Энэ амралтын өдрүүд өнгөрөөд Олон улсын эмэгтэйчүүдийн эрхийг хамгаалах өдөр даваа гарагт болно. Эмэгтэйчүүдийн баярын уур амьсгал аль хэдийнээ орсон байна. Энэ уур амьсгал дотор өнөөдөр олны анхаарал татсан хоёр үйл явдал өрнөлөө.

Ерөнхий сайдын хэлсэн үг байв. “Эмэгтэйчүүд идэвхгүй байвал цэрэгт явуулахаас өөр гарцгүй” гэсэн нь нийгмийн сүлжээний гол хэлэлцэх сэдэв боллоо. Ажил хийхгүй байна гэж шүүмжлэв үү, үнэхээр эмэгтэйчүүдийн үүрдэг ачааг мэдэхгүй юу. Ямартаа ч Ерөнхий сайдын амнаас гарсан үг энэ.

Тэгвэл Нийслэлийн засаг дарга Д.Сумъяабазарын мэндчилгээ эмэгтэйчүүдэд их дотно санагдсан тухай хүмүүс бас бичиж. “Нийслэлийн амьдрал, нийгэм эдийн засгийн байдал хатуу бэрх байгаа ч бүсгүйчүүд та бүхэн маань энэ бүгдийг даван туулахын төлөө хүлээсэн үүрэг, өргөсөн тангарагтаа үнэнч байж тэсвэр хатуужил, баатарлаг зориг, сэтгэл, зүтгэл бүхний дээдийг харуулж эрчүүдтэй мөр зэрэгцэн ар гэрийн амьдрал ахуйгаа умартан, өдөр шөнөгүй хөдөлмөрлөж байгаа нь энэхүү хүнд үеийг даван туулах хамгийн том итгэл найдварыг төрүүллээ. Та бүхний энэ бүх гайхамшигт зан чанар, сэтгэл зүтгэл нь өнөөгийн нийгэмд эрчүүд бидэнд бахархал, сайн сайхан үлгэр дууриалал болж байна. Цар тахлын хүнд хэцүү өдрүүдэд хатуужилтай, баатарлаг, зоригтой ажил амьдралаа өөдрөг сайхан авч яваа нийт эмэгтэйчүүд, төрийн тусгай чиг үүргийн бүхий л байгууллага, боловсрол, эрүүл мэнд, цагдаа, хяналт шинжилгээ, онцгой, эрчим хүч, үйлчилгээний салбарын болон Улаанбаатар хотын бүх нэгж, талбарын ажилтан та бүхэнтэй Онцгой үед нэг баг болон, хамтран ажиллана гэдэг Улаанбаатар хотын Засаг дарга, Д.Сумъяабазар миний хувьд нэр төрийн хэрэг болно.

Ийнхүү нийт бүсгүйчүүддээ, бахархам сайхан охид хөвгүүд төрүүлж өсгөсөн ээжүүд, ар гэр үр хүүхдээ сайн сайхан хүмүүжүүлж яваа гэргий та бүгдэдээ эрүүл энх, сайн сайхан бүхний дээдийг хүсье” гэжээ.

Ээжүүд, охид, бүсгүйчүүддээ баярын мэнд дэвшүүлье.