-НИЙСЛЭЛИЙН ТӨР ЗАХИРГААНЫ БАЙГУУЛЛАГААР ӨДӨРТ 5700 ИРГЭН ҮЙЛЧЛҮҮЛДЭГ БАЙДЛААС ҮҮДСЭН ХОТЫН ТҮГЖРЭЛ БУУРНА-

Улаанбаатар хотын төвлөрлийг сааруулж, нэг төвт хотоос олон төвт хот болгон хөгжүүлэх зорилгоор хотын захиргааг Баянхошуу руу нүүлгэх шийдвэрийг 2013 онд гаргаж байсан. Гэвч түүнээс хойш санхүү мөнгөний асуудлаас эхлээд олон бэрхшээлтэй тулгарч, өдийг хүртэл ашиглалтад ороогүй хэвээр буюу баригдсаар байгаа юм.

Улмаар 2017 онд тухайн үеийн хотын дарга, холбогдох удирдлагууд нийслэлийн захиргааны шинэ байрыг Яармагийн дэнж рүү нүүлгэх гэж буйгаа зарлаж, бууриа сэлгэсэн. Үүний шалтгааныг хотын дарга асан С.Батболд “Яармагийг бизнес санхүүгийн төв болгон хөгжүүлнэ. Учир нь, тухайн газар нь хөгжих бололцоотой дэд бүтэц, шинэ нисэхийн хурдны зам орсон, Яармагийн гүүр шинээр баригдаж байгаа зэрэг боломжууд ихтэй” хэмээн тайлбарлаж байсан билээ.

Үүний дагуу хотын захиргаа Хан-Уул дүүргийн дөрөвдүгээр хороонд буюу Яармагийн наадамчдын зам дагуу “Мөнх хада” төвийн эсрэг талд баригдаж байна. Нийтдээ гурван блок барилга баригдах ёстой. Өнгөрөгч оны есдүгээр сарын байдлаар барилгын ажил 40 хувийн гүйцэтгэлтэй явж байгаа, А блокоо тухайн ондоо багтаан дуусгана гэсэн чихэнд чимэгтэй мэдээ хэвлэл мэдээллийн хэрэгслүүдээр олонтаа цацагдсан. Улмаар хотын төвд байгаа хуучин захиргааны байруудаа борлуулаад, шинэ байруудаа барих төсвийн тодорхой хэсгийг шийднэ гэдгийг албаныхан хэлж байв.

Хотын захиргаа Яармаг руу нүүснээр олон асуудал шийдэгдэнэ гэж харж байгаа. Тухайлбал, Нийслэлийн Засаг даргын Тамгын газар, нийслэлийн харьяа 33 агентлаг, нийслэлийн төр захиргааны байгууллагуудаар өдөрт дунджаар 5700 иргэн, аж ахуйн нэгжид 332 нэр төрлийн үйлчилгээ үзүүлдэг. Хотын төв рүү хоногт дунджаар 200 мянга орчим авто машин зорчдог байна. Хотын захиргаа Яармаг руу нүүснээр дээрх ачаалал тодорхой хувиар буурна гэж үзжээ. Үүний үр дүнд автомашины түгжрэл арилах, агаарын бохирдлыг буурах, бизнесийн таатай орчин бүрдүүлэх, аялал жуулчлалын шинэ төв байгуулах, иргэдэд нутгийн захиргааны үзүүлэх үйлчилгээний хүртээмжийг сайжруулах зэрэг зорилго багтсан.

Мөн Монгол Улсын Ерөнхийлөгчийн санаачилсан Майдар дагуул хот, шинэ нисэх буудлыг түшиглэсэн Аэросити зэрэг дагуул хотуудыг хөгжүүлэн хотын төвлөрлийг арилгахаар төлөвлөнө гэж үзсэн.

Нийслэлийн Хот төлөвлөлт, ерөнхий төлөвлөгөөний газраас өгсөн мэдээллээр А1 хэсэгт Иргэдийн хурлын дарга, ажлын хэсэг, бүлгийн хурлын танхимууд, хүндэтгэлийн танхим байрлана. А2 хэсэгт нь хотын музей, хүндэтгэлийн хурлын танхим, иргэдийн хурлын танхим байна. А3 Засаг даргын Тамгын газар, А4, А5 хэсэгт Захирагчийн ажлын алба байна. B блокт оффис болон хүлээн авах танхим байрлах юм. Харин С блок хурлын заал, спорт заал, нэг цонхны үйлчилгээ байхаар төлөвлөжээ.

В блокийн барилгын ажил 2019 оны сүүл үед дуусч, энэ ондоо нийслэлийн захиргааны байгууллагууд нүүж эхлэх байсан. Гэвч барилгын ажил өвлийн улиралд зогсож, одоо дахин үргэлжилсээр буй.

-БАРИЛГА УГСРАЛТЫН АЖИЛ 40 ХУВЬТАЙ ЯВАГДАЖ БАЙГААД
ХҮЙТНИЙ УЛИРАЛ ЭХЛЭХЭД ЗОГССОН-

Барилгын ажил хэдэн хувьтай явагдаж байгаа, ямар ажил гүйцэтгэж байгаа талаар холбогдох албаныхнаас тодрууллаа.

Энэ талаар Нийслэлийн хөрөнгө оруулалтын газрын Барилга захиалагчийн хэлтсээс тодруулахад, “Одоогийн байдлаар карказ угсралтын ажил дууссан. Дүүргэлтийн ажлууд хийгдэж эхэлсэн байдалтай байна. Мөн дотор дулааны босоо шугамын угсралтын ажлууд болон гадна пассадны рам угсралтын ажлууд хийгдээд эхэлж байгаа.

Барилга угсралтын ажил 40 хувьтай явж байгаад хүйтний улирал эхлэхэд зогссон. Өвлийн хүйтнийг өнгөрөөгөөд ажил эхлээгүй байна. Үндсэндээ барилгын ажил эхлүүлэх бэлтгэл ажлууд хангагдаад явж байгаа гэж хэлж болно.

Гадаад пассадны захиалгын материалуудын ачилт эхэлчихсэн, эхнээсээ орж ирээд байгаа. Ажил бүрэн эхлээгүй байгаа учраас одоогоор хичнээн хүн ажиллаж байгаа талаар дэлгэрэнгүй мэдээлэл өгөх боломжгүй байна.

Ирэх наймдугаар сарын сүүлээр эхний гэрээний хугацаа дуусгавар болж байгаа. Цаашид хийгдэх ажлууд үе шаттайгаар үргэлжилнэ. Тэр нь төсөв мөнгөтэй холбоотой асуудал учраас ингэнэ, тэгнэ гэсэн дэлгэрэнгүй мэдээлэл байхгүй, өгөх боломжгүй байна” гэсэн мэдээллүүдийг өгсөн юм.

2019 оны эхээр ашиглалтад орохоор яридаж, барилгын ажил эрчтэй явж байгааг Нийслэлийн ИТХ-ын төлөөлөгчид онцолж байсан ч бодит байдал дээрээ иймэрхүү дүр зурагтайгаар барилгын ажил үргэлжилж байна.

ГЭРЭЛ ЗУРГИЙГ: Г.БАЗАРРАГЧАА