ОБЕГ-ын дарга асан генерал П.Дашийг албан тушаалаа урвуулан ашиглаж, 177 сая төгрөг завшсан гэдэг үндэслэлээр Авлигатай тэмцэх газар шалгаж байсан билээ. Энэ хэргийг УМБГ-ынхан хоёр жил гаруйн хугацаанд шалгаж буй юм. Тэгвэл, УМБГ-ынхан энэ хэргийг дахин нягтлах үүднээс өмгөөлөгчийнх нь хүсэлтээр тусгай шинжээч томилж, уг хавтаст хэрэгт гол баримт болж байгаа зарим баримтыг шалгасан бөгөөд П.Дашийг улсад 177 сая бус 40 сая төгрөгийн хохирол учруулсан хэмээн үзсэн байна. Гэвч үүнийг өмгөөлөгч нь эсэргүүцэж “П.Даш улсад ганц ч төгрөгийн хохирол учруулаагүй, иймээс дахин шалгах ёстой” гэсэн ажээ. Дашрамд дуулгахад, энэ хэрэг тун удахгүй Нийслэлийн прокурорт шилжих бөгөөд мөрдөн байцаагч Өршөөлийн хуульд хамруулах тухай хүсэлтэй байгаагаа өмгөөлөгчид нь уламжилсан байна. Гэвч П.Даш болон түүний өмгөөлөгч нар мөрдөн байцаагчийн тавьсан хүсэлтийг эсэргүүцэж “П.Даш улсад ямар ч хохирол учруулаагүй. Иймээс Өршөөлийн хуульд хамруулах бус харин шүүх гэм буруугүй болохыг нь тогтоох ёстой” гэсэн байна.
С.Заяа
Зохиогчийн эрх хуулиар хамгаалагдсан. Мэдээлэл хуулбарлах хориотой.