Зах зээлд ам.долларын төгрөгтэй харьцах ханш бага багаар чангарсаар байна. Саяхан л 2800 төгрөгтэй тэнцэж байсан ам.долларын ханш өнөөдөр 2850 болоход ойртжээ. Монголбанкны өнөөдрийн зарласан ханш 2834.5 төгрөг байгаа ч хар зах /Найман шарга/ дээрх ханш 2840 төгрөгтэй тэнцэж байна. Монгол Улсын эдийн засгийн нөхцөл байдал муудаж, улсын төсөв 2.2 их наяд төгрөийн алдагдалтай ажиллаж, Монголд орж ирэх ам.долларын урсгал саарсан зэрэг шалтгаанаас болж нэг талд долларын ханш өсөж, нөгөө талд иргэд, аж ахуйн нэгж хадгаламжаа ам.долларт шилжүүлж, зах зээлд хадгаламжийн долларжилт нэмэгдэх хандлага ажиглагдаж буй.

Долларжилт нь тухайн улсын валютад итгэх итгэлийг илэрхийлэх үзүүлэлт бөгөөд инфляци, валютын ханш, мөнгөний нийлүүлэлт зэрэг макро үзүүлэлтүүдээс гадна улс төр, институцийн үзүүлэлтүүдээс мөн хамаардаг байна.

Үндэсний статистикийн хорооноос танилцуулсан нийгэм эдийн засгийн байдлын судалгаагаар зургадугаар сард валютын хадгаламж 4.3 их наяд төгрөг болж, өмнөх сараас 338.2 тэрбум төгрөгөөр, өмнөх оны мөн үеэс 1.4 (47.1%) их наяд төгрөгөөр өссөн байна.

Монголбанк болон арилжааны банкууд долларжилтоос сэргийлж валютын хадгламжийг даатгахгүй, мөн хүүг буруулах бодлого баримталж байгаа ч иргэд, аж ахуйн нэгжүүд хуримтлалаа ам.доллараар хадгалах сонирхол илүү байгаа бололтой.

Харин төгрөгийн хадгаламж 2020 оны 6 дугаар сарын эцэст 10.9 их наяд төгрөг болж, өмнөх сараас 264.2 (2.5%) тэрбум төгрөгөөр, өмнөх оны мөн үеэс 13.4 (0.1%) тэрбум төгрөгөөр өссөн байна. Төгрөгийн хадгаламжийн 89.3 хувь (9.8 их наяд төгрөг) нь иргэдийн хадгаламж, 10.7 хувь (1.2 их наяд төгрөг) нь аж ахуйн нэгж, байгууллагын хадгаламж байна.

Монгол Улсын гадаад валютын албан нөөц зургадугаар сар 3.5 тэрбум доллар болж өмнөх оны мөн үеийнхээс 13.3 хувиар унасан байна.