Цагаан хадны ногоон бүст халдвар тархаж, Гашуунсухайт боомтын тээвэр тэг зогсолт хийхэд хүрсэн талаар Баянзам тээвэрчдийн холбооноос өнөөдөр мэдээлэл хийлээ.

“БАЯН ЗАМ ТЭЭВЭРЧДИЙН ХОЛБОО” УДИРДАХ ЗӨВЛӨЛИЙН ДАРГА П.БАЯРХҮҮ: Цагаан хад гаалийн хяналтын бүс, Гашуунсухайт боомтын бүс нутагт халдварын сэжигтэй тохиолдлууд илэрч, хил боомтын асуудал, тээвэрчдийн эрүүл мэнд, нийгмийн байдал хүндэрсэн. Гэвч сүүлийн нэг сарын хугацаанд Гашуунсухайт боомтоор гардаг нүүрсний таталтын хувьд 350 машин хүрч ирээд буцаад 50 машин гардаг болсон. Шалтгаан нь Хятадад өгсөн манай жолооч нарын шинжилгээний хариу эерэг гарсан. Эерэг шинжилгээ бүртгэгдээд ирэхээр Хятадын талаас нүүрсний автомашины тоог хязгаарлачихсан. Сүүлийн эерэг гарсан тохиолдлоос хойш гурван хоног Хятад улс хилээрээ нэг ч машин нэвтрүүлээгүй. Сүүлийн долоо хоногт дараалан эерэг гарсан учир Хятадын талаас ердөө 50 машин нүүрс л хүлээн авна гэдгээ мэдэгдсэн. Одоо Цагаан хад бүс дотор 4000-5000 гаруй машин байна. Үүнээс 1900 нь нүүрсээ аччихсан хилээр гарахад бэлэн байна. Өдөрт дөрвөн автобус жолооч Хятадын талд шинжилгээ өгөөд хариу нь сөрөг гарсан нь нүүрсээ ачаад хилээр нэвтэрдэг. Зарим жолооч нар маань гурван сар, хагас жил хилийн бүст амьдраад тээвэр хийж байна. Сая гаалийн талбайгаас нэмж нүүрс ачихгүй гэсэн хязгаарлалтыг хийсэн. Нүүрсээ ачих гээд 2000 жолооч машиндаа хийх ажилгүй хүлээж байна. Харин нүүрсээ аччихсан 1900 машинууд өдөрт тавь, тавиараа цувж гарах гээд ээлжээ хүлээж байна.

Жолооч нар бүгд вакцины хоёр тундаа хамрагдсан. Гэтэл шинжилгээ өгөхөөр Хятадын талд эерэг, Монголын талд түргэвчилсэн өгөхөөр сөрөг гараад байдаг.

-Нүүрсний экспортыг голлон явуулж буй Цагаан хад ногоон бүс биш. Улаан бүс болсон. Цагаан хад бүс нутагт нэг сумын дайны хөдөлгөөн өрнөж байна. Энэ хүмүүсийг хянаж байгаа боловч сэжигтэй тохиолдлуудаа алдаад байна. Тэгэхээр хариуцлагагүй, зохион байгуулалтгүй, халдвар хамгааллын дэглэм алдагдчихсан байна. Цагаан хаданд хатуу хөл хорио тогтоож, цэгцлэхгүй бол Хятадын талаас үнэхээр муу дүн тавьж байна. Улсын онцгой комисс яаралтай Цагаан хадыг улаан бүс болгон зарлаж, хязгаарлалт тогтоон, ачаа ачихгүй байгаа хоёр мянган жолоочийг орон гэрт нь хариулах хэрэгтэй байна. Нийт жолоочдын 80 хувь нь Цагаан хадаа түр хаагаад эмх цэгцтэй болгох саналтай байна. Ингэж байж Хятадын талд Монголчууд халдвар хамгааллын дэглэмээ чанд сахиж, хилээр нэвтрүүлэхэд асуудалгүй болжээ гэсэн сэтгэгдлийг төрүүлнэ. Цагаан хад бол хүн тусгаарлаад байх таатай орчин биш. Хэдхэн сендвичэн байшинтай. Ус, цахилгаан байхгүй энэ газар тавь зуугаар нь хүмүүсийг тусгаарлаад байна.

Баяжмал л ерөөсөө зогсохгүй хилээр гараад байна. Үүнийг бид гайхаж байна. Хил хаагдах үед баяжмал л гарч байсан. Хэзээ ч зогсч байгаагүй. Харин Монголын нүүрсний жолооч нарыг хилээр гаргахгүй байна. Өдөрт тавин машин нүүрс гаргаж байгаа нэртэй хажуугаар нь Оюутолгойн баяжмалаа гаргаад байна гэж бид хардаж байна.

Тусгаарлалтаас гарахаар кабинд , нэг бол тусгаарлагдах нэртэй тамлуулдаг 4000-6000 тээвэрчин байна. Төр засагт морь, мал наадам, зуун жил ярихаас өмнө бидний асуудлыг шийдээд өгөөч.