ХӨСҮТ-ийн Тандалт, судалгааны албаны дарга А.АМБАСЭЛМАА:

2020 оны 8 сарын 23-нд ХӨСҮТ, Дархан-Уул аймгийн лабораторид 399 хүнд шинжилгээ хийхэд коронавирус илрээгүй. Үүнд 8 сарын 22-нд Сөүл-Улаанбаатарын онгоцооор ирсэн 268 хүний шинжилгээ, 8 сарын 9-нд Франкфурт-Улаанбаатарын онгоцооор ирсэн 67 хүний давтан шинжилгээ, Алтанбулагийн боомтоор орж ирсэн ачаа тээврийн 21 жолоочийн шинжилгээ, Өмнөговь аймагт тусгаарлагдсан 27 хүний шинжилгээ, Замын-Үүд суманд тусгаарлагдсан 1 хүний шинжилгээ, ХӨСҮТ-д тусгаарлагдсан 1 хүний шинжилгээ, Сувилалд тусгаарлагдсан 5 хүний шинжилгээ /Эдгэрээд гарсан хүмүүс, Цэргийн төв эмнэлэгт тусгаарлагдсан 9 хүний шинжилгээнд тус тус коронавирус илрээгүй.

Өнөөдөр ХӨСҮТ-өөс нэг хүн эдгэрч, сувилал руу шилжлээ. Монгол Улсад коронавирусийн халдварын батлагдсан тохиолдол 298. Үүнээс 289 хүн эдгэрсэн байна. Эдгэрсэн 289 хүнээс сувиллын ажиглалтад 31, гэрийн ажиглалтад 40, ажиглалт, тусгаарлалтын хугацаа дууссан 218 хүн байна. ХӨСҮТ-д өнөөдрийн байдлаар 9 хүн эмчлэгдэж байна. Эдгээрээс 7 хүний биеийн байдал хөнгөн, 2 хүний бие хүндэвтэр байгаа.

Нийтдээ ХӨСҮТ-д 24 хүн эмчилгээ, ажиглалт, тандалтад байна.

Эрүүл мэндийн яамны хэлтсийн дарга Д.НАРАНГЭРЭЛ:

Дэлхий дахинаа 23,235,000 хүн коронавируст халдвараар өвчилж, 814,000 хүн энэ өвчний улмаа эндээд байгаа бол 16 сая хүн эдгэрсэн. Сүүлийн 24 цагт нийт 196,000 хүн шинээр халдвар авч 4,000 гаруй хүн эндсэн нь өмнөх өдрөөс шинэ тохиолдол 48-аар, эндэгдэл 1,000 гаруйгаар буурсан дүнтэй байна.

Манай хөрш ОХУ-д сүүлийн 24 цагт 4,752 хүн шинээр халдвар авч, 73 хүн эндсэн бол БНХАУ-д 41 шинэ тохиолдол бүртгэгдсэний 16-г гадаадаас зөөвөрлөгдсэн гэж үзжээ.

Япон улсад өчигдөр 745 хүн шинээр халдвар авч, 9 хүн эндсэн. Харин БНСУ-д 266 хүн халдвар авсны 8-ыг гадаадаас зөөвөрлөгдсөн гэж үзсэн байна. Өнгөрсөн долоо хоногт Сөүлийн хойд хэсэгт орших Саранг Жи Ли сүм болон хотын төвд жагсаал хийсэн иргэдтэй холбоотойгоор шинээр 397 тохиолдол бүртгэгдлээ. Тус улсад халдварын тохиолдол өсөж байгаа тул Засгийн газраас хязгаарлалтын дэглэмийн хоёрдугаар зэрэг рүү шилжиж байгаагаа мэдэгдсэн. Энэ хүрээнд нийтийн тээвэрт явахдаа заавал гар ариутгагч хэрэглэх, олон нийтийн газар гар утсаар ярихгүй байх, амны хаалт зүүхгүй байгаа иргэдийг мэдээлдэг болох арга хэмжээг авч байна.

Хичээлийн шинэ жил эхэлж байгаатай холбоотойгоор олон оронд халдварын тохиолдол нэмэгдэж байгаа. Тухайлбал,

АНУ-ын Алабама, Зүүн Каролинад танхимын сургалт эхлээд хоёр долоо хоногийн хугацаанд оюутнуудын дунд халдвар эрс нэмэгдсэн тул их сургуулиуд цагдаагийн байгууллагатай хамтран ажиллаж эхэлжээ. Өвчин голомтлон гарсан сургуулиудад хичээлийг цахим хэлбэрт шилжүүллээ.

Чех, Франц улсад өнгөрсөн долоо хоногт тохиолдлын тоо хамгийн өндөр хэмжээнд хүрсэн өдрүүд бүртгэгдлээ. Тиймээс дэглэм журмыг улам чангатгаж байна.

Австралийн Мельбурн хотод сүүлийн гурав хоногт тохиолдлын тоо буурч байна.

АНУ-д коронавируст халдвараар өвчлөөд эдгэрсэн хүний цусны сийвэнг тус улсад хэрэглэх шийдвэрийг яаралтайгаар гаргалаа.

Манай улсад тусгаарлан ажиглалтад өчигдөр шинээр 271 хүн орсон бол 3 хүн гэрийн тусгаарлалтад шилжлээ. Одоогоор 3,562 хүн тусгаарлан ажиглалтад байна. Цэргийн төв эмнэлэгт 53 хүн хэвтэн эмчлүүлж байгаагаас 3 хүн эрчимт эмчилгээний тасагт байгаа.