Гүн-Галуутайн АЯЛАЛ

Түгээх    
2011-09-28 09:02:31 - Нийслэл

gun-galuut

Шинэ үеийн утга зохиолыг үндэслэгч Д.Нацагдорж өөрийгөө "Гүн Галуутай"-д төрсөн гэж бичүүлжээ. Дөнгөж хорин хэдхэн насандаа тэр үед ёстой цоорч байсан их бичгийн хүн төрсөн нутгаа хүртэл тийм яруу оноож хэлсэн байх юм. Уг нь одоогоор бол "Шанаган тав"-ын "Аяга" гэж хэлж болохоор газар л даа. Төв аймгийн Баяндэлгэр гээд  Багануурын уурхайн хажууд мартагдах шахсан буйдхан бяцхан сум бий. Нүүрсний уурхайн овоолгын өмнө зэрэгцээд Их, бага Гүн гэх тойром нууртай. Нуурны цаахна Галуутайн горхи зүүн тийш жаахан урсаад Хэрлэн мөрөнд цутгадаг. Голын хойд энгэрийг Аяга уул гэх агаад өмнөх Шинэ булаг гэдэг горхитой арыг Байц, Сүмбэр, Бэрхийн уулс гэнэ.

Сүүлд "хохь" хэмээн засварласан Чингэсийн удамт тайж Дашдоржийн хүү Нацагдорж Их Хүрээнээс холгүй энэ л нутагт өсч төрсөн юм. Түүний шүлгэнд мөнхөрсөн "Уурхай баялгийн охь болсон" Багануурын уурхайн энэ хавийг цаашид Гүн Галуутай гэх холбоо уянгалагаар дуудах болжээ. Тэрээр "Миний нутаг" шүлгэндээ

"...Салхины үзүүрт найгасан соргог нарийн ногоотой

Саруул талд яралзсан сонин янзын зэргэлээтэй

Сайн эрс цугларсан байц бэрх газартай

Сүлд тахилга улирсан сүмбэр их овоотой..." гэсэн хэсэгт өссөн төрсөн нутгийнхаа уул усыг маш цэвэрхэн оруулсан байгаа юм. "Миний  нутаг" нь Хэнтий, Хэрлэн хоёроор эхэлдгийн учир нь түүний л нутаг аж.

Улаанбаатараас 130 км, Улаанбаатарын Багануур дүүргээс гэвэл арав гаранхан километр зайд Гүн-Галуутайн орон нутгийн тусгай хамгаалалт бүхий  байгалийн цогцолборт аялал жуулчлалын газар байгуулагдаад нэлээд олон жил болж байна. Монгол орны талхлагдаагүй үлдсэн онгон байгаль, ан амьтан,  эвдрээгүй малчин зоны амьдралыг үзэх гэсэн гадаад дотоодын жуулчид ийшээ хөл тасардаггүй. Аялал жуулчлалын олон улсын том, том шагналуудаар эдний "Селена Трэвэл" компани, "Гүн-Галуутай" бааз шагнагдан манджээ. Гадаадынхан Нацагдоржийг гээд ирээд байгаа юм биш. Энд ирээд бас Нацагдорж гэдэг мундаг бичгийн хүн төрснийг мэдэж авцгаадаг. Тэгэхээр энд хүн сонирхох, саатах  өөр шалтгаан бий. Даруухан ийм газраас анх очсон хүн гайхамшгийг эрээд олдоггүй юм билээ. Байдаг л уул ус, хэдэн малчин, жуулчны ганц бааз. Гадаад талдаа зад рекламдсан байхаас зайлахгүй гэсэн бодлоор очоод үзсэн.

