Хуульч өмгөөлөгч Ч. Энхээ өнөөдөр сэтгүүчдэд хандаж мэдээлэл хийсэн юм. Түүнээс ямар шалтгаанаар ийнхүү мэдээлэл хийх болсон талаар нь зарим зүйлийг тодрууллаа.
-Та өөрийгөө Ардчилсан хувьсгалыг үүсгэн байгуулагчдын нэг гэдэг. Гэтэл таныг Ардчилалын 20 жилийн ойн медаллаар шагнагдаагүй талаар олон талын мэдээлэл хэвлэлээр цацагддаг?
-Тиймээ. Ардчилсан хувьсгалыг үүсгэн байгуулагчдын тэргүүн эгнээнд явж байсан хүмүүсийн нэг бол би. Гэхдээ энэ 20 жилийн хугацаанд нэг ч удаа шагнагдаж байгаагүй. Намайг Ардчилсан холбооноос олон удаа шагналд тодорхойлж байсан. Гэхдээ “Ард түмэн намайг мэдэж байгаа тиймээс шагнуулах шаардлагагүй” гээд татгалздаг байлаа. Харин Ардчилсан хувьсгалын 20 жилийн ой тохиож буй энэ өдрүүдэд Ардчилсан холбооныхон намайг та шагналаас олон удаа татгалздаг байсан харин энэ удаад тодорхойлох хэрэгтэй гэж хэд хэдэн удаа санал тавьж шахсан. Тэгээд л өөрийгөө тодорхойлоод өгчихсөн чинь эргээд намайг доромжлох хэрэгсэл болгоно гэж ерөөсөө бодоогүй. Хэвлэлээр цацагдаж байгаа мэдээллийг уншсан байх. Ч. Энхээ өөрийгөө том шагналд тодорхойлоод амруугаа алгадууллаа, Ерөнхийлөгчийн сонгуульд хэнийг дэмжихээ мэдэж бай, Аюулаас хамгаалах яамны тагнуул байсан, гэхчлэн. Үүн дотор хамгийн үнэнд ойрхон мэдээлэл нь Ерөнхийлөгчийн сонгуульд хэнийг дэмжихээ мэдэж бай гэсэн мэдээлэл нь байх.
-Тагнуул байсан талаар мэдээлэл байдаг. Энэ талаар та үгүйсгэж байгаа хэрэг үү?
-Намайг тэгж хэвлэлээр их бичдэг. Энэ ор үндэслэлгүй зүйл, тухайн үед тийм байгууллага байдаггүй байсан. Би тэгэхлээр байхгүй байсан байгууллагын тагнуул байж таарах уу.
-Шагнал олгогдоогүй талаарх мэдээлэл янз бүрээр л яригдаж байна. Яг таны бодлоор яагаад шагнал олгогдоогүй вэ?
-Би дээр дурьдсан. Ерөнхийлөгчийн сонгуульд хэнийг дэмжихээ мэдэж бай гэсэн утгатай мэдээлэл байсан. Тэр л байх. Би угаасаа Н.Энхбаярыг ерөнхийлөгч байхад нь тамгийн газарт нь ажиллаж байсан. Тэглээ гээд шагналын байдал буурна гэж бодож байсан ч бүр ингэнэ гэж бодоогүй. Ардчилсан хувьсгалын анхны цуглаанд нь хамгийн их үүрэгтэй оролцож байсан 4 хүний нэг нь би шүү дээ. Тухайн үед цуглааныг 1989 оны арванхоёрдугаар сарын 9-ны өдөр миний нэрээр хийж байсан. н.Гарамжил генералыг Цагдаагийн хэв журмыг хамгааллын албаны дарга байхад нь цуглаан хийх зөвшөөрөл хүссэн бичгийг би өөрөө ширээн дээр нь гаргаж тавьж байсан. Ямар нэгэн асуудал эмх замбараагүй байдал үүсвэл өөрийн биеэр хариуцна гэж байлаа. Гэтэл тухайн үед нуугдаад зугтааж байсан хүмүүс нь өнөөдөр баатар болчихоод сууж байна шүү дээ.
Ардчилсан холбоог анх “Дэвшилтэд залуучуудын холбоо ” гэсэн нэрээр Дарь Сүхбаатар бид хэд зохион байгуулж байсан. Харин Ц. Элбэгдорж, Э. Бат-Үүл нарыг энэ холбооны хаалгыг тогшоод “ нэгдье” гээд орж ирж байхад нь би хойморт нь сууж байсан хүмүүсийн нэг. Хамгийн гол нь миний хийсэн болгоныг үгүйсгээд байгаа юм. Тэрнээс би шагнал авахдаа гол нь биш шүү дээ. Угаасаа 20 жил шагнал аваагүй цаашаа хэдэн ч жил шагнал авахгүй байж чадна. Гомдохгүй ш дээ. Энэ төрөөс би дахин юу ч горьдохгүй. Намайг иргэнээ гэж бодохгүйгээр тэтгэвэр тэтгэмж олгохгүй байсан ч болно. Би өөрийгөө энэ төрөөс чөлөөллөө гэж хэлж болно. Харин АН-аас өөр ямар ч Төрийн ч бай Төрийн бус ч бай ямар ч байгууллагатай хамтарч ажиллах болно гэдгээ энэ дашрамд мэдэгдье. Миний нэр хүндийг унагах гэж янз бүрийн сөрөг мэдээллүүдийг ч олон цацаж байгаа.
-Нэр хүнд унагах сөрөг мэдээлэл гэлээ. Энэ талаар тодруулахгүй юу?
-Намайг хүн чанаргүй. Хүн биш гэж хувийн амьдралыг минь хүртэл сөхсөн байна лээ. Би энэ талаар тайлбар хийж болно. Намайг эхнэрээ шоронд хийсэн гэж гүтгэж байгаа юм. Миний эхнэр байсан хүн гэж ярья л даа.
Тэр хүн миний төрсөн ээж, ах хоёрыг залилсан байсан. Тухайн үед намайг өмгөөлөхийг хүссэн ч би өмгөөлөөгүй ээ. Би тэр хүнээс илүү ээжтэй хайртай байсан болохоор хүн биш болж байгаа юмуу.
-Танаас гадна өөр шагнагдаагүй үлдсэн хүмүүс бий юу?
-Хэвлэлийн хурал хийх болсон шалтгаан нь бас нэг нь энэ. Анхны цуглаан болж байх үед чухал гэсэн үүрэг гүйцэтгэж байсан маш олон хүн байгаа шүү дээ. Цуглаан болж байхад залуучуудын соёлын төвийн цахилгааныг тасалж байсан тухайн үед тэр гэрлийг таслуулахгүй гээд эх үүсвэр дээр нь дөрөв таван залуусыг зогсоож мануулж байсан. Мөн энд тэнд техникийг нь хариуцаж байсан хүмүүс ч мөн байгаа . Тэднийг өнөөдөр шагнагдсан үгүйг мэдэхгүй байна. Аягүй бол шагнагдаагүй байгаа болов уу гэж бодож байна.
Г. Анир
Зохиогчийн эрх хуулиар хамгаалагдсан. Мэдээлэл хуулбарлах хориотой.