Н.Номтойбаярыг УИХ-ын гишүүнээс эргүүлэн татах эсэх асуудал улс төрийн амьдралыг сонирхолтой болгож байна. Ер нь бол Улсын ерөнхий прокурор Б.Жаргалсайхан Н.Номтойбаярыг УИХ-ын гишүүнээс нь түдгэлзүүлэх хүсэлтийг тав хоногийн өмнө УИХ-ын даргад ирүүлсэн. Харин УИХ-ын гишүүний халдашгүй байдлын дэд хорооноос гишүүдийн ирц бүрдвэл энэ асуудлыг хэлэлцэнэ хэмээн хойшлуулсаар байгаа. Үүнтэй холбогдуулан УИХ-ын гишүүн Н.Номтойбаяр УИХ-ын гишүүний халдашгүй байдлын дэд хорооны дарга Ц.Нямдоржид хүсэлт хүргүүлжээ. Чухам энэ сэдвээр Хууль зүйн сайд, УИХ-ын гишүүний халдашгүй байдлын дэд хорооны дарга Ц.Нямдорж сэтгүүлчдэд мэдээлэл өгсөн юм.

Тэрбээр “Н.Номтойбаяр хүсэлт ирүүлсэн. Хүсэлтийг нь уншина даа. Энэ долоо хоногт энэ асуудал шийдэгдэнэ. Хойшлогдох эсэхийг Н.Номтойбаяр мэддэггүй юм аа. Ч.Улаан сайд хэзээ ирэхийг мэдэхгүй байна. Дөрвөн гишүүнтэй хуралдаад санал нь хоёр хоёроор тэнцчихвэл шийдвэр гардаггүй байхгүй юу. Улсын ерөнхий прокуророос нууцын зэрэглэлтэй бичиг илгээсэн. Цаана нь мөрдөн байцаах ажиллагааны нууц гэж зүйл бий. Тиймээс хурлыг хаалттай явуулах ёстой. Мөрдөн байцаалтын нууц байгаа учраас, Прокурор нь нууц гэсэн бичиг ирүүлсэн байхад Н.Номтойбаярын асуудлыг нээлттэй хэлэлцэх боломжгүй. Түүний хэлсэн үгээр ажил явна гэж байхгүй. Хуулийн байгууллага, Дэд хороо ч тэр бүрэн эрхийнхээ хүрээнд асуудлыг шийднэ. Прокурорын оруулж ирсэн бичигт Н.Номтойбаярыг сайд байхдаа хийж байсан ажлынх нь тухай, нөгөөх нь ордон болсон Б.Батхүү агсаны асуудалтай холбоотойгоор, гурав дахь нь хэвлэлээр баахан зүйл ярьчихсан шүү дээ. Ингээд гурван асуудал л байна билээ. Хэрэг гэх юм уу, юу гэх юм бэ.

Улсын ерөнхий прокурор энэ асуудлыг тавихдаа УИХ-ын гишүүний халдашгүй байдлын дэд хорооны ирц бүрэн байгаа эсэхийг харгалзах учиртай байсан. Учир нь Лүндээжанцан илт байхгүй байхад энэ асуудлыг тавьсан шүү дээ. Баасан гаригт ажил дууссан, даваа гаригт Н.Номтойбаярын эрхийг түтгэлзүүлэх санал орж ирсэн шүү дээ. Ийм яаруу юм болсон. Адгасан зүйл прокуророос гарсан. Үүнээс болоод 48 цагийн хугацаа асуудал үүсгээд байна. 48 цагт багтаан шийдвэрлэж амжих эсэх гарцыг харгалзах учиртай байсан юм” гэлээ.