Жуулчилдаг хүмүүсийн ихэнх нь юм үзэж нүд тайлсан байдаг. Тэдний очиж үзэхийг хүсдэг нэг хувилбар бол Монголын хөдөө юм билээ. Их өндөр зардлаар манай оронд ирчихээд дахиад түүнээсээ дутахгүй төлбөр төлж олон зуун километр сэгсчүүлж нөгөө хөдөөгөө хайх хэрэг гардаг. Гэтэл их санасан газар есөн шөнө хоосон гэгч болох ч бий. Үнэндээ манай хөдөө чинь Улаанбаатарын хажууд л оригоороо байсаар ирсэн юм. Энэ талаар интернетээр цацсан мэдээллийг олж уншсан гадаадынхны сэтгэл ханамж тохирч нааш ирсугай гэх болжээ. Энд ирэгсдэд зориулж орой болохоор гэрт нь лаа барьж өгөх юм. Зууханд ассан гал чад пад хийнэ. Гадаа адуу янцгаана. Тэртээх олон тойром бүрдээр дүүрэн шувууд ганганана. Хойд энгэрт тарвага хошгирно. Энэ хавийн найрал хөгжим, диско нь энэ хэд. Орчин үеийн юм гэвэл ариун цэврийн сайн өрөө, усанд орох боломжийг л хангаж өгчээ.

Аялал жуулчлалынхны хэллэг болсон менежмент гээч нь Гүн-Галуутайд тусгалаа олохдоо энэ хавийг жаахаан янзалсан юм билээ. Тэгэхэд л бараг дэлхийд алдартай жуулчны бүс болох зам нээгдсэн. Тус баазыг үүсгэн санаачлагч нь Биологийн ухааны доктор Ж.Батболд гээд залуу байдаг. Тарвага судлалын чиглэлээрх манай нэртэй эрдэмтдийн нэг. Тарвагаа өмөөрсөөр байгаад агнуулахыг нь болиулж чадсан.  Дараа нь энд тэнд  тарвага нутагшуулж яваа дуулдсан. Ингэсний үр дүнд мэр сэр боодог хийчих хэдэн "хулгар шар"-тай болгоод өгсөн ачтан.

Батболд  Нацагдорж хоёр нэг сум, Галуутайн голынх юм байна. Тэрээр Хэрлэнгийн зүүн эргийн дагуу уртаашаа хорь гаран километр нутгийг орон нутгийн хамгаалалтанд авахаар хөөцөлджээ. 2003 оноос. Эхлээд ч яахав Нацаг найрагчийн буурь тоонот энэ тэр гэж нутгийн удирдлагын амыг нааш нь татаж цааш нь зугуухан гараа явуулж малчидтай хамтран нөхөрлөл байгуулсан. Ингээд Хустайн байгалийн цогцолборт газрын хагас хэмжээ бүхий газрыг нүд салгахгүй харж хамгаалах эзэнтэй болгоод авчээ. Айлуудын өвөлжөөг нүүлгэсэн. Багануур дүүрэг гэх их хотын хаяанд сийрэгхэн, буйд орчныг чухам яаж бий болгож чадсан нь нууц. Орчин цагийн бизнесмэнүүд шиг уул давсан хашаа хороо барьж, манаач секирюти болоогүй. Нутгийн иргэдийг ч хөөж туугаагүй. Энд нэг л мэдсэн хөндий дүүрэн тарвага язагнаж, ууланд нь хаашаа л харна аргаль угалз давхилдан, Хэрлэнгийн баруун эрэг бараадаад нөгөө устах шахсан тул загас хүрээд ирчихэж. Тарвага үзэгдэхээ болиод нүдний гэм болчихсон үед Хустай, Гүн-Галуутай хоёрт л урьдынх шигээ хошгирч байсан.  Бүүр ховор амьтан Цэн тогоруу гэдэг жирийн тогоруунаас хавьгүй том аварга алаг шувуу одоо дэлхий дээр үндсэндээ устаж байгаа гэлцдэг. Энэ шувууны барааг харсан хүн урт насалдаг гээд эрэл сурал болцгоодог. Мөн үүнтэй адил хувь заяа тосох цагаан тогоруу гээд дэлхийд олдохоо больсон усны шувууд Шинэ булгийн адаг намган дунд одоо ч тайван амгалан нисч явна билээ. Галуутайн гол Хэрлэнтэй нийлдэг энэ хэсэгт хүн мал ойртохын аргагүй тал нутгийн өвөрмөц намаг тогтсон газар. Жилийн жилд хэдэн арваараа үхэр адуу живдэг уламжлалтай. Шувуудын хувьд бол газрын диваажин. Эрдэмтэд зөвхөн энэ өчүүхэн намган дотор 109 зүйлийн усны шувуу байгааг тоолжээ.

