Өнөөдөр УИХ дахь МАН-ын бүлгийн дарга Д.Тогтохсүрэн гадаадад томилолтоор явах үедээ Казино тоглосон асуудал улс төрийн амьдралыг давалгаалуулж байна. Энэ явдалтай холбоотойгоор улс төрийн нөлөө бүхий албан тушаалтнууд үзэл бодлоо илэрхийлж байна.

Энэ удаад Ерөнхийлөгчийн Тамгын газрын дарга З.Энхболд өөрийн үзэл бодлыг ингэж илэрхийлэв. “Хэдэн сарын өмнө төрийн албан хаагчийн ёс зүйн дүрмэнд өөрчлөлт оруулж, казино тоглосон бол халдаг болоод хэд хэдэн төрийн албан хаагчийг халсан шүү дээ. Тэр жишгийн дагуу арга хэмжээ авах байлгүй. УИХ-ын гишүүн ч гэсэн төрийн албан хаагч юм чинь. Төрийн албан хаагчийн ёс зүйн дүрэм бол Төрийн албаны тухай хуульд нийцэж гарч байгаа. Өмнө нь казино тоглосон хэргээр хоёр гурван арга хэмжээ авагдчихсан шүү дээ. Тэгэхээр УИХ-ын гишүүн ямар нэгэн онцгой төрийн албан хаагч биш. Хэрэв халагддаг бол ялгаагүй л халагдах ёстой. МАН-ын УИХ, Засгийн газар нь тэр дүрмээ хэрэгжүүлээд явж чадах нь уу, үгүй юу гэдгийг нь харъя” гэсэн юм.