Өнгөрсөн баасан гаригийн 19.00 цагийн орчимд АН-ын дэд дарга, УИХ-ын гишүүн асан Г.Батхүү Төрийн ордонд зуурдаар таалал төгссөн. Урьдчилсан дүгнэлтээр тэрбээр өндрөөс унаж, их хэмжээний гэмтэл авч нас барсан нь тодорхой болоод байгаа юм.

Талийгаач Г.Батхүүг гаднын нөлөөтэй нас барсан байж болзошгүй гэж Ардчилсан намаас мэдэгдэл гаргасан.

Мөн уг золгүй үйл явдалтай холбогдуулан тус намаас өчигдөр албан ёсоор мэдээлэл хийхдээ “Төрийн ордонд 2-3 камер байгаагаас өөр камер алга. Үйл явдал гарсан газар ямар нэг хяналтын камер алга байна. Цагдаагийн байгууллага албан ёсны мэдээлэл хийгээгүй байхад зүрх нь хаагдсан гэх мэтээр янз бүрийн мэдээлэл хэвлэл мэдээллийн хэрэгслээр хурдтай тархаж байна. Үйл явдал шатны ойр болоогүй. Гонх гэж хэлдэг газар өндрөөс унасан байдалтай, их хэмжээний гэмтэл авсны улмаас нас барсан гэх урьдчилсан байдлаар дүгнэлт гарсан” гэсэн юм.

Талийгаач Г.Батхүү Төрийн ордонд ямар зорилготой явж байсан хаана, хэнтэй уулзсан талаарх АН-ын хийсэн мэдээллийг ЭНД дарж уншина уу. Мөн УИХ дахь Ардчилсан намын зөвлөлөөс талийгаачийн нас барсан газарт хүндэтгэл үзүүлсэн юм.

Харин Цагдаагийн байгууллагаас мэргэжлийн байгууллагын эцсийн дүгнэлт гарах хүртэл олон нийтэд худал мэдээлэл цацаж иргэдийг цочирдуулахгүй байх, талийгаачийн үхлээр улс төрийн ашиг хонжоо хайхгүй байхыг хүсч байгаа юм.

Шүүхийн эмнэлгийн эцсийн дүгнэлт 21 хоногийн дараа гарна.

Одоогоор УИХ-ын гишүүн Н.Номтойбаярыг түүнтэй хамгийн сүүлд уулзсан гэх мэдээлэл байгаа юм. Энэ талаар УИХ-ын гишүүн Н.Номтойбаяр мэдэгдэл хийсэн. Түүний мэдэгдлийг мөн ЭНД дарж уншина уу.

ТӨРИЙН ОРДОНД ГУРВАН ГОНХ БИЙ

Талийгаач зурагт харагдаж буй энэ гонх хэсгээс унаж нас барсан гэх мэдээлэл бий. Яг ийм гонх Төрийн ордонд гурван газарт байдаг. Тодруулбал, Ерөнхий сайдын өрөө, УИХ-ын чуулганы танхимын үүд, Засгийн газрын хуралдааны танхимын үүдэнд бий. Хамгийн том гонх нь УИХ-ын чуулганы танхимын үүдэнд байх бөгөөд бусад хоёр нь үүнээсээ хэмжээгээрээ арай жаахан билээ.

Харин талийгаач Г.Батхүү Төрийн ордны хоёр давхрын баруун жигүүр дэх Засгийн газрын танхимын хажуугийн гонхноос унасан байгаа юм.

Уг гонхны өндөр нь ойролцоогоор 4-5 м өндөр бөгөөд нэг метр гаруй өндөр хашлагатай юм.

Тэгэхээр хүн унахаар намхан хаалт, хашлагатай биш гэсэн үг. Зориудаар хашлагыг давж байж унах эрсдэлд орохыг хүмүүс мэднэ.

Эсвэл биеэ захирах боломжгүй үедээ хэт тонгойж доош харвал унаж мэдэх юм. Түүнээс эрүүл хүн тэндээс унахад хүндрэлтэй.

МОНГОЛ ХЭЛНИЙ ТАЙЛБАР ТОЛЬ БИЧИГТ ГОНХИЙГ: Гонхон - Харахад байшин барих жаахан юм шиг байвч хонгил, үүдний гонх бүхий дөрвөн том тасалгаатай товхийсэн барилга болох аж хэмээн тайлбарлажээ.

Төрийн ордны тухай мэдээлэлд энэ гонхны талаар дурдаагүй байна.

ГЭРЭЛ ЗУРГИЙГ Г.БАЗАРРАГЧАА