Хүмүүст хамгийн ойрхон ийм бэлэн зоопарк үнэ төлбөргүй байдгийг тэр болгон анзаараагүй байх юм. Ер нь Улаанбаатараас зүүн тийш жаахан яваад Баянгийн даваа давмагц Монголын хээр тал үргэлжилдэг. Их хотоос шууд талын ганц гэрүүд залгадаг.  Замын урд харалдаа Бөөрөлжүүт, Галуутын тал гэх сайхан тавиу хөндийнүүдийг "Нууц товчоо"-нд Саарь хээр, Гүн нуурыг "Харилт нуур" гэж бичсэн нь тогтоогдсон. Үеийн үед энэ л орчиндоо нүүдэллэж хожим Дархан чин вангийн хошууныхан гэгдэх болсон энэ нутгийн малчин ардууд уламжлалаа төдийлөн гээлгүй одоо цагтай золгосон юм. Чоно үүрэндээ өлзийтэй гэгчээр хүрээ хотын нөлөөнд тэгтлээ уусаагүй үлдэж хоцорсон малчид юм. Бужигнасан олныг тойрон нүүж суухдаа сүү саальны наймаа хийж "Шанаган тав" хоч авсан байх. Дуртай цагтаа хотын хүн болох бүрэн боломжтой малчид энэ байдлаараа аж төрөх нь  хамаагүй ашигтай тул бүх л үеийн турш мал идээгээ орхиогүй. Гадаадын жуулчид эндхийн уугуул айлд ороход  ерөнхийдөө нүүдэлчний соёл, заншлаар  хангалттай мэдээлэл авчих боломжтой. Аль ч айлд ороход бурхан тахил, гаанс хөөрөг, хөхүүр, үхэр тэрэг нь гадна дотноо  хэвээрээ байдаг нь хоцрогдсон гэхээсээ чамирхацгаадаг гэвэл оновчтой. Нүүдэлчид хотоос алсрах тусам хөдөө царайндаа зовниж, арай л туфль өмсөж үнээгээ саах нь холгүй юм болцгоодог. Тэгвэл эндхийнхэнд алс хязгаарт амьдарч бүхнээс хоцрогдсон гэдгээ нуухын зовлонгүй.  Түүн дээр нь тулгуурлаад "Талын Нүүдэлчид", "Монголын нэг өдөр" зэрэг хөөрхөн арга хэмжээ зохиож гадаадынхныг баясгачихдаг. Гэр барих уралдаан түүний хажуугаар нүүдэлчид угтах ёс заншил, морь хувцсаараа гангарсан хосын уралдаан,  гүүн зэлэн дээрээс унага тавьж бооцоотой уралдуулах хүртэл өвөрмөц бас зугаатай арга хэмжээнүүдийг хийж орлого олоод сурчихжээ. Гэр хурдан барилтын тэмцээнд түрүүлсэн малчин 400 мянган төгрөгийн шагнал авлаа гэсэн. Нутгийн иргэд улам амь нэгтэй байх холбоо байгуулан энэ бизнесээ явуулын ашиг харагчидтай хуваалцах дургүй. Гадаадынханд сарлаг унуулж зуны хэдэн сардаа мөнгө олох гэсэн өөр малчинг хөөгөөд явуулчихсан байна билээ. Мөн өөр жуулчны баазыг ч хамар цухуйлгалгүй хавчдаг.

