Архангай аймагт коронавирусын сэжигтэй тохиолдол илэрлээ гэсэн мэдээлэл цацагдаж байна. ЭМЯ-наас энэ асуудлыг тодруулахад “Тийм асуудал гараагүй. ХӨСҮТ-д бүх нэгдсэн мэдээлэл ирж байгаа” гэсэн юм. Үнэндээ энэ сарын эхээр Хонгконгт зорчоод, нэгдүгээр сарын 03-ны өдөр МИАТ-ийн шууд нислэгээр ирсэн 46 настай иргэн Архангай аймгийн эмнэлэгт халуурсан шалтгаанаар ирсэн байна.

Тэрбээр Хонгконгт байхдаа далайн гаралтай хүнс идсэн гэдгээ хэлжээ. Тиймээс тухайн хүнийг сэжиглэж, зөвлөмжийн дагуу ажиллаж, аймгийн нэгдсэн эмнэлэгт хэвтүүлж, хөл хорио тогтоосон байна. Тус аймгийн Онцгой комисс хуралдаж, ийм шийдвэр гаргажээ. Тэд “Иргэний зорчсон газар вирусын халдвар бүртгэгдсэн учир бид сэжиглэхээс өөр аргагүй.

Гэхдээ ХонгКонгд анхны тохиолдол нэгдүгээр сарын 22-нд бүртгэгдсэн байсан. Харин энэ хүн нэгдүгээр сарын 01-03-ны хооронд зорчсон. Одоогоор ДЭМБ нууц үеийг 7-14 хоног гэж үзэж байгаа. Энэ нууц үеэс өмнө уг иргэн зорчсон учир харьцангуй эрсдэл бага ч нууц хугацаа нэмэгдэхийг үгүйсгэхгүй тул болгоомжилж, удирдамжийн дагуу ажиллалаа. Шинжилгээний хариу 72 цагийн дараа гарна. Онош баталгаажсанаас хойш халдвар гарсан, бүртгэгдсэн гэж тооцох учиртай” гэсэн юм.