Хип хоп сонирхогчдын дунд Gee нэрээрээ танигдсан “Click click boom” бүлгийн гишүүн, дуучин Т.Мөнх-Эрдэнэтэй ярилцлаа.
-Танай бүлгийн “Hood” нэртэй дуу гарсан даруйдаа олны сонирхлыг татаад байгаа. Уг дуу хэрхэн төрсөн талаар ярихгүй юу?
-Анх "Vanqush" хамтлагийнхан энэ дууны аяыг надад өгөөд ямар сэдэвтэй дуу хийх талаар ярилцсан юм. Тэгээд надад нэг бодол төрлөө л дөө.
-Ямар?
-Төрсөн газар буюу бидний хэлдгээр "дош"-ны тухай дуу хийе гэж. Тэр олон залуус нийлээд хайр ч юм уу, өөр ямар нэг зүйлийн талаар дуулах нь утгагүй санагдаад. Манай бүлгээс Дисант бид хоёр дуулсан юм. Ур чадварын хувьд энэхүү бүтээлийг давахаар дуунууд олон байгаа л даа. Харин сэдэв болоод агуулгын хувьд олныг хамрах дуу болж чадсан болов уу. Хэн бүхэн өөрсдийнхөө төрсөн газрын тухай дуу гарвал сонсох нь ойлгомжтой шүү дээ.
-Хип хоп хамтлаг, хип хоп бүлэг хоёр юугаараа ялгаатай юм бэ. Манай залуучууд сонирхож байгаа байх?
-Бидний өмнөх үед хип хоп бүлэглэл гэж байсан. Анх Монголд хип хопыг үүсгэж байсан "Дайн ба Энх", "Эрх чөлөө" гэх зэрэг хамтлагуудаас бүрдсэн "Байлдан дагуулагч" гэж бүлэг байв. Бүлгийн хувьд хамтлагаас арай өөр. Бүгд дуулдаг байх албагүй. Гэрэл зураг авдаг, найруулдаг, жүжиглэдэг гээд бүрэн цогц байж хэн нэгэндээ туслалцаа үзүүлж чадахуйц хүмүүсийг бүлэг гээд байгаа. Харин олон нийтэд буруу ойлголт төрдөг юм шиг байна лээ.
-Ямар?
-Бүлэг гэхээр л олноороо нийлж байгаад буруу үйлдэл хийдэг, бараг буруу замаар явж байгаа хүмүүс гэж ойлгодог шиг. Тийм биш юм аа. Өөрсдийгөө зөв зүйлийн төлөө эвлэлдэн нэгдэж, тэмцэж буй залуучууд гэж боддог шүү.
-Өнгөрсөн хугацаанд хэдэн цомог гаргав. Бүлгээрээ нийлж тоглолт хийсэн үү?
-"Мөнгөгүй хүний цомог", "Боловсролгүй сэхээтний тавигдахгүй илтгэл" нэртэй хоёр цомог гаргасан. Гурав дахь цомгоо цагаан сарын дараа гаргана. Өнгөрсөн оны есдүгээр сарын дундуур бүлгээрээ нийлж "Үл хөдлөх хөрөнгө" нэртэй тоглолт хийсэн. Одоогоор нийлж хийсэн юмгүй л байна. Хувь, хувьдаа уран бүтээл хийгээд л явж байна даа.
-Хип хоп дотроо олон урсгал байдаг. Таны хувьд ямар урсгал, стилиэр нь дуулдаг вэ?
-Би өөрийнхөө стилийг тийм ийм гэж тодорхойлдоггүй ээ. Олон нийтэд хэлэх гэсэн үгээ дуугаараа илэрхийлдэг. Тийм болохоор үүнийгээ би монгол рэп гэж нэрлэдэг.
-Монголд энэ урлагийн чиглэлээр сургалт дамжаа гэж байдаг уу. Энэ стилийг сонирхож буй залуус хаана хандвал зүгээр вэ?
-Хип хоп бол гудамжны урлаг. Ер нь бол зааж сургана гэсэн юм байхгүй. Бид өөрсдөө л мэдрэмжээрээ үг аяа хийгээд дуулдаг. Надаас зарим хүүхдүүд асуудаг л даа. Яаж хип хоп дуулж сурах вэ гэж. Тэд нарт хандаж хэлэхэд монгол хэл, уран зохиолын хичээлээ сайн хийгээрэй гэж хэлмээр байна. Үгийн баялаг хип хопод маш чухал. Үгийн баялгийг бид энэ орчин тойрноосоо авна гэвэл хангалтгүй.