Европод Газар дундын тэнгисийн хэд хэдэн арал жуулчдын ачаалалд дарагдан талхлагдаж сүүлдээ хүн амьдрахаа больсон гэдэг. 1970, 80-аад онд болсон энэ явдлаас хойш "Хариуцлагатай аялал жуулчлал" гэсэн шинэ нэр томьёо бий болсон юм билээ. Энэ нь байгаа юмыг байгаа чигээр нь байлгах, хэт орчин үеийн технологи нэвтрүүлэх, нутгийн оршин суугчдын амьдрал, сэтгэл санааг эвдэхгүй байлгах гэх мэтийн өөр хандлага бий болсон байна. Хариуцлагагүй аялал жуулчлал одоо манайд аялал жуулчлалын салбар дөнгөж хөгжиж эхлэхтэй зэрэгцэн үүсээд байгаа. Байгалийн үзэсгэлэнт Тэрэлж гэхэд хог новшиндоо дарагдан, чанартай чанаргүй өчнөөн бааз, тэмээ морь хөтөлсөн халтуурчдаар дүүрлээ. Лагерь хуарангийн байдалтай болоод ирвэл жуулчид өндөгөө голсон шувуу шиг дүрвэчихдэг аж.

"Гүн-Галуутай" жуулчны бааз дээр очоод харж байхад намар орой болсон ч янз бүрийн хүмүүсийн хөл тасрахгүй байв. Европын орноос ирсэн цэл залуухан аялагчид аль болох чимээгүй шаардлага тавин шар айраг шимэн гадаа налайцгаана. Дараа нь Хэрлэн мөрөн дээгүүр хөвдөг завиар уруудан наадаж, Бэрх уул руу машинаар дөхөж очоод аргаль угалз заан шуугилдацгаана. Харин хэдэн солонгос нөхөд ёстой дуужуур юмаа. Мөнгө төгрөг дээрээ татганалдан хэл ам хийх ба малчны гадаа очсоноо хамар амаа таглаж маяглацгаагаад л. "Азийн бар" болсон хангуг найз нарын маань  баруунжих нүдний ялгаа нь сайн гараагүй шив. Шал хөдөө хувцасласан цагаан царайтай малчин залуу гэнэт солонгосоор өөдөөс нь дуржигнатал ярьж тэднийг ёстой ангайлгав. "Би танай оронд электроникийн үйлдвэрт ажиллаж байсан. Одоо ирээд малчнаа хийж байна. Энд бүдүүлэг юм ерөөсөө байхгүй эрхмүүдээ..." гэж хандыг нь дарсан гэнэ.

Тусгай хамгаалалтанд авсан газар нутгийн гүнд хэн нэгэн өвөлжөө барин өвөлжөөн дээрээ малаа авчран тухалсан байв. Тэднийх баруун аймгаас малтайгаа нүүж ирсэн мянгат малчин Хоомагсар  гэгчийнх аж. Энэ айлын мал бэлчээртээ багтахгүй олон бөгөөд цагаан зээр, угалзын нутгийг булаасан байна. Тэгээд зогсохгүй эднийхээр жуулчид бус хулгайн анчид орогнон  гөрөө хийдэг сурагтай.

Энэ хавийг "Хустайн нуруу" шиг улсын дархан газар болгочих вий гэж түгшдэг хэсэг бий гэнэ. Тэгвэл ийшээ дураараа нүүж, ан гөрөө хийх, загасчлах боломжгүй болно гэсэн үг. Уг нь бол Баяндэлгэрийн нийт нутгийн нэг хувьтай  тэнцэх өчүүхэн хэсэг дээр ийм хэл ам болж байгаа хэрэг.

Монгол дахь орчин үеийн аялал жуулчлалыг хэрхэн ашигтай болгох менежмэнтийг ойлгохыг хичээсэн юм. Жуулчлал нь манай эдийн засагт их нэмэр болох ирээдүйтэй салбар гэдгээ хэн хүнгүй мэдээд байгаа. Гэхдээ л олигтой явж өгдөггүй. "Женко тур"-ын аварга том Чингэсийн цогцолбор л одоохондоо нүүр тахлаж байна. Цаашид ийм байгууламж олноор хийх гэхээр хөрөнгө нь хаа байна, зардлаа хэзээ нөхөхөв гэсэн асуултад бүдрэнэ. Тэгээд ч гадаадад энэнээс том гоё байгууламжууд хаа сайгүй л бий.

