Коронавирус /COVID19/ цар тахлаас урьдчилан сэргийлэх, эрсдэлийг бууруулах зорилгоор өндөржүүлсэн бэлэн байдлын зэрэгт шилжүүлсэн хугацааг 2020 оны 09 дүгээр сарын 15-ны өдрийг дуустал сунгах саналыг УОК гаргаж Засгийн газрын ээлжит бус хуралдаанаар дэмжсэн.

Нөхцөл байдлыг харгалзан 09 дүгээр сарын 15-наас хойш зарим хязгаарлалтын дэглэмийг сулруулах, цуцлах хүртэл арга хэмжээ авахаар төлөвлөөд байна. 2020оны 08 дугаар сарын 25-ны байдлаар Монгол Улсад гаднаас тээвэрлэгдэн ирсэн 298 тохиолдол бүртгэгдсэн бөгөөд 289 хүн эдгэрсэн, эмчлүүлж байгаа 8 хүний биеийн байдал хэвийн 1иргэний биеийн байдал хүндэвтэр байна.

Засгийн газрын Хэвлэл мэдээлэлтэй харилцах албаны дарга Ц.ГАНЗОРИГ:

9 сарын 14-нөөс аймгуудын сургууль, цэцэрлэгүүд хэвийн горимоор буюу өдөр бүр танхимаар хичээллэх бол нийслэлийн хэмжээнд 9 сарын 21-нээс хэвийн горимд шилжихээр бэлтгэлээ хангаж байна. 9 сарын 1-нээс хичээл эхлэх боловч цар тахалтай холбоотойгоор долоо хоногт 3 өдөр танхимаар, 2 өдөр цахимаар хичээллэх түр журам гарсан.

Өндөржүүлсэн бэлэн байдлын зэрэглэлийг 9 сарын 15-ныг хүртэл сунгасан бөгөөд энэ нь хилээр нэвтрэх хөдөлгөөнийг хязгаарлах үндэслэл, халдвар тархахаас урьдчилан сэргийлсэн хуульзүйн үндэслэл. Цаашид соёл урлаг, спортын арга хэмжээдийн талаар мөн и-спортын төвүүдийг нээх талаар ажиллаж байна.