Нэр бүхий гишүүд Монгол банкны Ерөнхийлөгч Н.Баяртсайханыг огцруулах асуудлыг хөндөж уг асуудлаар Ерөнхий сайд У.Хүрэлсүхтэй зөвшилцөж байгаа гэх мэдээлэл гарлаа. Долларын ханш богино хугацаанд хурдтай өсч эдийн засагт ихээхэн хүндрэл учруулж буй тул Н.Баяртсайхан Ерөнхийлөгчийг огцруулах асуудлыг хөндөж байгаа гэдэг. Энэ талаар УИХ-ын гишүүн Т.Аюурсайханаас тодрууллаа. УИХ-ын гишүүн Т.Аюурсайхан өмнө нь Монголбанкны Ерөнхийлөгч Н.Баяртсайханыг “хариуцлагагүй ажиллаж долларын ханшийг өсгөсөн” зэрэг хэд хэдэн үндэслэлээр огцруулах асуудлыг хөндөж байсан билээ.

Т.АЮУРСАЙХАН: МОНГОЛ БАНКНЫ ЕРӨНХИЙЛӨГЧИД ХАРИУЦЛАГА
ХҮЛЭЭЛГЭНЭ ГЭСЭН БАЙР СУУРИНДАА БАЙГАА

-Нэр бүхий гишүүд Монгол банкны Ерөнхийлөгчийг огцруулах асуудлыг Ерөнхий сайд У.Хүрэлсүхэд танилцуулж энэ асуудлаар зөвшилцөж байгаа гэх мэдээлэл байна. Энэ талаар танд мэдээлэл байна уу?

-УИХ-ын даргыг чөлөөлүүлэх асуудлыг хөндөөд явж байна. УИХ-ын даргыг өөрчилсний дараа шинэчлэл, өөрчлөлтийн маш томоохон алхмуудыг хийж хэрэгжүүлнэ. Монголын төр, нийгэмд тулгамдаад буй асуудлуудыг шийднэ. Үүнд эдийн засгийн асуудал ч орно. Монгол төгрөг суларч хүчгүйдэж байна. Сүүлийн арав гаруй хоногийн хугацаанд долларын ханш 100 гаруй төгрөгөөр чангарсан. Энэ хэмжээгээр Монгол төгрөгийн ханш суларлаа. Энэ нь Засгийн газрыг огцруулах, албан тушаал булаацалдах, Ерөнхий сайдыг муухай харагдуулах гэхээсээ илүүтэйгээр эдийн засгийн аюулгүй байдалд шууд хохирол учруулж буй нөхцөл байдал мөн шүү дээ. Валютын ханш өсч буй асуудлаар Монгол банк тоймтой ажил хийхгүй байна. Магадгүй гараа хумхин суух нөхцөл байдал руу хүргэж буй зүйл байхыг үгүйсгэхгүй. Миний хувьд долларын ханш 2600 төгрөг хүрвэл Монгол банкны Ерөнхийлөгчид хариуцлага хүлээлгэнэ гэсэн байр, сууриндаа байгаа.

-Н.Баяртсайханыг Монгол банкны Ерөнхийлөгчөөр томилоход УИХ-ын дарга М.Энхболдыг нөлөөлсөн гэх яриа байдаг. М.Энхболд даргын хүн учраас огцруулах асуудлыг хөндөөд байна гэх хардлага байна. Энэ хэр бодитой вэ?

-Түүний хүн, үүний хүн гэх асуудлаар ажилд хандаж болохгүй. Ажлаа хийж чадаж байна уу, үгүй юу гэдэгт анхаарах ёстой. Ажлаа хийж чадахгүй бол “Миний хүн” гэх үндэслэлээр толгойг нь илж болохгүй. Ажлаа хийж чадаж байгаа бол дээрх үндэслэлээр хандаж болохгүй. Асуудалд бодитоор л хандах ёстой. Өнөөдөр бодит нөхцөл байдал ямар байна. Монгол төгрөг үнэндээ хүчгүйдэж байна. Энэ хэрээр ядуурал ихсэж, аж ахуй нэгжүүд хүнд байдалд байна. Валютын зээлтэй аж, ахуй нэгжүүд маш хүнд байдалд байгаа.