Юмс байх ёстой байрандаа байгаа, хэлбэр хөөцөлдөөгүй ахуй нь хэзээ ямагт нүдэнд дулаахан харагддаг аж. Их хотын нүргээн, үргэлжийн гайхамшиг, цочрол, адал явдлууд хүнийг яваандаа залхаадаг байлгүй. Ганц удаа ч болов өнгөн хөрсөн дээрээ бууж үзмээр санагдах нь зүй. Тийм газар хайгаад ирэхэд нь өмнөөс  бас нэг шалихгүй хачирхал бодоод олчихсон нөгөөдөхөө рекламдаад салдаггүй яршиг төвөг жуулчлалын шат шатанд бий.  Жуулчдыг зугаацуулж мөнгө саах гэж байгаа нь энэ гээд нум сумтай баатар гэрийн хойморт сууж, хатан өмсгөлтэй эхнэр нь болхидуухан жүжиглээд л. Өөр бас яадаг ч юм. Гадны хүн ирэхлээр нэг дүрд хувирдаг явдлыг үзэх гэж тэр холоос ирээгүй. Бүр эсрэгээр бүдүүлэг тэнэгээ дэлгэж шившиг болмооргүй байдаг. Энэ хоёр туйлыг маш нарийн менежментээр зохицуулахад ухаан хэрэгтэй. Монголын аль нэг хязгаар нутагт хэсэг айлыг дундад зуунаар нь амьдруулж үзүүлэн болговол уг нь гоё. Ашгийн төлөө нэг хэсгийгээ ингэж доромжлох нь наанадаж хүний эрхийг зөрчсөн болно. Харин Улаанбаатар, Төв аймгийн орчинд хөдөөг хөдөөгөөр нь байлгахаар бараг дуурайгаад амьдарчихмаар бодол төрдөг. Энд газарзүйн байрлал хөгжлийн ялгаанаас хамаарч зохимж үүсдэг байна. Гадаадын тэнэмэлүүд гэгч бадарчны сүрэг хөдөөгүүр ганц хоёроороо их доншуучлах болсон. Тэднийг очсон орон бүхэн нь ад үздэг. Манайхан ч бас "Үүргэвчтэй аялал" хийдэг. Тэнэмэлүүд Монгол нь хир дагандаа баригдсан, түүхий мах иддэг, морь унаж хичээлдээ явдаг гэхчилэн их эвгүй зураглал түгээдэг. Олон хүн бидний мууд дурлан нааш ирэхэд нь шал өөр сэтгэгдэл, тэгэхдээ бүр амьдралын илүү аятайхан хувилбарыг харуулж өгөх нь жуулчдын байгууллагын эх оронч үүрэг юм. Ингэхийн тулд малчид уламжлалаараа атлаа атаархам аз жаргалтай амьдарч буй жишээ хэрэгтэй. Тэр нь хэлбэр төдий биш жинхэнээсээг хэрхэн мэдрүүлэх вэ? Үнэхээр нүүдэлчид аз жаргалтай амьдарч болох уу? Гадаадын жуулчдын өмнө Египетийн пирамидийн гуйлгачид шиг сохор зоосны төлөө чичрээд шавахгүй ч зохих хэмжээний үнэ хөлсөө тооцоод сайхан үйлчилчихдэг байх нь мэдээж.

Ийм орчинг бүрдүүлэхийн тулд улс төр нийгмийн асуудалтай хутгалдах зайлшгүй шаардлага гараад ирнэ. Монголын байгаль орчны иргэний зөвлөлийн тэргүүн, Биологийн ухааны доктор Ж.Батболд энэ гаргалгааг тайлахаар ажиллах болжээ. Тэрээр олон жил эрдмийн ажил хийж биеэ зассан. Дараа нь компани байгуулж гэрээ ч засаа биз. Одоо бусдын төлөө ачаа үүрэх насан дээрээ ирлээ гэж байна.