-Гадны дуучдаас хэнийг харж үлгэр, дуурайлал авдаг бол?
-Сонсдог, үгийг нь биширдэг рэпэрүүд олон байдаг. Тэрнээс яг дуурайж дуулдаггүй. Тэдний хэлж байгаа үг, хийж байгаа үйлдлээс нь авахыг нь аваад, хаяхыг нь хаяад л явдагдаа.
-Найз охинтой юу. Өөрийг чинь Дуучин Б.Маралжингоотой хайр сэтгэлийн холбоотой гэдэг. Энэ үнэн үү?
-Найз охин байгаа. Маралжингоо бид хоёрын дунд хайр сэтгэлийн асуудал байсан. Нуугаад яахав. Одоо бол тийм зүйл байхгүй. Тэр асуудал хэдийнэ өнгөрчээ.
-"IСЕ ТОР" хамтлаг валентины баярын өдрөөр тоглолт хийнэ гэж байна. Тэрхүү тоглолтод оролцох уу?
-Манай бүлгийнхэн ойрд тоглолт хийхгүй ээ. "IСЕ ТОР" хамтлаг валентины баяраар тоглоно гэж байсан. Одоогоор бид нарт дуулаач гэсэн санал ирээгүй байна. Оролцлоо ч гэсэн тэнд ирсэн хосуудыг баярлуулаад байх хайрын дуу бидэнд байхгүй. Тийм учраас бидэнд санал тавихгүй байж болох юм.
-Өөр стилиэр дуулж байв уу. Зохиолын дуу ч юм уу?
-Багадаа сургуулийн урлагийн үзлэгт оролцохдоо зохиолын дуу дуулж байсан. Мөн ардын дуу ч дуулж байв. Түүнээс хойш нийтийн болон ардын дуу огт дуулаагүй юм байна.
-Хип хопчдын хувцас тийм байх ёстой гэсэн тогтсон загвар байх уу. Ихэнх нь томдсон өмд, цамц өмсөж байгаа харагддаг?
-Хувцас бол тухайн урлагаа дагаад хөгжиж байдаг зүйл л дээ. Хип хопчид ихэвчлэн томдсон хувцас өмсдөг нь үнэн. Уг урлаг маань өөрөө барууны ядуу, хар арьстай залуучуудаас үүсэлтэй юм. Том размерийн хувцсыг тэр бүр хүн худалдаж авдаггүй болохоор хямдхан байдаг. Тиймээс "харууд" их авч өмсдөг байсан юм билээ. Түүнээс үүсэлтэй л дээ. Манай бүлгийн хувьд "Монголд үйлвэрлэсэн бараа"-наас хувцсаа авдаг. Учир нь монгол бараа маш хямдхан, бас том байдаг.
-Өөрийг тань FМ-д хөтлөгч хийдэг гэж дуулсан юм байна. Энэ тухайгаа тодруулахгүй юу?
-Тийм ээ. Би 98.9 РМ-д чөлөөт цагаараа хөтлөгч хийдэг. Ер нь миний мэргэжил бол сэтгүүлч шүү дээ.
Боловсрол:Дэлхийн хэмжээний мэргэжилтэй монгол залуус Шинэхэн сурагчиддаа хичээлийн хэрэгсэл бэлэгллээЦагдаагийн мэдээлэл:Траншейнд амьдарч байсан иргэд нэгнийхээ амийг хөнөөжээ Цагдаагийн байцаагчидад сургалт явууланаОнцгой байдлын газрын мэдээлэл:105-аас мэдээллэж байна Он гарснаар 90 хүн усанд осолджээАвилгалтай тэмцэх газрын мэдээлэл:Төрийн үйлчилгээ хувь хүмүүсийн бизнес болж буйг таслан зогсоохоор[...] АТГ БНХАУ-ын Авлигаас урьдчилан сэргийлэхгазар хамтын ажиллагааны[...]Нийслэлийн мэргэжлийн хяналтын газар:Үдийн цай хөтөлбөрийн хүрээнд хүнсний 11 үйлдвэрт шалгалт явуулжээ Боловсролын байгууллагуудад хийсэн шалгалтаар 2585 зөрчил илэрчээ |
Зохиогчийн эрх хуулиар хамгаалагдсан. Мэдээлэл хуулбарлах хориотой.