-Цаг хугацааны хувьд УИХ-ын даргыг чөлөөлсний дараа Монгол банкны Ерөнхийлөгчийг огцруулах асуудлыг хэлэлцэх юм байна гэж ойлголоо?

-Тэгж ойлгож болно.

-Хуулийн дагуу Монгол банкны Ерөнхийлөгчийн асуудлыг УИХ-ын даргад өргөн барих ёстой юм биш үү?

-УИХ-ын одоогийн дарга энэ өргөдлийг хүлээж авч шийдэхгүй. Чуулганаар хэлэлцэх асуудалд оруулахгүй. Ийм нөхцөл байдал үүснэ. Тийм учраас хүлээгдээд буй өөрчлөлт, шинэчлэлтийн асуудлыг энэ УИХ-ын даргатайгаар хийх боломжгүй.

-МОНГОЛ БАНК: АРВАННЭГДҮГЭЭР САРААС ХОЙШ 370 САЯ ДОЛЛАРЫГ
ЗАХАД НИЙЛҮҮЛЭЭД БАЙНА-

Харин Монголбанкнаас Т.Аюурсайхан гишүүний дээрх яриа болон долларын ханшийн өсөлттэй холбогдуулан доорх тайлбарыг хийсэн юм.

Олон улсын санхүүгийн зах зээл дэх ам.долларын өгөөж нэмэгдсэн, дотоодын эдийн засагт үүсээд буй түр зуурын шинжтэй хүчин зүйлсээс шалтгаалан сүүлийн үед төгрөгийн гадаад валюттай харьцах ханш сулрах хандлага ажиглагдах болсон. Төгрөгийн ханшийн огцом хэлбэлзлийг бууруулах зорилгоор Монголбанк 2018 оны 2 дугаар хагаст нийт 1.0 тэрбум ам.долларыг нийлүүлсэн бөгөөд 11 дүгээр сар гарснаас хойш нийт 370 сая ам.долларыг захад нийлүүлээд байна.

Улмаар энэ оны 11 дүгээр сарын 07-ны өдрөөс хойш тасралтгүй сулраад байсан төгрөгийн ханш 12 дугаар сарын 05-ны өдөр 5.02 төгрөгөөр чангарсан байна.Түүнчлэн хэрэглээний зээлийг хязгаарлах зорилгоор хэрэглээний зээлийн хугацааг 30 хүртэл сар болгох, хэрэглээний зээлийн өр орлогын харьцааг 70 хувиар тогтоох, валютын зээлийн эрсдэлийн жинг нэмэгдүүлснээр банкуудын гадаад валютаар зээл олгох сонирхлыг бууруулах, бодлогын хүүг нэг нэгж хувиар нэмэгдүүлэн, 11%-д хүргэснээр төгрөгийн харьцангуй өгөөжийг нэмэгдүүлэх арга хэмжээ аваад байна.

Харин эдийн засагчид долларын ханшийг бууруулах чиглэлд Монгол банкны зүгээс хангалттай ажилласан. Тухайлбал, мөнгөний бодлогын хүүгээ өсгөснөөс гадна хэд, хэдэн удаа интервенци хийсэн. Харин одоо Засгийн газар ажлаа хийх ёстой. Улс төрийн тогтворгүй нөхцөл байдлаас шалтгаалан гадны улсуудаас орж ирэх хөрөнгө оруулалтууд түр зогсоод байна. Тиймээс төр засаг тогтвортой үйл ажиллагаагаа явуулах ёстой. Нүүрсний экспортоо тогтвортой байлгах шаардлагатай Засгийн газар гаднаас доллар олж ирэх, хөрөнгө оруулалт татах чиглэлд идэвхтэй ажиллах шаардлагатай гэх зөвлөгөөг өгч байна.