"Салхины үзүүрт найгасан соргог нарийн ногоотой..." их Нацагдоржийн нутаг, түүний хойч үеийнхэнтэй уулзаад буцахад үлэмж сайхан сэтгэгдэл төрсөн билээ. Хүмүүс нь, нутаг нь, ан амьтан нь  "Миний нутаг" ийм л шүү дээ гэсэн шиг намар оройн шар наран дор хачин амгалан налайна. Баазын зассан явган хүний цардмал замаар хэдэн зараа цуваад явж байх юм. Дээвэр дээр алтан хараацай дулаан Африк руугаа мөд явах шинжгүй тухалж. Хашааны цаадах дошин дээр луглайсан хөгшин бурхи өдөржин үүрэглэн зураг хөргөө татуулна. Тэртээх саахалтаас уруул чимчигнэм айраг ганзагалаж ирсэн "Хуучин хүү" "Урд шөнө хотонд чоно ороод..." хэмээн ярина. Эгэл жирийн амьдрал энэ мэт хөврөх нь нээрэн атаархам.

Ж.ГАНГАА



Энэ МЭДЭЭ танд таалагдаж байвал Like хийгээрэй. Танд баярлалаа.
Манай САЙТ танд таалагдаж байвал Like хийгээрэй. Танд баярлалаа.
Сэтгэгдэлүүд
Нийт 3

Bayarmaa (202.70.*.*)
2012-02-24 10:56:18
Hi ene amraltand 3honohod hed baidag we medeh hun bwl nad uruu yawuulchaach tghuu bayarmaa_0802 ok zawal medeed ogooch nzuudtagaa ywj amrah gsiin

Адийхүү (202.179.*.*)
2011-09-28 19:32:27
Сайхан нийтлэл...

Bat (202.131.*.*)
2011-09-28 15:51:46
Ene amraltand chini l daraa zun neg ochij amray. Bur ochij uzmeer sanagdachlaa.

Сэтгэгдэл бичих

АНХААРУУЛГА: Уншигчдын бичсэн сэтгэгдэлд Medee.MN хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Таны нэр:


Таны сэтгэгдэл:


