч томилон хүргүүлээд байгаан байна.
Одоогийн байдлаар цайны газрын ажилчид болон ажлын байранд ямар нэгэн халдварт өвчний голомт байгаа эсэх талаар “Халдварт өвчин судлалын үндэсний төв”-ийн болон “Улсын мэргэжлийн хяналтын газар”-ын лабораторид хандаж шинжээч томилон хүргүүлээд байна. Эмнэлэгт хүргэгдэн эмчлэгдэж байгаа 113 хүүхдүүдэд ямар халдварт өвчний шинж тэмдэг байгаа талаар шинжээч томилж насанд хүрээгүй гэрч, хохирогчоор тогтоох мөрдөн байцаалтын хойшлуулшгүй ажиллагааг шуурхай явуулж эхэлжээ.
Цаашид нийтийн хоолны газрууд эрүүл ахуйн шаардлага хангасан нөхцөлд шинжилгээтэй баталгаатай хүнсний бүтээдэхүүнээр хоол, унд үйлчлэх, ариун цэврийн шаардлагыг бүрэн хангах, хоол, хүнсний аюулгүй байдалд тавих хяналт тавьдаг албан тушаалтнуудын ажлыг хариуцлага, шалгалтыг өндөржүүлэх шаардлагатай байгаа нь хэргийг шалгах явцад харагдаж байна.Энэ талаар цагдаагийн байгууллагаас иргэд, олон нийтэд сэрэмжлүүлж байна.
Зохиогчийн эрх хуулиар хамгаалагдсан. Мэдээлэл хуулбарлах хориотой.