УИХ-ын гишүүн О.Цогтгэрэл: Тогтоолын төсөл 13 зүйлтэй. Тэгсэн хэрнэ шийдэлгүй, өмнө нь гарсан шийдвэрийг давтсан байна. Тооцоолоогүй хүндрэл бэрхшээл рүү ард иргэдээрээ орчихлоо. Улс оронд гэнэтийн тооцоолоогүй ачаалал ирж байна. Ачааллыг хэн, хэн нь үүрэх вэ. Нэг хэсэг нь төр үүрнэ гээд байгаа. Гэтэл төрийн мөнгө гэж байхгүй. Татвар төлөгчдийн мөнгө л байгаа, эсвэл ард иргэдийн ирээдүйг барьцаалж зээл авна. Тэгэхээр нөгөө талдаа энэ ачаалалд иргэд, аж ахуйн нэгжүүд өртөж байна. Энэ ачааллыг хуваалцаж болох хэсэг бол төрийн албан хаагчид, төрийн өмчийн компаниуд. Монголд 200-аад мянган төрийн албан хаагч, төрийн өмчийн компанийн ажилтнууд байна. Цалин урамшуулал нийлээд 2.4 их наядын цалингийн сантай. Тэгэхээр онцгой байдал, эмнэлэг, цагдааг оруулахгүйгээр цалингийн 20 хувийг танаж бусад салбар руугаа оруулж болох юм биш үү. 2.4 их наядын 20 хувь гэхээр 500 тэрбум төгрөг болно. Магадгүй энд ялгаатайгаар төрийн өндөр дээд албан тушаалтнууд илүү өндөр хувиар оролцож болно. Төрийн алба татвар төлөгчдийн мөнгөөр амьдардаг. Гэтэл татвар төлөгч үнээ нь тэжээлгүй болоод үхэх гэж байхад бид саасаар байх уу. Тиймээс энэ ачааллыг төрийн алба хамт үүрэлцье. УИХ-ын гишүүд, туслахуудаас эхлээд өчнөөн олон цалингийн боломж байгаа байх.