Шинэ коронавирусын халдварын голомт БНХАУ-ын Ухань хотод хөл хорионд ороод байсан Монгол Улсын харьяат 32 хүнийг эх орондоо авчирсан. 31 оюутан, бага насны нэг хүүхэд ирсэн. Онгоцноос буунгуут нь тэдний халууныг шалгаж, тоноглосон автомашинаар ХӨСҮТ рүү хүргэн, өндөр зэрэглэлээр ариутгасан тусгай өрөөнд тусгаарлаад байна. Ухань хотоос авчирсан иргэдийг ДЭМБ-ын зөвлөмжийн дагуу 14 хоног тусгаарлах юм байна. Тодруулбал, ХӨСҮТ-д тэдгээр иргэдийг тусгаарлаад байна. Тухайн иргэдэд үзлэг, оношилгоо хийх эмч, мэргэжилтнүүд, эрүүл мэндийн үйлчилгээ үзүүлэх хүмүүс томилогдон ажилдаа оржээ.

ХӨСҮТ-ийн дарга Д.Нямхүү “Ухань хотоос ирсэн 32 иргэнээс гадна нисэх бүрэлдэхүүний 15 хүн нийлээд 47 хүнд 14 хоногийн тусгаарлалт хийнэ. БНХАУ-ын Ухань хотод коронавирусын голомтод байсан иргэдээ Монгол Улс өнөөдөр авчирлаа. Манай ХӨСҮТ-д тусгай 50 орт гэж тасаг байдаг. Энэ нь шинэ болон дахин сэргэж буй халдварын 50 ортой тасаг юм л даа. Ирсэн хүмүүсийг энэ тусгай өрөөнүүдэд орууллаа. Монгол оюутнууд маань сэтгэл их өндөр байна. “Монгол хоолоо идээд, монгол эх орондоо ирсэн чинь хэчнээн сайхан юм бэ” гэцгээж байна. Шинжилгээ хийж байна. Эмч нар үзэж, хянаж байгаа. ДЭМБ-ын өгсөн зөвлөмжийн дагуу 14 хоног тусгаарлаж байгаад ерөнхий хяналтыг хийлгээд гэр орон руугаа явах юм. Эд нар маань нөхцөл байдлыг бүрэн ойлгож “Эх орондоо, Засгийн газартаа, Эрүүл мэндийн яамандаа, эмч нартаа баярлаж байна” гэж байна. Тусгай дэглэмд байгаа учраас энд төвөг учрах юм байхгүй, өгсөн зөвлөгөө зааврыг бүрэн дагана. Сэтгэл сайхан онгойчихлоо, тэгширчихлээ” гэж байна. Манай тусламж үйлчилгээ үзүүлж байгаа эмч нар маань тусгай үйлчилгээ хийж байгаа учир гарч орж болохгүй байгаа. Тийм учраас миний бие багахан мэдээ өгч байгаа юм” гэлээ. Нислэгийн багт онгоцны даргаар Г.Баатарцогт, хоёрдугаар нисгэгчээр Б.Батманлай, Т.Эрдэнэ-Очир, инженер техникчээр А.Болд нар нар ажилласан бол тусгай томилгоогоор Т.Бат-Орших, Ж.Нямсүрэн, Б.Оргилбаяр, Б.Түвшинтөгс, Б.Чанцалням, Ү.Чинбаяр нарын ХӨСҮТ-ийн баг, хөлгийн үйлчлэгчээр С.Оюун, Мөнхдөл нар ажилласан.

Тэгвэл ХӨСҮТ-ийн тусгаарлах тасагт байрлаж буй А.Золбоо цахим хуудсандаа "Сэтгэлдээ сүү өргөж байсан хүн бүхэнд баярлалаа.