Шинэ мэдээ
2014-10-02 17:55:45 - Нийслэл
Монголд амьдардаг хятадууд үндэсний баяраа тэмдэглэжээ
2014-10-02 17:44:25 - Гадаад
ОХУ АНУ-тай сурагч солилцох хөтөлбөрөө түдгэлзүүлжээ
2014-10-02 17:28:27 - Шар
Моника Белуччи: Хөөрхөн байх үнэхээр хэцүү
2014-10-02 17:26:19 - Нийслэл
Ажлын уялдаагүйгээс Яармагийн шинэ замыг дахин сэтлэв
2014-10-02 17:05:52 - Орон нутаг
Тахийн нутгийг өргөжүүлнэ
2014-10-02 16:31:21 - Байгаль Орчин
Ихэнх нутгаар хур тунадас орно
2014-10-02 16:14:23 - Нийслэл
Хүнд даацын машинууд зам эвдэж байна
2014-10-02 15:28:13 - Хууль
“АПУ”-гийн борлуулагчийг хөнөөсөн этгээдийг баривчиллаа
2014-10-02 15:02:50 - Нийслэл
Улаанбаатар хотын Цагдаагийн газрын даргад санал авах ажиллагаа эхэллээ
2014-10-02 14:52:21 - Хууль
Хоригдсон хүмүүс өмгөөлөгчтэйгээ ганцаарчлан уулзах боломжтой
2014-10-02 14:38:09 - Нийслэл
УИХ-ын дарга З.Энхболд С.Зориг агсны хөшөөнд хүндэтгэл үзүүлэв
2014-10-02 14:25:52 - Улс төр
Ерөнхийлөгч Ц.Элбэгдорж “Давхар дээл”-ээс татгалзахыг анхааруулав
2014-10-02 14:10:38 - Спорт
Д.Отгондалай АЛТАН МЕДАЛИЙН төлөө тулалдах боллоо
2014-10-02 13:44:56 - Нийслэл
Талбай дээр гэр бариулахгүй байна гэв
2014-10-02 13:05:03 - Нийслэл
Энэ жил утаатай 20 тэрбум төгрөгөөр тэмцэнэ
2014-10-02 13:04:01 - Нийслэл
Бээжингийн гудамжийг энэ сарын 6-нд нээнэ
2014-10-02 13:01:09 - Гадаад
Эбола вирус хөхний сүүгээр халдварладаг
2014-10-02 12:48:14 - Улс төр
Н.Алтанхуяг Засгийн газрын шинэ бүтцээ танилцууллаа
2014-10-02 12:12:45 - Нийслэл
С.Зориг агсны хөшөөнд хүндэтгэл үзүүллээ
2014-10-02 12:11:06 - Шар
“MCS”-ийн шатсан барилгад ажиллахаар ирсэн хятад иргэнийг албадан гаргахаар болжээ
2014-10-02 12:09:11 - Шар
Д.Тэрбишдагва Тэргүүн шадар сайд болно
2014-10-02 11:52:24 - Улс төр
Бүтцийн өөрчлөлтөөр зургаан яамыг нэгтгэнэ
2014-10-02 11:47:38 - Хууль
Засгийн газрын тухай хуульд өөрчлөлт оруулах хуулийг өргөн барилаа
2014-10-02 11:46:48 - Шар
М.Зоригт гишүүнд ээж нь “iPhone6” бэлэглэжээ
2014-10-02 11:40:01 - Орон нутаг
Булганы 32 иргэн нийтийн эргүүлд ажиллаж эхэлжээ
2014-10-02 11:32:13 - Эдийн засаг
Монгол төрдөө найдаж байна
2014-10-02 11:28:59 - Эдийн засаг
Төмөр замын тээврийн бодлогыг хэлэлцэхийг дэмжлээ
2014-10-02 11:28:16 - Хууль
“Хөтөл цемент шохой” ХК-ийн экс захирал А.Шоовдорт 4 жилийн ял оноожээ
2014-10-02 11:07:37 - Нийслэл
Дүнжингараваас Улиастай чиглэлийн замын явц 50 хувьтай байна
2014-10-02 11:07:23 - Эрүүл мэнд
Бэлэн гоймонд стандарт тогтоохоор болжээ
2014-10-02 11:02:14 - Хууль
АТГ-аас НМХГ-ын албан тушаалтнуудад шалгалт хийжээ
2014-10-02 10:50:39 - Спорт
Манай сагсан бөмбөгийн холбоог NBA-тэй холбож өгнө гэжээ
2014-10-02 10:45:09 - Улс төр
Засгийн газрын бүтцийг яаралтай хэлэлцүүлэхээр УИХ-д оруулав
2014-10-02 10:31:47 - Хууль
М.Тулгын гэрийнхэн шүүхийн гадаа жагсаж байна
2014-10-02 10:18:09 - Эдийн засаг
Мөнгөтэй, найдвартай, бас “Уян”-тай...
2014-10-02 10:10:39 - Улс төр
Чуулганы хуралдаан хаалттай горимд шилжив
2014-10-02 10:08:37 - Хууль
Г.Сарангэрэлийн танхайрсан гэх хэргийг хэрэгсэхгүй болгожээ
2014-10-02 10:03:08 - Нийслэл
С.Оюун: С.Зориг агсны хэргийг илрээсэй гэж бид хүсдэг
2014-10-02 09:53:16 - Нийслэл
Нэн шинэ түүх: Улаанбаатар-Сингапур
2014-10-02 09:27:19 - Хууль
АПУ-ын борлуулагчийн машин Төв аймгаас олджээ
Их уншсан
Их сэтгэгдэлтэй