Ираны Мэргэжилтнүүдийн зөвлөл талийгаач аятолла Али Хаменеийн хүү Моджтаба Хаменеиг улсын шинэ дээд удирдагч гэж зарлалаа. Энэ тухай мэдэгдэл нутгийн цагаар гуравдугаар сарын 9-ний даваа гаригт төрийн байгууллагын вебсайтад нийтлэгдсэн байна.

Улмаар хэвлэл мэдээллээр мэдээлснээр, Мэргэжилтнүүдийн зөвлөл хэдийнэ шинэ дээд удирдагчийг томилох шийдвэрээ гаргасан байсан бөгөөд гуравдугаар сарын 8-ны өглөө энэ талаар зөвлөлийн хэд хэдэн гишүүн мэдээлжээ. Энэ нь АНУ, Израиль Ираныг чиглэсэн цэргийн ажиллагаагаар Али Хаменеиг амь үрэгдсэнээс хойш долоо хоногийн дараа болов. Гэсэн хэдий ч хэн залгамжлах нь тодорхойгүй байжээ.

Хэдхэн хоногийн өмнө буюу гуравдугаар сарын 3-нд, 56 настай Моджтаба Хаменеиг Ираны шинэ дээд удирдагчаар томиллоо гэж тус орны нэрээ нууцлахыг хүссэн эх сурвалж DW-д мэдээлжээ.

Израилийн Цэргийн Батлан хамгаалах хүч (ЦАХАЛ) гуравдугаар сарын 8-нд X (өмнө нь Twitter) микроблогоороо Али Хаменейн залгамжлагчийг хэн ч бай мөрдөхөө амалсан байна.

Трамп: АНУ-ын зөвшөөрөлгүй шинэ удирдагч удаан оршин тогтнохгүй

АНУ-ын Ерөнхийлөгч Дональд Трамп тэр өдөр "Ираны шинэ дээд удирдагч Тегеранд АНУ-ын зөвшөөрөл авахгүй бол удаан оршин тогтнохгүй" гэж мэдэгджээ. Тэрбээр ABC News-д өгсөн ярилцлагадаа “Хэрэв түүнийг бид зөвшөөрөхгүй бол удаан тэсэхгүй.

Бид 10 жил тутам дахин энэ асуудалд орохгүй гэдэгтээ итгэлтэй байхыг хүсэж байна… Би таван жилийн дараа энэ асуудал дахин сөхөгдөхийг хүсэхгүй байна. Мөн хамгийн муу тохиолдолд тэд (Ираны эрх баригчид) цөмийн зэвсэгтэй болох магадлалтай” гэжээ.

Трамп өмнө нь Моджтаба Хаменеиг Иранд хүчирхэг болохыг эсэргүүцэж, шинэ удирдагчийг сонгоход өөрөө оролцохыг хүсч байгаагаа мэдэгдсэн. Тэрбээр Axios-д өгсөн ярилцлагадаа “Тэд цаг үрэх хэрэггүй. Хаменейн хүү бол хэн ч биш. Би томилолд оролцох ёстой, Венесуэлийн Делси Родригесийн тохиолдолд ч гэсэн ингэж байсан шиг” гэж хэлсэн байна.

Али Хаменеи амь үрэгдсэн ба шинэ удирдагчийн томилгоо

Талийгаач Аятолла Али Хаменеи 1989 оноос хойш Исламын Бүгд Найрамдах Улсыг удирдаж байсан бөгөөд хоёрдугаар сарын 28-нд Израиль, АНУ-ын дайны эхний үеэр амь үрэгджээ.

Ираны шашны дээд удирдагч нь энэ албыг насан туршдаа хашдаг бөгөөд түүнийг томилох эрх нь Мэргэжилтнүүдийн зөвлөл хэмээх 88 гишүүнтэй байгууллагад ногддог. Энэхүү зөвлөлд шашны эрх зүйн мэргэжилтнүүд багтдаг бөгөөд гишүүдийг Ираны иргэд найман жил тутам сонгодог байна.

АНУ, Израилийн Ираны эсрэг цэргийн ажиллагаа

АНУ, Израиль хоёрдугаар сарын 28-нд Ираны газар нутаг руу цохилт хийсэн бөгөөд Иран нь дрон, пуужингаар Израиль болон Персийн булангийн АНУ-ын холбоотон орнууд руу довтолжээ. Иран мэдэгдэлдээ, тэдний довтолгооны зорилго нь тухайн орнууд дахь АНУ-ын цэргийн баазууд байсан гэжээ.

Дайны эхний үед Али Хаменеи төдийгүй Исламын Бүгд Найрамдах Улсын хэд хэдэн өндөр албан тушаалтнууд амь үрэгдсэн байна.

Эх сурвалж: DW
Б.ЖАРГАЛ