Сайн байцгаана уу.
Бидний 31 оюутан (иргэн) БНХАУ-ын Ухань хотын хил, гаалийн эрүүл мэндийн хяналт шалгалт, сорилыг амжилттай давж ямар нэгэн халдвар аваагүй гэж үзсэн тул МИАТ-ынхаа мөнгөн цагаан хүлэгт суугаад өнөө өглөө эх орондоо сайн явж ирлээ.
Бид бүхний төлөө сэтгэл гарган ажилласан хүн бүрт талархал илэрхийлье.
Удахгүй тэдгээр сайхан сэтгэлтэй хүмүүс болон зохих байгууллагууддаа баярлаж талархсан сэтгэлээ илэрхийлэн, чадах хэрээрээ нийтлэл бичин оруулах болноо.
Яг одоо бидний 30 оюутан, 1 бага насны хүүхэд ХӨСҮТ-д эмч нарынхаа нарийн хяналтан дор тусгаарлагдаж эхэлсэн байгааг та бүхэн хэвлэл мэдээллээс харж байгаа байх.
Өчигдөр орой Ухань хотоос эхэлсэн нүүлгэн шилжүүлэх үйл ажиллагааг Монгол улсын ГХЯ, элчин сайдын яам өндөр хариуцлагатайгаар зохион байгуулж бид эцсийн цэг болох ХӨСҮТ-ийн дулаахан, сайхан энергитэй өрөөнүүдэд ирснээр өндөрлөж байна.
Оюутан бид хүн ардынхаа эрүүл мэндийн төлөө засаг төрийнхөө шийдвэрийг дагаж тус тусдаа тусгаарлагдаад байна.
Халдваргүй гэдэг нь бүрэн батлагдтал 14-21 хоног эндээ бүхнээс тусгаарлагдан байхнээ. Эх орондоо ирчихсэн юм чинь 14-21 хоног юу байхавдээ.
Эмнэлгийн журам ёсоор бид хоорондоо уулзах нь бүү хэл үзлэг шинжилгээнээс бусад үед эмч сувилагч нартайгаа ч шууд харилцдаггүй ба утсаар залгаж харилцдаг юм байна. Энэ нь ч маш зөв санагдлаа.
Утас байгаа болохоор эмнэлэгт тусгаардагдах хугацаанд интернэтээс мэдээ мэдээллээ аваад, гэр бүлийнхэнтэйгээ холбогдоод байж чадах нь.
Одоо гол зүйлдээ орье.
Ухань хотоос надтай хамтдаа ирсэн 30 оюутны маань гэр бүлийнхэн хувь чатаар надруу яаралтай холбогдохыг хүсэж байна. Учир нь бид хоорондоо уулзах боломжгүй байгаа ба тэд маань гар утсаа халдваргүйжүүлэхээр өгсөн тул одоогоор утасгүй, мөн Монгол дугааргүй байна.
(би түрүүнд нь утсаа халдваргүйжүүлчихсэн шүү.)
Тиймээс ахин сануулъя оюутнуудын маань гэр бүлийнхэн надтай яаралтай хувь чатаар холбогдоорой.
Цаашаа share хийж дамжуулж өгнө үү.

Бидний төлөө сэтгэлдээ сүү өргөж байсан хүн бүхэнд баярлалаа. Таны сайхан сэтгэлд талархаж байна.
Мөн Монгол улсын засгийн газар, Гадаад харилцааны яам, Бээжин хотод суугаа Монгол улсын элчин сайдын яам, Консулын газар, МИАТ, Эрүүл мэндийн яам, ХӨСҮТ, МХЕГ, Онцгой байдлын газар, ЦЕГ-ын нийт хамт олон та бүхэнд баярлалаа.
Монголын ард түмэн, төр засгийнхаа "Монгол иргэнээ" гэсэн сүү шиг сайхан сэтгэлийг бид насан туршид мартахгүй,
МОНГОЛ УЛСЫН ТӨЛӨӨ ЗҮТГЭХ БОЛНО.

А. Золбоо
2020.02.01
МОНГОЛ УЛС, ХӨСҮТ, тусгаарлах байрнаас" гэж бичсэн байна.